ARYNews.tv | Urdu – Har Lamha Bakhabar

Tag: KILLED

  • غزہ: اسرائیلی فورسز کی فائرنگ، ایک فلسطینی شہید، 6 زخمی

    غزہ: اسرائیلی فورسز کی فائرنگ، ایک فلسطینی شہید، 6 زخمی

    غزہ: فلسطین میں اسرائیلی جارحیت تھم نہ سکی، فورسز کی نہتے فلسطینیوں پر فائرنگ کے نتیجے میں ایک نوجوان شہید جبکہ چھ افراد زخمی ہوگئے۔

    تفصیلات کے مطابق غزہ میں اسرائیلی فوج نے آج بھی بلااشتعال فائرنگ کرکے ایک فلسطینی کو شہید کردیا جبکہ چھ شدید زخمی ہیں۔

    غیر ملکی خبر رساں ادارے کے مطابق غزہ کی سرحدی پٹی پر ایک بار پھر اسرائیلی فوج نے پرامن مظاہرین پر گولیوں کی بوچھاڑ کردی، فائرنگ کی زد میں آکر چھبیس سالہ کرام فیاض شہید اور چھ افراد زخمی ہوگئے۔

    اسرائیلی جارحیت کے خلاف فلسطینیوں کا یہ ہفت روزہ احتجاج تیس مارچ سے جاری ہے، پرامن احتجاج کےدوران اسرائیلی فوج کی فائرنگ سے شہید ہونیوالوں کی دوسو اکیس تک پہنچ گئی ہے۔

    غزہ: اسرائیلی فوج کی فائرنگ، فلسطینی نوجوان شہید، صحافی سمیت 25 افراد زخمی

    قبل ازیں گذشتہ ہفتے بھی غزہ میں اسرائیلی فوج نے فائرنگ کرکے 16 سالہ لڑکا شہید کردیا تھا جبکہ بلااشتعال فائرنگ کے نتیجے میں صحافی سمیت 25 فلسطینی زخمی بھی ہوئے تھے۔

    خیال رہے کہ مقبوضہ فلسطین پر قابض غاصب صیہونی ریاست کے جابرانہ تسلط کے باعث بے گھر و بے سہارا ہونے والے فلسطینی شہریوں کی امداد کرنے والا عالمی ادارہ خوراک بھی اسرائیلی نقش قدم پر گامزن ہوگیا ہے۔

    گذشتہ ہفتے اقوام متحدہ کے عالمی ادارہ خوراک نے بے سہارا فلسطینیوں کو فراہم کی جانے والی خوراک بند کرنے کا اعلان کیا تھا۔

  • افغانستان: اتحادی افواج کا فضائی حملہ، داعش کا ترجمان ہلاک

    افغانستان: اتحادی افواج کا فضائی حملہ، داعش کا ترجمان ہلاک

    کابل: افغانستان میں اتحادی افواج کے فضائی حملے میں داعش کا ترجمان صل عزیز اعظم ہلاک ہوگیا۔

    تفصیلات کے مطابق اتحادی افواج کی جانب سے فضائی حملہ افغان مشرقی صوبے ننگرہار میں کیا گیا جس کے نتیجے میں عسکریت پسند تنظیم داعش کا ترجمان صل عزیز اعظم ہلاک ہوا۔

    غیر ملکی خبر رساں ادارے کا کہنا ہے کہ صل عزیز عراق اور شام میں بحیثیت داعش کا ترجمان کام کرتا تھا، اس دہشت گرد گروہ میں اسے مرکزی رہنماؤں کی حیثیت بھی حاصل تھی۔

    حکام کے مطابق ہلاک دہشت گرد عام لوگوں کو ہائی پروفائل حملوں کے لیے داعش میں بھرتی کرتا تھا، اور متعدد عام شہریوں کی ہلاکتوں میں بھی ملوث رہا ہے۔

    دوسری جانب داعش نے اب تک صل عزیز کی ہلاکت کی تصدیق نہیں کی، جبکہ صوبہ ننگرہار میں داعش اور طالبان کی جانب سے متعدد حملے کیے جاچکے ہیں، جس کے باعث اب تک سیکڑوں سیکیورٹی اہلکار ہلاک اور کئ سو زخمی ہوچکے ہیں۔

    افغانستان: سرکاری عمارت پر حملہ، 43 افراد ہلاک، 20 سے زائد زخمی

    خیال رہے کہ دو روز قبل افغانستان میں سرکاری عمارت پر دہشت گرد حملے کے نتیجے میں 43 افراد ہلاک اور بیس سے زائد زخمی ہوگئے تھے۔

    بعد ازاں سیکیورٹی فورسز کی جوابی کارروائی میں تینوں حملہ آور مارے گئے تھے۔

    واضح رہے کہ مذکورہ دہشت گرد حملہ ایک ایسے وقت میں کیا گیا کہ جب طالبان اور امریکا کے درمیان مذاکرات جاری ہیں، اور دونوں فریقین کی جانب سے مثبت تاثر سامنے آرہا ہے۔

  • شیخو پورہ: ذاتی رنجش پر 2 معصوم بچوں کا لرزہ خیز قتل

    شیخو پورہ: ذاتی رنجش پر 2 معصوم بچوں کا لرزہ خیز قتل

    شیخوپورہ: صوبہ پنجاب کے ضلع فیروز وٹواں میں اغوا کیے جانے والے 2 کم سن بھائی بہن کو قتل کردیا گیا، قتل ذاتی رنجش کا نتیجہ نکلا۔

    تفصیلات کے مطابق افسوسناک واقعہ شیخوپورہ کے ضلع فیروز وٹواں میں پیش آیا جہاں ملزمہ نے اپنے سابق منگیتر کے بچوں کو قتل کردیا۔

    پولیس کا کہنا ہے کہ ملزمہ نبیلہ کی بچوں کے والد سے چند سال قبل منگنی ہوئی تھی جو بعد میں ٹوٹ گئی۔

    ملزمہ نے انتقام کی آگ بجھانے کے لیے سابق منگیتر کے بچوں کو اس وقت اغوا کیا جب وہ اپنے ننھیال جڑانوالہ آئے تھے۔

    پولیس کے مطابق 2 سالہ خدیجہ اور 3 سالہ توحید کو ملزمہ نے اپنے 2 ساتھیوں کے ساتھ مل کر اغوا کیا اور بعد ازاں موت کے گھاٹ اتار دیا۔

    پولیس نے کارروائی کرتے ہوئے نبیلہ سمیت 4 افراد کو گرفتار کرلیا جہاں ملزمہ نے بچوں کی لاشیں نہر میں پھینکنے کا اعتراف کرلیا۔

    ملزمہ کے اعتراف کے بعد غوطہ خوروں کی مدد سے نہر میں بچوں کی لاشیں تلاش کی جارہی ہیں۔

    وزیر اعلیٰ پنجاب کا نوٹس

    وزیر اعلیٰ پنجاب عثمان بزدار نے بچوں کے اغوا اور قتل کا نوٹس لیتے ہوئے آئی جی پنجاب سے رپورٹ طلب کرلی۔

    وزیر اعلیٰ نے ہدایت کی کہ بچوں کے قتل میں ملوث ملزمان کے خلاف کارروائی کی جائے اور مقتول بچوں کے لواحقین کو ہر صورت انصاف فراہم کیا جائے۔

  • فرانس: کرسمس بازار میں فائرنگ کرنے والا حملہ آور ہلاک، حکام کی تصدیق

    فرانس: کرسمس بازار میں فائرنگ کرنے والا حملہ آور ہلاک، حکام کی تصدیق

    پیرس: فرانس میں پولیس نے اہم کارروائی کرتے ہوئے کرسمس بازار میں فائرنگ کرنے والے حملہ آور کو ہلاک کردیا۔

    تفصیلات کے مطابق گذشتہ روز فرانس کے شہر اسٹراسبرگ میں قائم کرسمس بازار میں فائرنگ ہوئی تھی جس کے باعث تین افراد ہلاک ہوگئے تھے۔

    غیر ملکی خبر رساں ادارے کے مطابق فائرنگ میں ملوث حملہ آور کو پولیس نے دوران کارروائی ہلاک کردیا، اور حکام نے بھی واقعے کی تصدیق کردی۔

    پولیس کا کہنا ہے کہ حملہ آور کی تلاش کے لیے حملے کے بعد سے ہی چھاپے مارے جارہے تھے، فائرنگ کرنے والا شخص اسٹراسبرگ کے علاقے نودریف میں اہم آپریشن کے دوران ہلاک ہوا۔

    خیال رہے کہ گذشتہ روز فائرنگ کا واقعہ فرانسیسی شہر اسٹراسبرگ میں پیش آیا تھا جہاں کرسمس بازار میں نامعلوم شخص نے فائرنگ کرکے دو افراد کو ہلاک جبکہ 6 کو زخمی کردیا تھا۔

    فرانس: کرسمس بازار میں فائرنگ، 3 افراد ہلاک، 12 زخمی

    بعد ازاں سیکیورٹی فورسز اور پولیس نے ملزم کی گرفتاری کے لیے پیچھا کیا اور اس دوران پولیس اور ملزم کے درمیان فائرنگ کا تبادلہ بھی ہوا تھا۔

    یاد رہے کہ گذشتہ سال جولائی میں فرانس کے دارالحکومت پیرس میں حملہ آور کی فائرنگ سے پولیس کا ایک اہلکار ہلاک جبکہ دو زخمی ہوگئے تھے۔

    واضح رہےکہ 2015 کے آغاز سے فرانس میں دہشت گرد حملوں میں 230 سے زائد افراد ہلاک ہو چکے ہیں، جبکہ سینکڑوں افراد ان حملوں میں زخمی بھی ہوئے ہیں۔

  • امریکی خاتون نے اپنے وزن سے محبوب کو قتل کردیا

    امریکی خاتون نے اپنے وزن سے محبوب کو قتل کردیا

    دنیا بھر میں مجرمان قتل کےلیے الگ الگ آلات استعمال کرتے ہیں، لیکن امریکا میں ایک بھاری بھرکم خاتون نے اپنے محبوب کو عجیب طریقے سے قتل کردیا۔

    امریکی ریاست پنسلوانیا میں پولیس نے ایک خاتون کو قتل کے الزام میں عدالت میں پیش کیا، جس پر الزام ہے کہ اس نے اپنے محبوب کو اپنے وزن تلے دبا کر قتل کیا ہے۔

    امریکی عدالت نے ونڈی تھامس نامی خاتون پر مقتول کینو بٹلر کو دم گھونٹ کر قتل کرنے کے الزام میں فرد جرم عائد کی  اور واردات کو تیسرے درجے کا قتل قرار دیا ہے۔

    پولیس کا کہنا ہے کہ44 سالہ ونڈی تھامس کا 18 مارچ کو اپنے محبوب سے جھگڑا ہوا تھا جس پر خاتون نے پہلے چھری سے کینو کا ہاتھ کاٹا پھر میز کا پایا اس کے سر پر دے مارا۔

    امریکی پولیس کا کہنا ہے کہ بھاری بھرکم خاتون مقتول کے زمین پر گرتے ہی اپنے سے نصف وزن کے کینو کے چہرے پر لیٹ گئی جس کے باعث اس کا دم گھٹ گیا۔

    غیرملکی خبر رساں ادارے کا کہنا ہے کہ کینو بٹلر کا وزن محض 54 کلو ہےجبکہ ونڈی تھامس ڈیڑھ سو کلو وزن کی حامل خاتون ہے۔

    پولیس کا کہنا ہے کہ عدالت کی جانب سے فربہ خاتون کو غیر ارادی طور پر تیسرے درجے کا قتل کرنے کے جرم میں 18 سے 36 برس قید کی سزا دئیے جانے کا امکان ہے۔

    غیر ملکی خبر رساں ادارے کا کہنا ہے کہ ونڈی نے عدالت میں اقرار جرم کرتے ہوئے بتایا کہ ’واردات کے وقت میں شراب کے نشے تھی اورمیری کینو سے کوکین خریدنے پربحث ہورہی تھی۔

    ونڈی تھامس نے بتایا کہ ’میں نے نشے کی حالت میں کینو پر چھری اور میز کے پائے سے حملہ کیا اور سینے کے بل مقتول کے چہرے پر لیٹ گئی اور کچھ دیر بعد کینو کی سانس رک گئی اور وہ ہلاک ہوگیا‘۔

    ملزمہ کا کہنا تھا کہ ’میں نے ارادی طور پر اپنے محبوب کو قتل نہیں کیا، مجھے نشہ اترنے کے بعد احساس ہوا کہ میں نے کیا کردیا‘۔

    خاتون کے وکیل نے عدالت کو بتایا کہ 44 سالہ کینو بٹلر کا قتل محض ایک حادثہ تھا، میری موکل نشے کے باعث خود کو سنبھال نہ سکی اور مقتول پر گرگئی اورمقتول کی موت دم گھٹنے کے باعث واقع ہوئی۔

  • شام: اہم داعش کمانڈر فضائی حملے میں ہلاک، اتحادی فورسز کا دعویٰ

    شام: اہم داعش کمانڈر فضائی حملے میں ہلاک، اتحادی فورسز کا دعویٰ

    دمشق : اتحادی افواج نے شام میں داعش کمانڈر کو فضائی حملے میں ہلاک کرنے کا دعویٰ کردیا، داعشی کمانڈرامریکی رینجر کے سابق اہلکار پیٹرکیسگ کے قتل میں ملوث تھا۔

    تفصیلات کے مطابق امریکی اتحادی افواج نے کئی برسوں سے شام میں برسرپیکار دہشت گرد تنظیم داعش کے سینئر کمانڈر ابوالعمریان کو فضائی حملے میں قتل کرنے دعویٰ کیا ہے۔

    امریکی اتحادی افواج کے ترجمان کا کہنا ہے کہ ابو العمریان امریکی امدادی کارکن کے قتل میں ملوث تھا۔

    غیر ملکی خبر رساں ادارے کا کہنا ہےکہ عالمی دہشت گرد تنظیم نے تاحال کمانڈر کی ہلاکت کی تصدیق یا تردید نہیں کی ہے۔

    اتحادی افواج کے ترجمان کا کہنا ہے کہ اتحادی فورسز کو شام کے جنوب مشرقی حصّے صحرائے بیدایاہ میں داعشی کمانڈر کی ساتھیوں کے ہمراہ موجودگی کی خفیہ اطلاع موصول ہوئی تھی۔

    غیر ملکی خبر رساں ادارے کا کہنا ہے کہ کیسگ پیٹر کو داعش کے دہشت گردوں نے سنہ 2013 میں شامی علاقے دیر الروز سے اغواء کرکے نومبر 2014 میں سفاکانہ طریقے سے قتل کرکے ویڈیو سوشل میڈیا پر شیئر کردی تھی۔

    برطانوی خبر رساں ادارے کا کہنا ہے کہ کیسگ پیٹر امریکی رینجرز کا اہلکار تھا جس نے سنہ 2004 میں عراق میں خدمات انجام دیں تھیں اور سنہ 2012 میں لبنان منتقل ہوگیا تھا تاکہ اسپتالوں میں ضاکارانہ طور پر شامی مہاجرین کا علاج کرسکے۔

    غیر ملکی میڈیا کے مطابق امریکی سینٹر کمانڈ (سینٹ کام) نے پیر کے روز صحرائے بیدایاح میں متعدد داعشی دہشت گردوں کے امریکی حملے میں ہلاک ہونے کی تصدیق کی تھی۔

    سینٹ کام کا کہنا ہے کہ داعشی کمانڈر العمریان اتحادی افواج کے لیے خطرہ تھا جو امریکی شہری و سابق رینجراہلکار کیسگ پیٹر سمیت کئی مغربی شہریوں کے قتل میں ملوث تھا۔

    برطانوی میڈیا کا کہنا ہے کہ 26 سالہ کیسگ پیٹر نے سنہ 2012 میں انسانی حقوق کےلیے کام کرنے والی ایک تنظیم بنائی تھی جو شامی مہاجرین کے لیے امدادی کام کرتی تھی، بعدازاں پیٹر نے اسلام قبول کرکے اپنا نام عبدالرحمٰن رکھ لیا تھا۔

    غیر ملکی میڈیا کا کہنا ہے کہ امریکی شہری نے قتل سےکچھ روز قبل اپنے اہل خانہ کو اسلام قبول کرنے سے متعلق خبر دی تھی۔

    برطانوی میڈیا کا کہنا ہے کہ داعش کی جانب سے دو قیدیوں کے سر قلم کرنے کی ویڈیوز جاری کی گئیں تھی جس میں نقاب پہنے شخص کو قیدیوں کا سر قلم کرتے ہوئے دکھایا گیا تھا۔

    پہلی ویڈیو میں ایک شخص ایلن ہیننگ کا سر قلم کیا گیا تھا جبکہ دوسرے شخص کے بارے میں امریکا نے تصدیق کی تھی کہ یہ امریکی شہری پیٹر کیسگ ہے۔

    واضح رہے کہ امریکی اتحادی فوج نے ایلن ہیننگ کا سر قلم کرنے والے داعش کمانڈر اور برطانوی شخص محمد عماوزی المعروف ’ جان جہادی‘ کو 2015ء میں رقہ میں کیے گئے ڈرون حملے میں مار دیا تھا۔

  • فرانس: مہنگائی کے خلاف پُر تشدد مظاہرے، 80 سالہ خاتون ہلاک

    فرانس: مہنگائی کے خلاف پُر تشدد مظاہرے، 80 سالہ خاتون ہلاک

    پیرس : فرانس میں پیٹرول کے نرخوں میں اضافے کے خلاف جاری احتجاج کے دوران عمر رسیدہ خاتون آنسو گیس سیل لگنے کے باعث ہلاک، ہلاکتوں کی تعداد تین ہوگئی۔

    تفصیلات کے مطابق فرانس میں پیٹرول کے نرخوں میں اضافے کے خلاف شروع ہونے والے احتجاجی مظاہرے مزید شدت اختیار کرگئے، ملک میں بڑھتی ہوئی مہنگائی کے باعث گزشتہ دو ہفتوں سے جاری احتجاج اب عوامی غصے کی صورت اختیار کرچکا ہے۔

    غیر ملکی خبر رساں ادارے کا کہنا ہے کہ احتجاج کرنے والے افراد نے مظاہروں کے دوران توڑ پھوڑ کی اور درجنوں عمارتوں اور گاڑیوں کو نذر آتش کردیا، فرانسیسی شہر مارشیلی میں پولیس نے مظاہرین کو منتشر کرنے کے لیے پانی کی توپ چلائی اور آنسو گیس کے شیل بھی فائر کیے۔

    برطانوی خبر رساں ادارے کا کہنا ہے کہ ہلاک ہونے والے مظاہروں سے متاثرہ علاقے میں واقع ایک رہائشی عمارت میں مقیم تھی اور کھڑکیاں بند کررہی تھی کہ اچانک ایک شیل ان کے چہرے پر آکر لگا جس کے باعث وہ بے ہوگئیں۔

    مقامی خبر رساں اداروں کاکہنا ہے کہ 80 برس کی عمر رسیدہ خاتون کو شدید زخمی حالت میں اسپتال منتقل کیا گیا، جہاں وہ دوران آپریشن زخموں کی تاب نہ لاتے ہوئے ہلاک ہوگئیں۔

    فرانسیسی پولیس کا کہناہے کہ 80 سالہ خاتون سمیت اب تک تین افراد پُر تشدد مظاہروں کے دوران ہلاک سیکڑوں زخمی ہوچکے ہیں۔

    فرانسیسی وزارت داخلہ نے اتوار کے روز بتایا کہ پیٹرول کی قیمتوں میں اضافے کے خلاف تحریک چلانے والےافراد زردرنگ کی جیکٹ پہن کر احتجاج کررہے ہیں اور ملک بھر میں ہونے والے شدید مظاہروں میں تقریباً 1 لاکھ 36 ہزارافرادحصّہ لے رہے ہیں۔

    پولیس اور مظاہرین کے درمیان جھڑپوں میں چارسو افراد گرفتار بھی کیے گئے۔

    غیر ملکی خبر رساں ادارے کا کہنا ہے کہ پرتشدد مظاہروں کی وجہ سے پیرس میدان جنگ میں تبدیل ہونے کے بعد حکام تشویش میں مبتلا ہوگئے ہیں، فرانس کے صدر ایمانویل میکرون نے وزیراعظم کو سیاسی رہنماؤں اور مظاہرین سے مذاکرات کرنے کا حکم دیا ہے۔

    یاد رہے کہ1968کے بعد دارالحکومت میں ہونے والے ان بدترین واقعات میں مظاہرین نے درجنوں گاڑیوں کو نذر آتش اور دکانوں میں لوٹ مار کی وارداتیں کیں۔

  • ٹی وی ریموٹ نہ دینے پر 16سالہ لڑکے نے بڑے بھائی کو قتل کردیا

    ٹی وی ریموٹ نہ دینے پر 16سالہ لڑکے نے بڑے بھائی کو قتل کردیا

    انقرہ : ترک شہر اناتولیہ میں ٹی وی ریموٹ دینے سے انکار پر 16 سالہ لڑکے نے بڑے بھائی کو چاقو کے وار کرکے قتل کر دیا۔

    تفصیلات کے مطابق ترکی کے شہر اناتولیہ میں واقع ایک رہائشی عمارت میں ٹی وی دیکھنے کے لیے دوران چھوٹے بھائی نے بڑے بھائی سے چینل تبدیل کرنے کے لیے ریموٹ مانگا لیکن بڑے بھائی نے ریموٹ دینے سے انکار کردیا جس کے باعث دونوں میں تلخ کلامی ہوگئی۔

    غیر ملکی خبر رساں ادارے کا کہنا ہے کہ دونوں بھائیوں کے درمیان بحث ہوتے ہوتے بات ہاتھا پائی تک پہنچ گئی اور پھر اچانک چھوٹے بھائی نے باورچی خانے سے سبزی کاٹنے والی چھری لاکر بڑے بھائی پر پے در پے وار شروع کردیئے۔

    غیر ملکی میڈیا کا کہنا تھا کہ اہل خانہ 18 سالہ بیٹے کو شدید زخمی حالت میں فوری طور پر استپال لے کر گئے لیکن ڈاکٹرز تمام تر کوششوں کے باوجود زخمی لڑکا زندگی کی بازی ہار گیا۔

    غیر ملکی خبر رساں ادارے کا کہنا ہے کہ 20 نومبر کو پیش آنے والے افسوس ناک واقعے کے بعد پولیس نے قتل کا مقدمہ درج کرنے کے بعد گرفتار کرکے تحقیقات شروع کردی۔

    متاثرہ نوجوان کے اہل خانہ کا کہنا ہے کہ 16 سالہ بیٹا اپنے بڑے بھائی کے ہمراہ کمرے میں بیٹھا ٹی وی دیکھ رہا کہ اچانک دونوں میں جھگڑا ہوگیا، لیکن تلخ کلامی انجام اتنا بھیانک ہوگا اس کا علم نہیں تھا۔

  • مقتول امریکی مبلغ کے اہل خانہ نے قاتل قبائلیوں کو معاف کردیا

    مقتول امریکی مبلغ کے اہل خانہ نے قاتل قبائلیوں کو معاف کردیا

    نئی دہلی : بھارتی جزیرے اندامان کے شمال میں آباد وحشیوں نے امریکی سیاحت کی غرض سے آنے والے امریکی شہری کو قتل کردیا۔

    تفصیلات کے مطابق بھارت کے ساحل سے کئی میل کے فاصلے پر واقع جزیرے  اندامان پر مسیحیت کی تبلیغ کے لیے جانے والا امریکی سیاح جنگلی قبائلیوں کے ہاتھوں قتل ہوگیا، مقتول کے اہل خانہ نے جنگلی قبائل کو معاف کردیا۔

    اندامان کے ڈائریکٹر جنرل پولیس نے بتایا کہ امریکی نوجوان جس کی شناخت ’جان ایلن چاؤ‘ کے نام سے ہوئی ہے سیاحتی ویزے پر بھارت آئے تھے لیکن انہوں نے ممنوعہ علاقے میں تبلیغ کی غرض سے جاکر ثابت کردیا کہ وہ سیاحت نہیں بلکہ مسیحیت تبلیغ کے لیے آئے تھے۔

    غیر ملکی خبر رساں ادارے کا کہنا تھا کہ جان ایلن شمالی جزیرے سینٹنل پر آباد جنگلی قبائل کو تبلیغ کرنے گئے تھے جس کے متعلق انہوں نے بھارتی حکام کو بھی آگاہ نہیں کیا۔

    برطانوی خبر رساں ادارے کا کہنا ہے کہ اندامان کے شمالی حصّے میں واقع جزیرے سینٹنل پر ’وحشی‘ آباد ہیں جنہیں بھارتی حکومت کی جانب سے تحفظ حاصل ہے، سینٹنل کی آبادی محض 200 نفوس پر مشتمل ہے۔

    بھارتی پولیس کا کہنا ہے کہ جان ایلن 15 نومبر کو اپنے مقامی دوست کی مدد سے مذکورہ جزیرے تک جانے کے لیے ایک ماہی گیر سے رابطہ کیا تھا اور جان ایلن کے دوست نے غیر معمولی صورتحال سے نمٹنے کے لیے ایک غوطہ خور بھی فراہم کیا تھا۔

    بھارتی پولیس کے مطابق 16نومبر کو وہ جزیرے کی جانب سے روانہ ہوئے اور سینٹنل سے کچھ فاصلے پر کشتی کو روک کر ڈونگی (چھوٹی کشتی) میں جزیرے پر پہنچے، لیکن جب وہاں زخمی حالت میں واپس لوٹے۔

    پولیس کا کہنا ہے کہ جان ایلن اگلے روز دوبارہ جزیزے پر گئے تاہم اس بار وہ واپس نہیں آئے اور ان کو جزیرے تک لے جانے والے ماہی گیر نے جنگی قبائلیوں کو ان کی لاش گھسیٹے ہوئے دیکھا تھا۔

    برطانوی خبر رساں ادارے کے مطابق امریکی سیاح کے اہل خانہ نے جان ایلن کو قتل کرنے والے جنگلی قبائل کو معاف یہ کہتے ہوئے معاف کردیا ہے کہ جان ایلن خدا سے محبت کرتے تھے اور وہ ضرورت مندوں کی مدد کے لیے ہر وقت تیار رہتے تھے۔

    غیر ملکی خبر رساں ادارے کا کہنا ہے کہ سنہ 2006 میں غیر قانونی طور پر شکار کے لیے جانے والے 2 ماہی گیروں کو وحشیوں نے بے دردی سے قتل کردیا تھا جس کے بعد بھارتی حکام نے مذکورہ جزیرے کا سفر اختیار کرنے پر پابندی عائد کردی تھی۔

    برطانوی خبر رساں ادارے کا کہنا ہے کہ بھارتی جزیرے اندامان کے شمال میں آباد وحشی گذشتہ 60 ہزار برس سے یہاں موجود ہے، جو باہر سے آنے والے افراد کو قتل کرتے دیتے ہیں۔

  • کوئٹہ : نامعلوم موٹرسائیکل سواروں کی فائرنگ، سابق ایس ایس پی جاں بحق

    کوئٹہ : نامعلوم موٹرسائیکل سواروں کی فائرنگ، سابق ایس ایس پی جاں بحق

    کوئٹہ : جی پی او چوک کے قریب نامعلوم موٹر سائیکل سوار افراد کی فائرنگ سے سابق ایس ایس پی نعیم کاکڑ جاں بحق ہوگئے، ملزمان فائرنگ کے بعد فرار ہونے میں کامیاب ہوگئے۔

    تفصیلات کے مطابق کوئٹہ کے علاقے جی پی او چوک کے قریب زرغون روڈ پر نامعلوم موٹر سائیکل سوار دہشت گردوں نے سابق ایس ایس پی نعیم کاکڑ پر گولیاں برسا دیں جس سے وہ زخمی ہوگئے۔

    نعیم کاکڑ مسجد میں نمازِ عشاء پڑھ کر گھر کی طرف جا رہے تھے، گولیاں لگنے سے زخمی سابق پولیس افسر کو سی ایم ایچ منتقل کیا گیا جہاں پر وہ زخموں کی تاب نہ لاتے ہوئے دوران علاج دم توڑ گئے۔

    فائرنگ کرنے والے ملزمان موٹر سائیکل پر سوار تھے جو با آسانی فرار ہونے میں کامیاب ہوگئے، اطلاع ملتے ہی پولیس فورس اور سیکیورٹی اہلکار جائے وقوعہ پر پہنچ گئے اور علاقے کی ناکہ بندی کرتے ہوئے تحقیقات شروع کر دی گئی ہیں۔

    مزید پڑھیں : کوئٹہ میں  بچوں کے ساتھ زیادتی کے مجرم سابق کانسٹیبل کو دو مرتبہ سزائے موت

    ابتدائی تحقیقات کے دوران پولیس کو جائے وقوعہ سے نائن ایم ایم کے پانچ خول ملے ہیں پولیس نے مفرور ملزمان کی تلاش شروع کردی ہے۔