اسلام آباد: عالمی عدالت انصاف میں کلبھوشن یادیو کے کیس میں پاکستان کے وکیل خاور قریشی نے کہا ہے کہ کلبھوشن کہیں نہیں جا رہا۔ وزارت خارجہ اس معاملے پر تفصیلی بیان جاری کرے گی۔
تفصیلات کے مطابق وفاقی دارالحکومت اسلام آباد میں سپریم کورٹ کے باہر صحافیوں سے گفتگو کرتے ہوئے وکیل خاور قریشی کا کہنا تھا کہ بھارتی جاسوس کلبھوشن کہیں نہیں جارہا۔ وزارت خارجہ اس معاملے پر تفصیلی بیان جاری کرے گی۔
ان کے مطابق عالمی عدالت کلبھوشن کو رہا کرنا نہیں چاہ رہی۔
مزید پڑھیں: خاور قریشی بھارت کے وکیل
خاور قریشی کی گفتگو کے دوران ان کے عملے کی صحافیوں سے تلخ کلامی بھی ہوئی۔ عملے کے ایک رکن نے ایک صحافی کا موبائل فون بھی توڑ دیا جس پر صحافیوں نے شدید احتجاج کیا۔
یاد رہے کہ عالمی عدالت انصاف نے 18 مئی کو کلبھوشن یادیو کے کیس میں اپنا فیصلہ سنایا تھا۔
فیصلے میں کہا گیا تھا کہ بھارت عالمی عدالت کو کیس کے میرٹ پر مطمئن نہیں کر پایا، پاکستان بھارت کو کلبھوشن تک قونصلر رسائی دے اور امید ہے کہ پاکستان کی جانب سے عالمی عدالت کا مکمل فیصلہ آنے تک سزا نہیں دی جائے گی۔
