سرینگر: مقبوضہ کشمیر میں کشیدگی 129 ویں روز بھی برقرار ہے۔ بھارتی فورسز نے گھر گھر تلاشی کے دوران 14 نوجوانوں کو گرفتار کرلیا۔ گرفتاری پر سراپا احتجاج مظاہرین پر آنسو گیس کی شیلنگ بھی کی گئی۔

کشمیری عوام کی مشکلات کم نہ ہوسکیں۔ بھارت کی ریاستی دہشت گردی نے مقبوضہ وادی کے باسیوں کی زندگی اجیرن کردی۔

بھارتی فورسز گھر گھر تلاشی کے بہانے چادر اور چار دیواری کا تقدس پامال کر رہی ہے لیکن انسانی حقوق کے عالمی علمبردارخاموش ہیں۔ بھارتی فورسز نے تلاشی کے دوران 14 نوجوانوں کو بھی گرفتار کرلیا۔

بھارت کے مظالم کے خلاف مقبوضہ کشمیر کے گلی کوچوں میں احتجاج بھی مستقل جاری ہے۔ مظاہرین کو منتشر کرنے کے لیے بھارتی فورسز آنسو گیس کا بے دریغ استعمال کر رہی ہیں۔

دوسری جانب کٹھ پتلی انتظامیہ کی قید میں دختر ملت کی رہنما آسیہ اندرابی کی طبیعت ناساز ہوگئی۔ کشمیری رہنماؤں نے آسیہ اندرابی کا علاج کروانے کا مطالبہ کیا ہے۔ حریت رہنماؤں نے بھارتی فورسز کی وحشیانہ کارروائیوں کے خلاف 17 نومبر تک احتجاج جاری رکھنے کا اعلان کیا ہے۔

واضح رہے کہ امریکا میں ڈونلڈ ٹرمپ کے صدر منتخب ہونے کے بعد پاکستان مسئلہ کشمیر کے حل کے لیے امریکا کی ثالثی کا منتظر ہے۔ مشیر امور خارجہ سرتاج عزیز کا کہنا ہے کہ انتخابی مہم کے بیانات پالیسیوں سے مختلف ہوتے ہیں۔ دہشت گردی کا خاتمہ امریکا اور پاکستان کی پہلی ترجیح ہیں۔ مسئلہ کشمیر پر امریکا کی ثالثی کا خیر مقدم کریں گے۔

انہوں نے کہا کہ ڈونلڈ ٹرمپ کے سامنے کشمیر کا مسئلہ رکھا جائے گا۔

سر نگر : چند روز قبل ہی بھارتی قید سے رہائی پانے والے معروف حریت پسند رہنما یاسین ملک کو بھارتی فوج نے ایک بار پھر گرفتار کر کے نامعلوم مقام پر منتقل کردیا ہے دوسری جانب  میر واعظ عمر فاروق کو بھی ان کے گھر میں نظر بند کر دیا گیا ہے۔

تفصیلات کے مطابق ممتاز کشمیری حریت پسند رہنما یاسین ملک کو ایک بار پھر بھارتی فوج نے گرفتار کر کے نامعلوم مقام پر منتقل کردیا  ہے اور اب تک اُن کے اہل ِ خانہ اور وکلاء کو گرفتاری کی وجوہات سے آگاہ نہیں کیا گیا ہے شدید علیل یاسین ملک کی گرفتاری پر اہلِ خانہ تشویش کا اظہار کر رہے ہیں۔

اسی سے متعلق : کشمیری رہنما یاسین ملک 4ماہ قید کے بعد رہا

واضح رہے ممتاز حریت پسند رہنما یسین ملک کو جولائی کے مہینے میں برہان وانی کی شہادت کے بعد گرفتار کیا گیا تھا جس کے بعد اُن کا رابطہ کسی سے نہ ہو سکا تھا تا ہم ایک ماہ قبل اچانک طبیعت بگڑنے پر بھارت پولیس نے انہیں اسپتال منتقل کیا تھا جہاں غلط انجیکشن لگنے کے باعث ان کا بازو سوج گیا تھا اور حالت مزید ابتر ہو گئی تھی۔

یہ پڑھیے :حریت پسند کشمیر رہنما میر واعظ عمر فاروق اور سید علی گیلانی گرفتار

کچھ عرصے اسپتال میں زیرِ علاج رہنے کے بعد اُن کی طبیعت کچھ بہتر ہوگئی تھی جس کے بعد انہیں رہا کردیا گیا تھا،رہائی کے بعد دیگر حریت پسند رہنماؤں سید علی گیلانی اور میر واعظ عمر فاروق نے یاسین ملک سے ملاقات کی تھی،ملاقات کے دوران تحریکِ آزادی کشمیر میں تیزی لانے لیے نئی حکمتِ عملی کا تعین طے اور نئے اہداف کا تعین کیا گیا تھا۔

یہ بھی پڑھیے : مقبوضہ کشمیر میں بھارتی وزیر اعظم کی آمد، کئی حریت رہنما گرفتار

قابض بھارتی فوج حریت پسندوں کی یکجہتی اور تحریکِ آزادی کشمیر کی مشترکہ جدو جہد کے عزم سے بوکھلاہٹ کا شکار ہو گئی اور علالت کے باعث رہا کیے گئے یاسین ملک کو دوبارہ گرفتار جب کہ میر واعظ عمر فاروق کو ان کے گھر میں نظر بند کردیا گیا۔

نیویارک : پاکستان نے اقوم متحدہ سے ایک بار پھر مقبوضہ کشمیر میں بھارتی بربریت اور مظالم کی تحقیقات کے لیے وفد بھیجنے کا مطالبہ کردیا ہے۔

اقوام متحدہ میں پاکستان کی سفیر ملیحہ لودھی نے ایک بار پھر اقوام متحدہ سے مطالبہ کیا ہے کہ بھارتی مظالم اور ظلم و بربریت کو مانیٹر کرنے کے لیے انسانی حقوق کی خالف ورزی سے متعلق حقائق جاننے والے کمیشن کو مقبوضہ کشمیر بھیجا جائے تا کہ شفاف تحقیقات ہو سکیں۔

یہ مطالبہ اقوام متحدہ میں پاکستان کی سفیر ملیحہ لودھی نے اقوام متحدہ کے ا نسانی حقوق کے کمشنر زید راعد الحسین سے نیویارک میں ہونے والی ایک ملاقات میں کہی۔

انہوں نے کہا کہ پاکستان اقوام متحدہ کی انسانی حقوق سے متعلق کمیٹی کو حقائق جاننے اور انسانی حقوق کی خلاف ورزیوں کو جانچنے کے لیے آزاد کشمیر تک رسائی دینے کے لیے تیار ہے جب کہ بھارت نے فیکٹ فائنڈنگ مشن کو اجازت نہ دے کر مقبوضہ کشمیر میں قابض بھارتی فوج کی طرف سے کیے جا رہے مظالم کو تسلیم کرلیا ہے۔

اپنی ملاقات میں ملیحہ لودھی نے عالمی برادری پر زوردیا کہ وہ کشمیری عوام کے حق خودارادیت کی جدوجہد کی حمایت کرے اور وہاں انسانی حقوق کی خلاف ورزیاں رکوانے میں فیصلہ کن کردار ادا کرے۔

واضح رہے کہ اقوام متحدہ کے انسانی حقوق کے کمشنر زید راعد الحسین کی جانب سے آزاد کشمیر اور مقبوضہ کشمیر میں انسانی حقوق کی خلاف ورزیوں کو جانچنے کے لیے فیکٹ فائنڈنگ کنیشن بھیجنے کے لیے بالترتیب پاکستان اور بھارت سے رسائی چاہی تھی۔

پاکستان نے آزاد کشمیر میں قوام متحدہ کے کمیشن کو رسائی دینے کی یقین دہانی کرادی تھی تا ہم بھارت نے روایتی ہٹ دھرمی کا مظاہرہ کرتے ہوئے مقبوضہ کشمیر تک رسائی دینے سے انکار کردیا تھا۔

لندن : برطانیہ میں مقیم پاکستانی ہائی کمشنر سید ابن عباس کا کہنا ہے کہ بھارت مقبوضہ کشمیر میں انسانی حقوق کی سنگین خلاف ورزی کر رہا ہے مسئلہ کشمیر کے حوالے سے برطانوی پارلیمنٹ بھی اپنا کردارا دا کر رہی ہے۔

اے آروائی نیوز کے نمائندے محمد صلاح الدین سے خصوصی گفتگو کرتے ہوئے برطانیہ میں پاکستانی ہائی کمشنر سید ابن عباس کا کہنا تھا کہ بھارت کی کشمیر میں بین الاقوامی قوانین کی پامالی اور بنیادی انسانی حقوق سے روح گردانی کے عمل سے ہر شخص واقف ہے۔

قابض بھارتی فوج کشمیری مسلمانوں پر انسانیت سوز مظالم ڈھا رہی ہے جس کی جتنی مذمت کی جائے کم ہے،عالمی برادری کوبھارت پر دباؤ ڈال کر کشمیر میں جاری مظالم ختم کرانے کے لیے اپنا کردار ادا کرنا چاہیے۔

انہوں نے اے آر وائی کے نمائندے محمد صلاح الدین کو بتایا کہ برطانوی پارلیمنٹ کشمیری مسلمانوں پر بھارتی جبر کے خلاف آواز اُٹھارہی ہے اور اس حوالے سے اپنا بھرپور کردار بھی ادا کر رہی ہے۔

اس موقع پر انہوں نے بتایا کہ برطانوی وزیراعظم بھارت کے دورے پر جارہے ہیں اور ہمیں امید ہے کہ برطانوی وزیر اعظم دورہ بھارت کے موقع پر مقبوضہ کشمیر میں ہونے والی انسانی حقوق کی سنگین خلاف ورزی کے حوالے سے بھی آواز بلند کریں گے۔

ہائی کمشنر سید ا بن عباس کا مزید کہنا تھا کہ پاکستان نے برطانیہ میں ہر فورم پر بھارتی مظالم کے خلاف آواز بلند کی ہے اور اس کے ساتھ ساتھ برطانوی پارلیمنٹرین سے بھی ملاقاتیں کرکے مقبوضہ کشمیر میں ہونے والے مظالم سے آگاہ کیا گیا ہے۔