کراچی : ایم اے جناح روڈ پر واقع پٹاخوں کے گودام میں خوفناک دھماکے میں گرلز اسکول مکمل تباہ ہوگیا تاہم خوش قسمتی سے چھٹی کی وجہ سے اسکول میں کوئی موجود نہیں تھا۔

تفصیلات کے مطابق کراچی کی مصروف شاہراہ ایم اے جناح روڈ پر واقع پٹاخوں کے گودام میں خوفناک دھماکے اور آتشزدگی کے نتیجے میں قریب موجود گرلز سیکنڈری اسکول جیکب لائنز نمبر دو مکمل طور پر تباہ ہوگیا۔

اسکول میں 150 سے زائد طالبات زیر تعلیم ہیں، تاہم وزیراعلیٰ سندھ کی ہدایت پر عام تعطیل کے باعث خوش قسمتی سے کوئی جانی نقصان نہیں ہوا۔

دھماکے سے کلاس رومز، اسٹاف روم، لیب، دروازے، کھڑکیاں اور باؤنڈری والز مکمل طور پر تباہ ہوگئیں جبکہ کرسیاں اور فرنیچر دور جا گرا۔

واقعے میں مجموعی طور پر پانچ افراد جاں بحق اور 28 زخمی ہوگئے، زخمیوں کو سول اور جناح اسپتال منتقل کیا گیا۔

واقعے کی سی سی ٹی وی فوٹیج میں دیکھا جا سکتا ہے کہ دھماکے کے بعد علاقے میں بھگدڑ مچ گئی اور قریبی عمارتوں اور گاڑیوں کو شدید نقصان پہنچا تاہم فائربریگیڈ کی 12 گاڑیوں نے چار گھنٹے کی جدوجہد کے بعد آگ پر قابو پایا۔

مزید پڑھیں : کراچی: پٹاخوں کے گودام میں دھماکے سے اموات کی تعداد 5 ہوگئیں، مقدمہ درج

پولیس نے واقعے کا مقدمہ پریڈی تھانے میں سرکار کی مدعیت میں درج کرلیا ہے، جس میں گودام مالک حنیف اور محمد ایوب کو نامزد کیا گیا ہے تاہم ملزم حنیف زخمی حالت میں اسپتال میں زیر علاج ہے۔

ڈی سی ساؤتھ جاوید نبی کھوسو کا کہنا ہے کہ رہائشی علاقے میں آتشبازی کے سامان کا گودام کیسے بنایا گیا، اس حوالے سے جامع تحقیقات ہوں گی۔

سی ٹی ڈی کے افسر راجہ عمر خطاب نے بتایا کہ گزشتہ دو برسوں کے دوران اسی مارکیٹ سے دو ٹن سے زائد بارودی مواد برآمد کیا گیا تھا۔

یاد رہے کہ اسی مارکیٹ میں اکتوبر 2021 میں بھی پٹاخوں کی دکان میں دھماکے اور آگ لگنے کے باعث خواتین اور بچوں سمیت 6 افراد جاں بحق ہوگئے تھے۔

کراچی (21 اگست 2025): شہر قائد میں منگل کے روز شروع ہونے والی بارش کے ساتھ بند ہونے والی بجلی کئی علاقوں میں تین روز بعد بھی بحال نہ ہو سکی۔

اے آر وائی نیوز کے مطابق شہر کراچی کے باسی شدت سے بارش کے منتظر تھے۔ لیکن جب باران رحمت برسی تو متعلقہ اداروں کی نا اہلی سے اسے ان کے لیے زحمت میں تبدیل کر دیا۔

ایک جانب پورا شہر سوئمنگ پول بن گیا جس میں انسان اور گاڑیاں تیرتے دکھائی دیے تو وہیں بارش کے ساتھ حسب معمول کے الیکٹرک کے فیڈر ٹرپ ہونے کے باعث شہر کے وسیع علاقے میں بجلی معطل ہوگئی۔

بارش کے باعث کے الیکٹرک کے 160 فیڈرز تاحال بند ہیں۔ روشنیوں کا شہر کہلانے والے کراچی کے کئی علاقے تین روز سے تاریکی میں ڈوبے ہوئے ہیں جس کے وجہ سے شہریوں کو شدید اذیت کا سامنا کرنا پڑ رہا ہے۔

کراچی کے وسیع رہائشی علاقے اسکیم 33، بلدیہ، ڈیفنس، گلستان جوہر بلاک 3 میں تین روز سے بجلی بند ہے۔ شدید گرمی حبس میں بالخصوص فلیٹوں کے رہائشیوں کی زندگی عذاب بن گئی ہے۔ متعدد شکایات کے باوجود اب تک بجلی بحال نہیں کی گئی ہے۔

اس کے علاوہ صفورہ گوٹھ، کنیز فاطمہ سوسائٹی، مدراس چوک، نعمان اسکوائر، گلشن اقبال، بن قاسم، گلشن حدید، منگھوپیر، رزاق آباد میں بھی بجلی بحال نہیں ہوئی ہے۔

بجلی کی طویل بندش کے باعث ان علاقوں میں پانی کا بحران پیدا ہو گیا ہے۔ کئی علاقوں میں گھروں اور مساجد میں وضو کے لیے بھی پانی دستیاب نہیں ہے۔

کے الیکٹرک کا ٹرانس میشن سسٹم شہر کو بلا تعطل بجلی فراہم کرنے میں ناکام ہے۔  اور جن علاقوں میں بجلی بحال کر دی گئی ہے، وہاں بھی وقفے وقفے سے بجلی آنکھ مچولی جاری ہے۔

یشتر علاقوں ، اپارٹمنٹس کے سب اسٹیشنز، انڈر گراؤنڈ کیبلز میں پانی کی وجہ سے بجلی معطل ہے۔