لاہور : قومی اسمبلی میں اپوزیشن لیڈر خورشید شاہ نے کہا ہے کہ مولانا فضل الرحمان جوانی میں خوب غیر ملکی دورے کرتے تھے،انہیں چاہیئے کہ کشمیر کمیٹی کی کارکردگی کو بھی بہتر بنائیں استعفی نہ دیں۔

ان خیالات کا اظہار انہوں نے لاہور میں سابق وزیراعظم یوسف رضا گیلانی سے ان کی رہائش گاہ پر ملاقات کے بعد میڈیا سے گفتگو کرتے ہوئے کیا۔

خورشید شاہ کا کہنا تھا کہ مولانا فضل الرحمان کافی عرصے سے کشمیر کمیٹی کے چیئرمین ہیں لیکن نہ تو ملکی سطح پر اور نہ ہی عالمی سطح پر کشمیر کے لیے کوئی کام ہوا۔

ایک سوال کے جواب میں خورشید شاہ نے کہا کہ الیکشن کمیشن کی تشکیل میں کسی کی پسند نا پسند کو تسلیم نہیں کیا جائے گا، ایسا الیکشن کمیشن تشکیل دیا جائے گا جو غیر جانب دار ہو گا اور جس سے آنے والی نسلوں کو فائدہ ہو گا۔

خورشید شاہ نے کہا کہ پاناما لیکس ہی ایشو ہے، جائز چیزوں کے لیے قانون سازی ہونی چاہئے، ٹی او آر کے معاملے پر اپوزیشن کی طرف سے کوئی رکاوٹ نہیں ہے۔

اپوزیشن لیڈر کا کہنا تھا کہ ٹی او آرز پر اپوزیشن وزیراعظم نوازشریف کا نام نکالنے پر تیار ہوگئی تھی لیکن وزیراعظم نے دو مرتبہ قوم سے خطاب میں خود کو احتساب کے لیے پیش کیا۔ جس کے بعد ڈیڈ لاک آ گیا۔

انہوں نے کہا کہ پیپلز پارٹی محاذ پر نہیں بلکہ افہام و تفہیم پر یقین رکھتی ہے اور اسی لیے ہم نہیں چاہتے کہ مسائل کے حل کے لیے سڑکوں پر آنے کی نوبت آئے۔