کوئٹہ : بلوچستان ہائیکورٹ نے سابق مشیر خزانہ خالد لانگو کی درخواست ضمانت مسترد کردی۔
بلوچستان ہائیکورٹ میں سابق مشیر خزانہ خالد لانگو کی درخواست ضمانت کی سماعت ہوئی، سماعت کے دوران خالد لانگو کے وکلاء کی جانب سے مؤقف اختیار کیا گیا کہ خالد لانگو نیب کی تحویل میں نوے روز ریمانڈ پر رہے، اب وہ جوڈیشل ریمانڈپر جیل میں ہیں۔
وکلاء کا کہنا ہے کہ نیب کی تفتیش آگے نہیں بڑھ رہی نہ اب تک خالد لانگو پر کوئی الزام ثابت ہوا ہے، خالد لانگو طبیعت بھی ناساز ہے اس لئے عدالت انھیں ضمانت پر رہا کرنے کے احکامات جاری کرے۔
سماعت میں نیب کے وکیل نے مؤقف اختیار کیا کہ میگا کرپشن کیس انتہائی اہم ہے تفتیش کا دائرہ کار بڑھتا جا رہا ہے، انتہائی محتاط انداز میں تفتیش کو آگے بڑھایا جا رہا ہے۔
عدالت نے فریقین کے دلائل سننے کے بعد خالد لانگو کی درخواست ضمانت مسترد کردی۔
مزید پڑھیں : مشیر خزانہ بلوچستان میرخالد لانگو کو عدالت سے گرفتار کر لیا گیا
یاد رہے کہ خالد لانگو کو پچیس مئی دوہزار سولہ کو مشتاق رئیسانی میگا کرپشن کیس میں گرفتار کیا گیا تھا، مشتاق احمد رئیسانی کے گھر سے 63 کروڑ روپے اور لاکھوں مالیت کے سونا برآمد ہوا تھا۔
خیال رہے سابق سیکرٹری خزانہ مشتاق رئیسانی کی گرفتاری کے بعد مشیر خزانہ میرخالد لانگو نے استعفیٰ دیتے ہوئے خود کو تفتیش کے لیے پیش کیا تھا، جس کے بعد نیب نے ان کے تین بار سمن جاری کیے،تاہم وہ پیش نہیں ہوئے اور روپوش ہوگئے اور اچانک اسلام آباد ہائی کورٹ میں پیش ہوکر عبوری ضمانت منظور کروائی تھی۔
