Tag: king of comedy

کراچی ( ویب ڈیسک ) – آج معروف مزاحیہ فلمی اداکار منورظریف کی برسی ہے انہیں مداحوں سے بچھڑے 39 سال بیت گئے، انہوں نے 300سے زائد فلموں میں اداکاری کے جوہردکھائے۔

منورظریف 2 فروری 1940ء کو گوجرانوالا میں پیدا ہوئے ان کے والد ایک سرکاری آفیسر تھے۔ انہوں نے اپنے بھائی ظریف کی بھری جوانی میں وفات کے بعد محمد منور نے فلمی دنیا میں قدم رکھا اورمنور ظریف کا فلمی نام اختیارکیا۔

منورظریف جب بھی پردہ اسکرین پرنمودارہوتے تو فلم بين ان کی مزاحیہ اداکاری ديکھ کرلوٹ پوٹ ہوجاتے۔ ان کی ہرنئی آنے والی فلم میں لوگوں کے لیے قہقہوں کا وافر مقدار میں سامان ہوتا تھا پرستاران کے ہرفقرے اورہر ادا پرداد کے ڈونگرے برساتے تھے۔ان کے پرستاروں نے انہیں شہنشاہ ظرافت کا خطاب دیاتھا۔

منور ظریف نے جب فلمی دنیا میں قدم رکھا تو اس وقت مزاحیہ اداکاروں میں نرالا، سلطان کھوسٹ، ایم اسماعیل، زلفی ، خلیفہ نزیر اور دلجیت مرزا جیسے کامیڈین فلمی صنعت پر چھائے ہوئے تھے ۔ ان مزاحیہ اداکاروں کے ہوتے ہوئے منور ظریف نے اپنی منفرد مزاحیہ اداکاری سے اپنی جگہ بنائی . سولہ سالہ فلمی کیرئیرمیں تین سوسے زائد اردواور پنجابی فلموں میں اپنی اداکاری کے جوہر دکھائے ۔

انہوں نے اپنے فلمی کیریئر کا آغاز 1961ءمیں فلم ’’دندیاں‘‘سے کیا۔کچھ عرصہ معمولی کردار کرنے کے بعد بالاخر انہیں پنجابی فلم ” ہتھ جوڑی ‘‘سے ایک نیا آغازملا۔ 1964ميں ریلیز ہونے والی فلم ہتھ جوڑی نے انہیں صف اول کے اداکاروں کی فہرست ميں لاکھڑا کيا۔ منور ظریف نے اداکار رنگیلا کے ساتھ جوڑی بنائی جو برصغیر پاک و ہند کی کامیاب ترین مزاحیہ جوڑیوں میں سے ایک سمجھی جاتی تھی۔ پندرہ برسوں میں اس نے 300 سو سے زائد فلموں میں کام کیا ۔ گویا اس کی ہر سال 20 سے 25 فلمیں ریلیز ہوتی تھیں۔

ان کی مشہور فلموں میں بنارسی ٹھگ ، جیرا بلیڈ ، موج میلہ، شوکن میلے دی ، دامن اورچنگاری، چکرباز، ہمراہی، بدتمیز، نوکر ووہٹی دا اوردیگر شامل ہیں۔

منور ظریف لاہور میں قیام پذیر تھے عارضۂ جگر کے سبب زندگی نے انہیں مہلت نا دی اور محض 36 سال کی عمر میں 300 سے زائد فلموں میں لازوال اداکاری کرنے کے بعد 29 اپریل 1976 کو اپنے خالقِ حقیقی سے جاملے۔ آپ لاہور میں بی بی پاک دامن کے مزار سے ملحقہ قبرستان میں آسودۂ خاک ہیں۔