Tag: Kashmir

اسلام آباد : قومی اسمبلی میں کشمیریوں کی حق خودارادیت سے متعلق قرارداد متفقہ طور پر منظور کر لی گئی ہے جس میں مسئلہ کشمیر کو اقوام متحدہ کی سلامتی کونسل کی قراردادں کے تحت حل کرنے کا مطالبہ کیا گیا ہے۔

تفصیلات کے مطابق قومی اسمبلی کے آج ہونے والے اجلاس میں امور کشمیر کے وزیر برجیس طاہر نے کشمیریوں کی سیاسی، اخلاقی اور سفارتی حمایت جاری رکھنے اور حق خودارادیت کی منصفانہ جدوجہد میں ان کی مکمل حمایت سے متعلق قرارداد پیش کی جسے متفقہ طور پر منظور کرلیا گیا۔

قرارداد میں کہا گیا ہے کہ پاکستان مقبوضہ کشمیر میں بھارتی افواج کے مظالم اور قتل عام کی مذمت کرتے ہوئے کشمیریوں کے حق خودارادیت کی منصفانہ جدوجہد میں ان کی مکمل حمایت کا اظہار کرتا ہے اور کشمیریوں کی اخلاقی، سیاسی اور سفارتی حمایت و مدد جاری رکھے گا۔

قومی اسمبلی میں پیش کی گئی قرارداد میں بھارت کا یہ مضحکہ خیز دعویٰ بھی مسترد کیاگیا ہے کہ کشمیر بھارت کا حصہ ہے کیوں کہ بھارت نے دوخودمختار ریاستوں کے درمیان اس تنازعے کو خود اقوام متحدہ میں اٹھایا ہے۔

قرارداد میں کہا گیا کہ مقبوضہ کشمیر میں کالے قوانین اور مسلسل کرفیوں نے کشمیریوں کی زندگیاں اجیرن بنا دی ہیں جب کہ ہزاروں کشمیری عقوبت خانوں میں جان کی بازی ہار گئے اس کے باوجود عالمی برادری کی خاموشی افسوس ناک ہے۔

قرارداد میں پاکستان اور بھارت میں اقوام متحدہ کے فوجی مبصر گروپ پر اپنی ذمہ داریاں پوری کرنے اور اقوام متحدہ قومی سلامتی کونسل کی قراردادوں کے تحت کشمیر کو حقوق خودارادیت دینے کا مطالبہ بھی کیا گیا ہے۔

دریں اثناء وزیر تجارت خرم دستگیر خان نے ایوان کو بتایا کہ مقبوضہ کشمیر میں انسانی حقوق کی خلاف ورزیوں کو عالمی سطح پر اجاگر کیا جا رہا ہے اور وزیر اعظم پاکستان سمیت مشیر خارجہ اور اعلیٰ سرکاری افسران وقتآ فوقتآ مسئلہ کشمیر کی جانب عالمی توجہ دلاتے رہتے ہیں۔

بعد ازاں جمعیت علمائے اسلام کے سربراہ اور کشمیر کمیٹی چیئرمین مولانا فضل الرحمان نے اسمبلی میں خطاب کرتے ہوئے بھارتی ظلم و بربریت کی مذمت اور نہتے کشمیریوں کے حوصلوں کو خراج تحسین پیش کرتے ہوئے کہا کہ کشمیر پاکستان کی شہہ رگ ہے اور ایک ایک پاکستانی اپنے کیشمیریوں بھائیوں کے شانہ بشانہ کھڑا ہے۔

اسلام آباد : جمعیت علمائے اسلام کے سربراہ مولانافضل الرحمان نے کہا ہے کہ امریکی صدر ڈونلڈ ٹرمپ کے اقدامات سے ثابت ہوگیا ہے کہ امریکہ مسلمانوں کے لیے کتنی منفی سوچ رکھتا ہے اور امریکہ کی جنگ دراصل عالمِ اسلام کے خلاف تھی۔

وہ قومی اسمبلی میں اظہار خیال کررہے تھے، ان کا کہنا تھا کہ امریکا کی اسلام دشمنی کسی سے ڈھکی چھپی نہیں رہی ہے تاہم اب متنازعہ سوچ رکھنے والے صدر ڈونلڈ ٹرمپ کے منفی اقدامات نے اس بات پر مہر ثبت کردی ہے۔

انہوں نے کہا کہ امریکا کی مسلم دشمنی پالیسی واضح ہے لیکن ڈونلڈ ٹرمپ کے نفرت آمیز اقدامات سے صاف پتہ چلتا ہے کہ امریکا کی جنگ دہشت گردی کے خلاف نہیں بلکہ مسلمانوں کے خلاف تھی جس کا مقصد مسلمانوں کو کمزور کرنا اور نفرت آمیز سلوک کو عام کرنا ہے۔

مولانا فضل الرحمان جو کشمیر کمیٹی کے سربراہ بھی ہیں نے کہا کہ بھارت کشمیریوں پر ظلم و ستم کرکے ان کے حوصلے توڑنا چاہتا ہے لیکن کشمیریوں کے حوصلے بلند اور جواں ہیں جس میں نوجوان حریت پسند برہان وانی کی شہادت کے بعد مزید اضافہ ہو گیا ہے اور کشمیر کی گلی گلی میں پاکستان زندہ باد کے نعرے لگ رہے ہیں۔

ان کا مزید کہنا تھا کہ بھارتی افواج نے چھرے والی بندوقوں سے فائر کرکے ہزاروں کشمیریوں کی بینائی چھینی اور معصوم و نہتے کشمیریوں کا قتل عام کیا اور حریت پسند رہنماؤں کو پابند سلاسل کر کے تحریک آزادی کو کچلنے کی ناکام کوشش کی۔

اسلام آباد: تحریکِ انصاف کے رہنما شاہ محمودقریشی کا کہنا ہے کہ کشمیر تقسیم ہند کا نامکمل ایجنڈا ہے جسے مکمل کرنے کے لیے ہم سب متحد ہیں کیوں کہ مسئلہ کشمیر پر کسی سیاسی جماعت میں کوئی اختلاف نہیں ہے۔

یہ بات انہوں نے کل جماعتی کانفرنس سے خطاب کرتے ہوئے کہی، انہوں نے کہا کہ کشمیر ہماری شہ رگ ہے اور اس مسئلے پر بلائی گئی اہم کانفرنس میں آزاد کشمیر کی حکمراں جماعت کی عدم موجودگی باعثِ شرم ہے۔

شاہ محمود قریشی کا کہنا تھا کہ نہتےکشمیریوں پر بھارت کی مجرمانہ بربریت آج بھی جاری ہے جب کہ برہان وانی کی شہادت کے بعد سےمسئلہ کشمیرکوایک نئی قوت ملی لیکن افسوسناک بات یہ ہے کہ حکومت نےمسئلہ کشمیرکوپسِ پشت ڈال دیا ہے۔

وائس چیئرمین تحریک انصاف نے کانفرنس میں مسلم لیگ ن کی عدم موجود گی پر افسوس کا اظہار کرتے ہوئے کہا کہ مسلم لیگ ن کی عدم موجودگی سے حوصلہ شکنی ہوئی ہے میرادل کہتاہے کہ قائد ایوان راجہ ظفرالحق آج کانفرنس میں آنا چاہتے ہوں گے لیکن راستےمیں کیا رکاوٹ آئی اس پر سوال اٹھانا ہوگا۔

انہوں نے اپنے خطاب میں خدشہ ظاہر کیا کہ آنے والے دنوں میں پانی بڑا مسئلہ بن جائےگا لیکن بدقسمتی سے ہمارے حکمران کسی بھی مسئلے کے حل میں سنجیدہ نظر نہیں آتے آئندہ دنوں میں جنگ اور سیاست کے الگ رنگ ہوں گے جس کے لیے پیشگی تیاری کرنا بے حد ضروری ہے۔

شاہ محمود قریشی نے کہا کہ پاکستانیوں کے دل کشمیریوں کے ساتھ دھڑکتے ہیں ہمارا کشمیریوں سے رشتہ اٹل ہے اور مسئلہ کشمیر کو اقوام متحدہ کی قراردادوں کے مطابق حل کرنے کے لیے جدوجہد جاری رکھیں گے۔

انہوں نے مزید کہا کہ پاکستان کی عوام کسی صورت اپنے کشمیری بھائیوں کی اخلاقی اور سیاسی حمایت سے دستبردار نہیں ہوں گے بلکہ آزادی کے اس سفر میں ہمیں اپنے شانہ بشانہ پائیں گے۔