کراچی: لائنز ایریا کے رہائشی اور طالب علم بلاول نے اے وی ایل سی اہلکاروں پر ڈکیتی اور بزرگ والد کے اغوا کا الزام لگاتے ہوئے آئی جی سندھ سے انصاف کی اپیل کردی۔

تفصیلات کے مطابق کراچی میں اے وی ایل سی (اینٹی وہیکل لفٹنگ سیل) اہلکاروں پر ڈکیتی اور ایک بزرگ شہری کے شارٹ ٹرم اغوا کا سنگین الزام سامنے آیا ہے، لائنز ایریا کے رہائشی اور طالب علم بلاول نے آئی جی سندھ سے انصاف کی اپیل کی ہے۔

طالب علم بلاول نے بتایا یہ واقعہ 19 اگست کی رات پیش آیا، جب سی آئی اے کی دو موبائلیں ان کی دکان پر پہنچیں اور اہلکاروں نے ان کے والد نور احمد کو ہراساں کرتے ہوئے جنرل اسٹور کی تلاشی شروع کردی۔

لائنز ایریا کے رہائشی کا کہنا تھا کہ اہلکار مبینہ طور پر اسٹور کے دوسرے حصے کا تالا توڑ کر اندر داخل ہوئے اور وہاں رکھے گئے 11 لاکھ 9 ہزار روپے اپنے ساتھ لے گئے۔

بلاول نے الزام لگایا کہ اہلکار نقدی لوٹنے کے بعد دکان میں نصب کیمرے بھی اکھاڑ کر ساتھ لے گئے۔

طالب علم نے بیان میں کہا کہ اہلکار والد نور احمد کو پولیس موبائل میں بٹھا کر ساتھ لے گئے، جس کے بعد دو سے تین روز تک ان کا کوئی پتہ نہیں چلا، اہلخانہ والد کو تلاش کرتے رہے لیکن تیسرے دن رات کو انہیں اجمیر نگری تھانے بلا کر واپس کیا گیا۔

لائنز ایریا کے رہائشی کا کہنا تھا کہ اہلکاروں نے اسٹور میں موجود کاغذات واپس کردیئے تاہم لوٹی گئی رقم واپس نہیں کی۔ جب رقم کا مطالبہ کیا گیا تو اہلکاروں نے گالیاں دیں اور دھمکیاں دیں۔

طالب علم نے آئی جی سندھ سے مطالبہ کیا ہے کہ معاملے کی شفاف تحقیقات کرکے ذمہ دار اہلکاروں کو کڑی سزا دی جائے اور لوٹی گئی رقم واپس دلوائی جائے۔

کراچی : شہر کے مختلف علاقوں میں بجلی کی بندش نے ماضی کے تمام ریکارڈ توڑ دیے، بارش کےکئی دن بعد بھی مختلف علاقوں کی بجلی بحال نہ ہوسکی۔

تفصیلات کے مطابق کراچی میں حالیہ بارش کے کئی دن گزرنے کے باوجود کے الیکٹرک کا ترسیلی نظام مکمل طور پر بحال نہ ہوسکا، شہر کے مختلف علاقوں میں گھنٹوں بجلی بند رہنے سے شہری شدید مشکلات میں مبتلا ہیں۔

ذرائع نے کہا ہے کہ نیپرا کو دی جانے والی یقین دہانی کے باوجود صورتحال جوں کی توں ہے اور متعدد فیڈر، پی ایم ٹیز اور زیر زمین کیبل فالٹس کے باعث بجلی کی فراہمی معطل ہے۔

شہر کے مختلف علاقوں میں بجلی کی بندش نے ماضی کے تمام ریکارڈ توڑ دیے، معین آباد، ماڈل کالونی، گلستان جوہر، گلشن اقبال، نارتھ ناظم آباد، سرجانی، اسکیم 33 اور گڈاپ سمیت کئی علاقوں میں گھنٹوں بجلی بند رہتی ہے۔

مزید پڑھیں : بجلی کی طویل بندش : شہریوں کا کے الیکٹرک کے دفتر کے باہر ڈھول کی تھاپ پر رقص

ماڈل کالونی، معین آباد، امیرآباد اور صدیق آباد میں پانچ روز بعد بحال ہونے والی بجلی ایک بار پھر بند ہوگئی، شہریوں کا کہنا ہے کہ گزشتہ رات بارہ بجے سے بجلی کی فراہمی معطل ہے جس سے معمولاتِ زندگی مفلوج ہوکر رہ گئے ہیں۔

ادھر اسکیم 33 کے میرٹھ سوسائٹی اور شادمان 14-B میں بھی طویل لوڈشیڈنگ جاری ہے، شہریوں نے بجلی کی عدم فراہمی پر شدید احتجاج کرتے ہوئے کے الیکٹرک اور انتظامیہ سے فوری نوٹس لینے کا مطالبہ کیا ہے۔

کراچی (23 اگست 2025): بم ڈسپوزل یونٹ نے کراچی کے مرکزی علاقے صدر میں پٹاخوں کے گودام میں دھماکے کی رپورٹ تیار کر لی ہے۔

تفصیلات کے مطابق بم ڈسپوزل یونٹ نے اپنی رپورٹ میں کہا ہے کہ کراچی کے علاقے صدر میں پٹاخوں کے گودام میں دھماکے میں 500 کلو گرام فائر ورکس کا سامان جل گیا، اس دھماکے کی آواز 5 سے 7 کلو میٹر دور تک سنی گئی تھی۔

رپورٹ میں کہا گیا ہے کہ عمارت میں 3 گوداموں میں اب بھی آتش بازی کا سامان بھرا ہوا ہے، اور گودام کے قریبی گراؤنڈ میں 2 کنٹینروں میں بھی آتش بازی کا سامان موجود ہے، اور اس وقت مجموعی طور پر 5 ہزار کلو گرام سامان موجود ہے۔

بم ڈسپوزل یونٹ کے مطابق ملزم حنیف مختلف شہروں اور بیرون ملک سے بھی سامان منگواتا تھا، اور اسی عمارت کے عقب میں آتش بازی کا سامان تیار بھی کرتا تھا۔ رپورٹ میں تمام تر سامان کو کسی محفوظ مقام پر جلد از جلد تلف کرنے کی سفارش کی گئی ہے۔

شوارما کھانے سے متعدد افراد کی حالت غیر ہو گئی

یاد رہے کہ تین روز قبل کراچی کے علاقے ایم اے جناح روڈ پر پٹاخوں کے گودام میں دھماکا ہوا تھا، جس کے نتیجے میں 6 افراد جاں بحق ہو گئے تھے، بعد ازاں پولیس نے گودام کے مالک حنیف پٹاخہ کو گرفتار کیا جو زخمی تھا اور نجی اسپتال میں زیر علاج ہے، حنیف کی صحت ٹھیک نہ ہونے کے باعث ان کا بیان بھی قلم بند نہیں کیا جا سکا ہے۔

پولیس کا یہ بھی کہنا تھا کہ حنیف کا بھائی ایوب گزشتہ رات جناح اسپتال سے فرار ہو گیا تھا، جس کی گرفتاری کے لیے چھاپوں کا سلسلہ جاری ہے، دونوں بھائیوں کو واقعے کی ایف آئی آر میں نامزد کیا گیا ہے، مقدمے میں قتل بالسبب، غفلت و لاپرواہی اور دیگر دفعات شامل کی گئی ہیں۔

خیال رہے کہ دھماکے کے نتیجے میں اب تک 6 افراد جاں بحق ہو چکے ہیں، عمارت سے 4 افراد کی لاشیں ملی تھیں، جب کہ 2 زخمی بعد میں دم توڑ گئے تھے۔

کراچی (23 اگست 2025): شہر قائد میں ایک خاتون سے نا زیبا حرکت کرنے والے شخص کو جمشید کوارٹرز پولیس نے گرفتار کر لیا۔

تفصیلات کے مطابق کراچی میں جمشید کوارٹرز پولیس نے خاتون سے نازیبا حرکت کرنے والے شخص کو گرفتار کر لیا ہے، ملزم کی چند دن قبل بارش میں خاتون سے نا زیبا حرکت کی ویڈیو وائرل ہوئی تھی۔

جمشید کوارٹرز پولیس کا کہنا ہے کہ ویڈیو جمشید ٹاؤن میں بنائی گئی تھی، جس سے ملزم کی شناخت واضح ہوئی، ملزم محب اللہ کے خلاف سرکار کی مدعیت میں مقدمہ درج کر کے گرفتار کر لیا گیا ہے۔

یاد رہے کہ جولائی میں ملتان کے علاقے المصطفیٰ کالونی میں ایک بچی کے ساتھ ہونے والی نازیبا حرکت کا واقعہ مشہور ہوا تھا، عادل ولد غفور نامی مقامی رہائشی نے راہ چلتی چھوٹی لڑکی پر حملہ کر کے جنسی طور پر ہراساں کیا تھا۔

بچی کیساتھ نازیبا حرکت کرنیوالا ملزم زخمی حالت میں گرفتار

واقعے کی سی سی ٹی وی فوٹیج سوشل میڈیا پر وائرل ہونے کے بعد پولیس نے کارروائی کرتے ہوئے ملزم کو گرفتار کیا، پولیس کا کہنا تھا کہ چھاپے کے وقت ملزم نے پولیس پر فائرنگ کی جس پر جوابی فائرنگ سے وہ زخمی ہوا۔

گزشتہ ہفتے پندرہ اگست کو پنجاب کے شہر پیر محل میں ایک راہ چلتی لڑکی کے ساتھ نازیبا حرکت کی ویڈیو بھی سوشل میڈیا پر وائرل ہو گئی تھی، جس کے بعد پولیس نے نوجوان کو تلاش کر کے اسے گرفتار کر لیا تھا، اس واقعے میں دو موٹر سائیکل سواروں نے لڑکی پر حملہ کیا تھا۔

کراچی: صدر کے رہائشی علاقے میں سلنڈر دکانیں بڑا خطرہ بن گئیں،ضلعی انتظامیہ اور پولیس کی خاموشی کے باعث یہ کاروبار بلا خوف و خطر جاری ہے۔

تفصیلات کے مطابق کراچی میں صدر کے رہائشی علاقے میں پٹاخوں کے گودام کے بعد اب سلنڈر اور ایل پی جی کی دکانیں بھی شہریوں کے لیے سنگین خطرہ بن گئی ہیں۔

رہائشی عمارتوں کے نیچے گیس سلنڈر اور ایل پی جی کی دکانیں قائم ہیں، جبکہ کئی مقامات پر دکاندار سلنڈر سڑک پر رکھ کر کام کر رہے ہیں۔

ضلعی انتظامیہ اور پولیس کی خاموشی کے باعث یہ کاروبار بلا خوف و خطر جاری ہے۔

ذرائع نے بتایا کہ ماضی میں رہائشی عمارتوں کے نیچے قائم گیس سلنڈر دکانوں میں آگ اور دھماکوں کے متعدد واقعات ہو چکے ہیں، جن میں کئی قیمتی جانیں ضائع ہوئیں، تاہم اس کے باوجود متعلقہ ادارے مؤثر کارروائی کرنے میں ناکام نظر آتے ہیں۔

شہریوں نے خدشہ ظاہر کیا ہے کہ اگر بروقت اقدامات نہ کیے گئے تو کسی بھی وقت بڑا سانحہ پیش آسکتا ہے۔

شہریوں نے اعلیٰ حکام سے مطالبہ کیا ہے کہ رہائشی عمارتوں کے نیچے سلنڈر اور ایل پی جی دکانوں کے خلاف فوری کارروائی کی جائے تاکہ قیمتی جانوں کو محفوظ بنایا جا سکے.