Tag: kashmir solidarity day

سیالکوٹ: وزیر خارجہ خواجہ آصف کا کہنا ہے کہ پاک بھارت دشمنی کی وجہ صرف مقبوضہ کشمیر ہے، پاکستان کشمیرسے دستبردار نہیں ہوسکتا، 8لاکھ بھارتی فوج کشمیر کی تحریک کوکچلنے میں مصروف ہے، ظلم کے باوجود بھارت اس تحریک کو ختم نہیں کر سکا

تفصیلات کے مطابق سیالکوٹ میں وزیر خارجہ خواجہ آصف کا یوم یکجہتی کشمیر پر تقریب سے خطاب کرتے ہوئے کہا کہ یوم کشمیر پراس بار نظر آنیوالے جذبے کی مثال پہلے نہیں ملتی، ایک لاکھ کشمیریوں کو بارڈر پارکرتے ہوئے شہید کیا گیا۔

وزیر خارجہ کا کہنا تھا کہ نوجوان نسل کو پاکستان کی آزادی سے آگاہی حاصل کرناچاہئے، کشمیر کی جدوجہدکو خون سے نیا جذبہ ملا ہے، 8لاکھ بھارتی فوج کشمیر کی تحریک کو کچلنے میں مصروف ہے، ظلم کے باوجود بھارت اس تحریک کو ختم نہیں کر سکا۔

خواجہ آصف نے کہا کہ جنہوں نے غداری کی وہ بھی مجبور ہیں کشمیر کا حل ہونا چاہئے، پاکستان سفارتی واخلاقی سطح پرکشمیریوں کی مدد کررہاہے، پاکستان کشمیریوں کیساتھ ہر محاذ پر اظہار یکجہتی کررہا ہے، کشمیر کی تحریک کو آزادی کی جدوجہدتسلیم کیا جا رہا ہے۔

مزید پڑھیں :  کشمیر کی ہرصورت حمایت جاری رکھیں گے: وزیراعظم

انکا کہنا تھا کہ دنیاکاضمیراس مسئلے پرخاموش ہے، کشمیریوں کی آزادی کی آواز اٹھانے پر ایران کے شکر گزار ہیں، ترکی نے بھی ہر محاذپر کشمیریوں کیلئے آوازاٹھائی ہے، پاک بھارت دشمنی کی وجہ صرف مقبوضہ کشمیر ہے، پاکستان کشمیرسے دستبردار نہیں ہوسکتا، یہی وجہ ہے کہ پاکستان میں دہشت گردی کی جا رہی ہے۔

وزیر خارجہ نے کہا کہ بھارت ورکنگ باؤنڈری ،افغان بارڈرپر دہشتگردی کرارہا ہے، دہشت گردی کےباوجود ہرسطح پرکشمیرکیلئے آواز اٹھائیں گے، ہم کشمیریوں کیساتھ محبت تیسری نسل میں منتقل کررہےہیں، ہماری بہادرافواج گلی کوچوں اورسرحدوں کی حفاظت کررہی ہیں، کشمیریوں کے شانہ بشانہ کھڑے ہوکر ان کی جنگ لڑنے کا عہد کرنا چاہئے۔

خواجہ آصف کا کہنا تھا کہ دہلی میں دہشت گرد حکمرانوں نے سمجھوتہ ایکسپریس کو جلایا ، بھارتی گجرات میں مسلمانوں کےخون سےہولی کھیلی گئی، کشمیر ایک دن ضرور آزاد ہو گا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔