اسلام آباد : اٹارنی جنرل خالد جاوید خان نے کہا ہے کہ ہمیں نئے عدالتی سال میں اپنی ترجیحات کا تعین کرنا ہوگا، انصاف کی فراہمی میں تاخیر پر فوری توجہ کی ضرورت ہے۔
ان خیالات کا اظہار انہوں نے اسلام آباد میں نئے عدالتی سال کی افتتاحی تقریب سے خطاب کرتے ہوئے کیا، انہوں نے کہا کہ نظام میں خامیوں کے باعث وائٹ کالر کرائم کا ارتکاب کرنے والے قانون کی گرفت سے بچ کر نکلنے میں کامیاب ہوجاتے ہیں۔
انہوں نے کہا کہ نئے عدالتی سال میں اپنی ترجیحات کا تعین کرنا ہوگا، انصاف کی فراہمی میں تاخیر بنیادی مسئلہ ہے، انصاف میں تاخیر پر فوری توجہ کی ضرورت ہے۔
خالد جاوید خان کا کہنا تھا کہ نئی ٹیکنالوجی کے استعمال کیلئے افرادی قوت کے ساتھ ساتھ قانونی اور انتظامی اصلاحات کی بھی فوری ضرورت ہے، چیف جسٹس ان معاملات کو عدالتی پالیسی ساز کمیٹی میں فوری اٹھائیں۔
اٹارنی جنرل کا اپنے خطاب میں مزید کہنا تھا کہ معیاری انصاف کی فراہمی معیاری بینچ اور بار کی مرہون منت ہے، بینچ کا سب سے بڑا انحصار بار پر ہوتا ہے۔
