لاہور : عدالت نے ہنجر وال میں 4بچیوں کے اغوا کیس میں 5ملزمان کو 14روزہ جوڈیشل ریمانڈ پر جیل بھیج دیا، ملزمان کا کہنا ہے کہ ہم نے کوئی جرم نہیں کیا ، ہمیں بچیوں کی مدد کرنے کی سزا مل رہی ہے۔
تفصیلات کے مطابق ہنجر وال میں 4بچیوں کے اغوا کیس کی ضلع کچہری میں سماعت ہوئی ، پانچوں ملزمان کو عدالت میں پیش کیا گیا ، دوران سماعت تفتیشی افسر نے بیان میں کہا ملزمان سے تفتیش مکمل ہو چکی ہے ،ملزمان کے مزید جسمانی ریمانڈ کی ضرورت نہیں۔
جس کے بعد عدالت نے 5ملزمان کو 14روزہ جوڈیشل ریمانڈ پر جیل بھیج دیا، ملزمان میں شوکت ، شہزاد ، محمد قاسم، نعیم اور آصف شامل ہیں۔
سماعت کے بعد ملزمان نے میڈیا سے گفتگو کرتے ہوئے کہا کہ ہم بے گناہ ہیں ہم نے بچیوں کی مدد کی تھی ، ہم لڑکیوں کو فروخت نہیں کرنا چاہتے تھے ، بچیاں خود گھر سے بھاگ کر آئی تھیں اور اپنے گھر واپس جانا نہیں چاہتی تھیں، ہم نے خود پولیس کو15 پر اطلاع دی تھی۔
ملزم قاسم کا کہنا تھا کہ ہمیں بچیوں کی مدد کرنے کی سزا مل رہی ہے، ہم نے کوئی جرم نہیں کیا ، ہم بچیوں کو محفوظ مقام پر رکھنا چاہتے تھے، اس لئے ساہیوال لے کر گئے۔
یاد رہے تفتیشی افسر نے بتایا تھا کہ ایک بچی سے زیادتی کا خدشہ ہے ، کیس میں ڈی این اے رپورٹ کا انتظار ہے، ملزمان 4 بچیوں کو اغوا کرلے لاہور سے ساہیوال لے گئے، وہ بچیوں کو جسم فروشی کیلئے فروخت کرنا چاہتے تھے ، بچیوں کی عمریں 12سے 14سال کے درمیان ہیں۔
