لاہور : مسلم لیگ ن کے رہنما خواجہ سعد رفیق نے کہا کہ عارف علوی کامیاب ہوئے تو اس کا سہرا آصف زرداری کے سرجائے گا، پیپلزپارٹی مضبوط اپوزیشن کی راہ میں رکاوٹ بنی ہوئی ہے۔
تفصیلات کے مطابق مسلم لیگ ن کے رہنما خواجہ سعد رفیق نے صدارتی انتخاب کے موقع پر میڈیا سے گفتگو کرتے ہوئے کہا پیپلزپارٹی بڑی سیاسی جماعت ہے، میں ان کی اندرونی سیاست پر بات نہیں کرنا چاہتا، پی پی مضبوط اپوزیشن کی راہ میں رکاوٹ بنی ہوئی ہے۔
سعدرفیق کا مزید کہنا تھا عارف علوی کامیاب ہوئے تو اس کا سہرا آصف زرداری کے سرجائے گا۔
اس سے قبل رہنما رانا ثنا اللہ نے میڈیا سے گفتگو کرتے ہوئے کہا کہ پیپلز پارٹی کا کردار حکومت کے سہولت کار کا ہے اور پیپلز پارٹی آئندہ ایسا ہی کردار ادا کرتی رہے گی۔
راناثنااللہ کا کہنا تھا کہ اعتزاز احسن کا نام دینا جمہوری اصولوں کی خلاف ورزی تھی ، تقاضا تھا تمام جماعتیں بیٹھ کر امیداور کا فیصلہ کرتیں ، آج واضح ہوجائے گا اپوزیشن کون ہے، اپوزیشن وہی ہے جو آج مولانافضل الرحمان کو سپورٹ کررہی ہے۔
یاد رہے متفقہ صدارتی امیدوار کے معاملے میں اپوزیشن کے درمیان آخری وقت تک ڈیڈلاک برقرار رہا، آصف زرداری نے پیپلزپارٹی کے امیدار اعتزاز احسن کو دستبردار کرانے سے انکار کر دیا تھا جبکہ مسلم لیگ ن مولانا فضل الرحمان کے نام پر ڈٹ گئی تھی، جس کے بعد پی ٹی آئی کے عارف علوی کے صدر بننے کا امکانات روشن ہوگئے۔
خیال رہے ملک کے 13ویں صدر کے انتخاب کے لیے پولنگ کا آغاز ہوگیا ہے، ملک کی قومی، چاروں صوبائی اسمبلیوں اور سینیٹ میں صدارتی انتخاب کے سلسلے میں ووٹ ڈالے جائیں گے۔
پولنگ صبح دس بجے سے شام چار بجے تک جاری رہے گی۔
صدارتی الیکشن کے سلسلے میں سینیٹ سمیت قومی اور صوبائی اسمبلیوں کو پولنگ اسٹیشنز میں تبدیل کردیا گیا ہے۔ پولنگ میں 1121 ارکان پارلیمان حصہ لیں گے۔
