اسلام آباد : ملک میں بیرونی سرمایہ کاری راغب کرنے کے نام پر سرکاری دوروں کے لئے وزیر اعظم کی فلائٹ میں بیسیوں کھانوں کا انتظام کیا جارہا ہے۔لاکھوں روپے کے اضافی اخراجات اور قوم کی خدمت کے نام پر پر تعیش کھانوں کے مختلف دور چلیں گے۔
تفصیلات کے مطابق عام مسافروں کو خراب کھانے فراہم کرنے والی پی آئی اے انتظامیہ نے بہترین انتظامات کی تیاریاں مکمل کرلی ہیں۔
ذرائع کا کہنا ہے کہ وزیر اعظم نواز شریف کے اگلے ہفتے ازبکستان کے دورے کے موقع پر پی آئی کی جانب سے بے شمار کھانوں کی اقسام اور میٹھے، مشروبات وغیرہ کا خصوصی انتظام کیا گیا ہے۔
وزیر اعظم کی پرواز جو 32 بزنس کلاس اور 84 اکانومی کلاس کی سیٹوں پر مشتمل ہے، منگل کو اسلام آباد سے روانہ ہوکر اسی دن تاشقند پہنچ جائے گی۔
بدھ کو فلائٹ تاشقند سے روانہ ہوکر سمرقند پہنچے گی۔ اس موقع پر کھانے کے خصوصی انتظامات کئے گئے ہیں اور پی آئی اے نے متعلقہ افسران کو ہدایات دی ہیں کہ وہ خصوصی طور پر ان کھانوں کو سیکورٹی انتظامیہ، ڈاکٹروں کی نگرانی میں تیار کروائے۔
ان کھانوں میں بار بی کیو چکن بوٹی، چکن سیخ کباب، فرائڈ رائس، کشمیری پلاوٴ، مٹن کڑاہی بون لیس، چکن کنگ پاوٴ، اسٹیم رائس، سبزی کی بھجیا، چکن پیٹیز، چکن ہرا مسالا، سبزی گوشت، فرائڈ فش، ملائی کباب، سینڈوچ، فروٹ، مشروبات اور دیگر ان گنت لوازمات شامل ہیں۔
یاد رہے کہ پی آئی اے مسافروں کو خراب کھانے دینے کے باعث گزشتہ دنوں سخت تنقید کا شکار رہی ہے اور انتظامیہ کی جانب سے مسلسل خسارے کا رونا بھی رویا جاتا ہے تاہم ایسے دوروں کے موقع پر خصوصی انتظامات کو دیکھ کر انتظامیہ کے ایسے کسی بھی تاثر کی نفی ہوجاتی ہے۔
خبر نشر ہونے پر ترجمان وزیر اعظم ہاؤس کی وضاحت
علاوہ ازیں اے آروائی نیوز کی خبر پر وزیر اعظم ہاؤس نے نوٹس لے لیا، جواب میں ترجمان وزیر اعظم ہاؤس کاکہناہے پی آئی اے کوکھانوں کامعیار بہتر کرنےکی ہدایت دیں ہیں۔
ترجمان نے کہا کہ وزیر اعظم کےدورہ ازبکستان کیلئےکھانےسےمتعلق ہدایات نہیں دیں،صرٖف کھانوں کامعیاربہترکرنےکاکہاگیاہے لیکن ترجمان نےیہ نہیں بتایا کہ فضائی سفر میں پینتیس ڈشز ہوں گی یانہیں۔
