مقبوضہ کشمیر: حریت رہنماء مسرت عالم کی گرفتاری کیخلاف احتجاجی ریلی میں بھارتی پولیس مظاہرین پر ٹوٹ پڑی، شیلنگ اور لاٹھی چارج سے چودہ کشمیری زخمی ہوگئے۔
کشمیر میں پاکستان کا جھنڈا لہرانا جُرم بن گیا، مسرت عالم گرفتار ہوئے تو جنت نظیر وادی کی آزادی کے متوالے احتجاج کیلئے نکل آئے، حریت رہنما میر واعظ عمر فاروق کی قیادت میں نکالی گئی۔
ریلی غاصب بھارتی فوج کو ایک آنکھ نہ بھائی اور نہتے مظاہرین پر چڑھائی کردی، لاٹھی چارج ،شیلنگ اور فائرنگ سے کئی کشمیری زخمی ہوئے۔
بزرگ کشمیری رہنماء سید علی گیلانی کو بھی پاکستان سے محبت کے جرم میں نظربند کر دیا گیا۔
اے آر وائی نیوزسے خصوصی گفتگو میں ان کا کہنا تھا کہ کشمیریوں پر سڑسٹھ سال سے بھارت مظالم ڈھا رہا ہے، حریت رہنماء آسیہ اندرابی کاکہنا ہے کہ عالمی برادری کو بھارتی سفاکیت پر جاگنا ہوگا۔
مقبوضہ کشمیر کےکٹھ پتلی وزیرِاعلیٰ مفتی محمد سعید نے مظاہروں اور ریلیوں کو ناقابل قبول قراردیتے ہوئے کہا ہے کہ قانون اپنا کام کرے گا۔
