روم : اٹلی کے ایک نائٹ کلب میں مرچوں کے اسپرے کے باعث بھگدڑ مچنے سے 6 افراد ہلاک جبکہ درجنوں زخمی ہوگئے۔
تفصیلات کے مطابق اٹلی کے قصبے کوری نالڈو میں واقع نائٹ کلب میں رات گئے ایک کنسرٹ جاری تھا کہ کنسرٹ کے شرکاء میں بھگدڑ مچ گئی اور لوگ کلب کے ہنگامی دروازے کی جانب بھاگنے لگے۔
غیر ملکی میڈیا کا کہنا ہے کہ نائٹ کلب میں ریپر سپیرا ایباسٹا کا کنسرٹ تھا جس میں 1 ہزار افراد شریک تھے۔
بھگدڑ کے باعث لوگ باہر نکلنے کے لیے بھاگے جس کے باعث وہ گرگئے اور دیگر افراد کے پیروں تلے روندے گئے اور اوپری منزل موجود افراد کے بھاگنے کی وجہ سے مصنوعی طور پر بنائی گئی چھت گر گئی جس کے نیچے کئی دب گئے۔
#Corinaldo (AN) #8dic 1:00, squadre #vigilidelfuoco impegnate nel soccorso in una discoteca. Forse per la dispersione di una sostanza urticante, ragazzi fuggono per il panico calpestandosi. Sei purtroppo quelli deceduti, decine feriti pic.twitter.com/NvII0jD7oe
— Vigili del Fuoco (@emergenzavvf) December 8, 2018
اطالوی خبر رساں ادارے کا کہنا ہے کہ کنسرٹ میں بد نظمی مرچ پاؤڈر کا اسپرے کرنے کے باعث پیدا ہوئی تھی۔
بھگدڑ کے نتیجے میں ہلاک ہونے والے افراد میں تین لڑکیاں اور دولڑکے شامل ہیں جن کی عمریں 14 سے 16 برس ہیں جبکہ ایک 36 سالہ خاتون بھی حادثے میں ہلاک ہوئی ہے جو اپنی بیٹی کے ہمراہ کنسرٹ دیکھنے گئی تھی۔
ریسکیو ادارے کے ترجمان کا کہنا ہے کہ زخمیوں کو فوری طور پر قریبی اسپتال منتقل کردیا گیا تھا، ڈاکٹرز کا کہنا ہے کہ 12 کی حالت تشویش ناک ہے۔
ڈاکٹرز کا کہنا ہے کہ بھگدڑ کے نتیجے میں زیادہ تر زخمیوں کی ہڈیاں ٹوٹ گئی ہیں۔
حادثے میں متاثر ہونے والی ایک 16 سالہ لڑکی کا کہنا ہے کہ ہم کنسرٹ شروع ہونے کے انتظار میں رقص کررہے تھے کہ اچانک عجیب کی بو محسوس ہوئی اور انکھوں میں جلن ہونے لگی۔
زخمی بچی نے بتایا کہ بو اور جلن سے بچنے کے لیے لوگوں نے ہنگامی دروازے کی جانب بھاگنا شروع کردیا۔
خیال رہے کہ یورپ میں عوامی مقامات پر ایسے واقعات رونما ہونا معمول کی بات ہے۔
یاد رہے کہ سنہ 2017 میں اطالوی شہر ٹورن میں فٹبال لیگ کے دوران بم کی جھوٹی افواہ پر بھگدڑ مچ گئی تھی جس کے باعث ایک خاتون ہلاک جبکہ 15 سو افراد زخمی ہوگئے تھے۔
