مانچسٹر: پاکستانی نژاد برطانوی باکسر عامر خان کو ان کے پرانے حریف اور برطانوی باکسر کیل بروک نے شکست دے دی ہے۔
تفصیلات کے مطابق مانچسٹر ارینا میں ہونے والے مقابلے میں باکسرعامرخان کو کیریئر کی40ویں فائٹ میں ناکامی کا سامنا کرنا پڑا، کیل بروک نے عامرخان کےخلاف فائٹ ٹیکنیکل ناک آؤٹ کی بنیاد پر جیت لی۔
بارہ راؤنڈز پر مشتمل یہ فائٹ چھٹے ہی راؤنڈ میں اس وقت ختم ہو گئی جب عامر خان اپنا دفاع کرنے میں مسلسل ناکام رہے اور ریفری وکٹر لوگلین نے آگے بڑھ کر فائٹ ختم ہونے کا اشارہ کیا۔
مانچسٹر ارینا میں ہونے والی فائٹ میں پاکستانی شائقین بڑی تعداد میں عامر خان کو سپورٹ کرنے پہنچے تھے، شکست کے بعد باکسر عامر خان نے مانچسٹر ارینا آئے مداحوں کا شکریہ ادا کرتے ہوئے کہا کہ وہ میچ کےدوران زبردست سپورٹ پر شائقین کے شکر گزار ہیں۔
میچ سے قبل اے آر وائی کا نمائندہ خصوصی زاہد نور سے گفتگو میں عامر خان کا کہنا تھا کہ اپنی جیت کےلیےپُر اعتماد ہوں،فینز بہت پیار دے رہے ہیں ان کاشکر گزارہوں۔
عامرخان کا کہنا تھا کہ دو سال بعد کسی مقابلےمیں اتر رہاہوں،یہ میرے کیئریئر کی ایک بڑی فائٹ ہے، فینز دعاکریں فتح میری ہی ہو،فائٹ کے بعد پاکستان کادورہ کروں گا اور انٹرنیشنل باکسرز بھی پاکستان لےکرجاؤں گا۔
پاکستانی نژاد برطانوی باکسر کا مزید کہنا تھا کہ پاکستان میں باکسنگ کے مقابلےکرائیں گے، پاکستان میں باکسنگ کے فروغ کیلئےمدد پر وزیراعظم کا شکرگزارہوں،عامرخان باکسنگ اکیڈمی،جم میں کام بھرپور طریقےسےجاری ہے، پاکستان میں باکسنگ کے فروغ کیلئے پوری کوشش کروں گا۔
