ARYNews.tv | Urdu – Har Lamha Bakhabar

Tag: korangi

  • کراچی : مشتعل شہریوں نے ڈاکو کو جان سے مار ڈالا، دوسرا زخمی

    کراچی : مشتعل شہریوں نے ڈاکو کو جان سے مار ڈالا، دوسرا زخمی

    کراچی : کورنگی میں شہریوں نے دو ڈاکوؤں کو رنگے ہاتھوں پکڑ لیا، مشتعل افراد نے ڈاکوؤں کو شدید تشدد کا نشانہ بنایا جس سے ایک ڈاکو ہلاک اور دوسرا زخمی ہوگیا۔

    اے آر وائی وائی نیوز کی رپورٹ کے مطابق کراچی کے علاقے کورنگی ساڑھے3نمبر کے قریب دو ڈاکو شہریوں سے لوٹ مار کررہے تھے کہ موقع پر موجود لوگونے دونوں ڈاکوؤں کو پکڑ لیا۔

    اس حوالے سے پولیس حکام کا کہنا ہے کہ مشتعل شہریوں کے تشدد سے ایک ڈاکو ہلاک جبکہ دوسرا شدید زخمی ہوا۔

    اطلاع ملتے ہی علاقہ پولیس جائے وقوعہ پر پہنچی اور ہلاک و زخمی ہونے والے ڈاکوؤں کو فوری طور پر اسپتال منتقل کیا۔

    پولیس کے مطابق ہلاک ڈاکو کی شناخت محمد علی اور زخمی کی فیصل کے نام سے ہوئی ہے، زخمی ملزم کے قبضے سے موٹر سائیکل برآمد ہوئی ہے۔

    پولیس کا کہنا ہے کہ دونوں ڈاکو شہریوں سے لوٹ مار کر رہے تھے کہ قریب موجود لوگوں نے دونوں ڈاکوؤں پر قابو پالیا اور پکڑ کر تشدد کا نشانہ بنا ڈالا۔

  • کورنگی میں 21 سالہ نوجوان صہیب کے قتل کی سی سی ٹی وی فوٹیج سامنے آگئی

    کورنگی میں 21 سالہ نوجوان صہیب کے قتل کی سی سی ٹی وی فوٹیج سامنے آگئی

    کراچی میں کورنگی 6 نمبر پر ڈاکوؤں کی فائرنگ سے 21 سالہ نوجوان صہیب کے  قتل کی سی سی ٹی وی فوٹیج سامنے آگئی۔

    تفصیلات کے مطابق گزشتہ روز کورنگی نمبر 6 میں میڈیکل اسٹور پر ڈکیتی کے دوران ڈاکوؤں نے فائرنگ کرکے میڈیکل اسٹور کے مالک کو قتل کردیا تھا۔

    اس افسوسناک واقعے کا مقدمہ مقتول صہیب کے والد کی مدعیت میں درج کیا گیا ہے جس میں قتل اور ڈکیتی کی دفعات شامل ہیں، واقعہ کا مقدمہ تھانہ زمان ٹاؤن میں درج ہے۔

    تاہم اب اس ڈکیتی کے دوران کی سی سی ٹی وی فوٹیج اے آر وائی نیوز نے حاصل کرلی ہے، ویڈیو میں موٹر سائیکل سوار  2 ڈکیت کو میڈیکل اسٹور کے باہر  آتے دیکھا جاسکتا ہے۔

    فوٹیج میں ملزمان کو میڈیکل اسٹور کے اندر لوٹ مار کرتے دیکھا جاسکتا ہے، مقتول صہیب کے والد کو بھی میڈیکل اسٹور کی جانب آتے دیکھا جاسکتا ہے۔

    واردات کے بعد فرار ہوتے ملزمان کو صہیب نے پکڑنے کی کوشش کی لیکن مزاحمت ہوتا دیکھ کر ایک ڈاکو نے صہیب پر فائرنگ کردی، گولی لگتے ہی صہیب شدید زخمی ہو کر زمین پر گر گیا۔

    والدین کا کہنا ہے کہ اسپتال منتقلی کے دوران صہیب راستے میں ہی دم توڑ گیا تھا، مقتول دو بہنوں کا اکلوتا بھائی اور گھر کا واحد کفیل تھا جسے ڈاکوؤں نے موت کے گھاٹ اتار دیا۔

  • کراچی : ٹریلر سے کچل کر ایک اور موٹر سائیکل سوار جاں بحق

    کراچی : ٹریلر سے کچل کر ایک اور موٹر سائیکل سوار جاں بحق

    کراچی : شہر قائد میں ٹریفک حادثات میں 2 افراد زندگی کی بازی ہار گئے، کورنگی انڈسٹریل ایریا میں ایک اور  شخص ٹریلر سے کچل کر جاں بحق ہوگیا۔

    اے آر وائی نیوز کی رپورٹ کے مطابق کورنگی انڈسٹڑیل ایریا گودام چورنگی پر تیز رفتار ٹریلر کی زد میں آکر نوجوان کے جاں بحق ہونے کا واقعہ پیش آیا ہے۔

    حادثے کے بعد پولیس اور امدادی کارکنان جائے وقوعہ پر پہنچے اور جاں بحق ہونے والے شخص کی لاش کو قانونی کارروائی کیلیے جناح اسپتال منتقل کیا۔

    ریسکیوحکام کا کہنا ہے کہ جاں بحق ہونے والے شخص کی شناخت عرفان کے نام سے ہوئی ہے، اہل خانہ کے مطابق متوفی عرفان موٹرسائیکل پر سوار تھا۔

    متوفی کے اہل خانہ کا کہنا ہے کہ عرفان شادی شدہ اور ایک بچے کا باپ تھا جو مقامی گارمنٹ فیکٹری میں درزی کا کام کرتا تھا، متوفی شیریں جناح کالونی کا رہائشی اور کچھ روز قبل عمرہ کرکے واپس آیا تھا۔

    دوسرے واقعے میں کراچی کے علاقے کورنگی نمبر4 پر فائرنگ سے نوجوان کے زخمی ہونے کا واقعہ پیش آیا ہے، پولیس کے مطابق ابتدائی تفتیش میں معلوم ہوا ہے کہ 2 دوستوں میں مذاق کے دوران گولی چل گئی۔

    زخمی نوجوان کی شناخت 18 سالہ دانیال کے نام سے کی گئی ہے جو اپنے ایک دوست کے ہمراہ گرلز کالج کے باہر بیٹھا ہوا تھا۔

    پولیس کا کہنا ہے کہ دونوں میں کسی بات پر مذاق چل رہا تھا کہ اس دوران اچانک فائر ہوگیا اور ایک گولی دانیال کے پاؤں میں جا لگی، فائرکرنے والا ملزم اویس گرفتاری کے خوف سے فرار ہوگیا۔

    مزید پڑھیں : واٹر ٹینکر نے ایک اور موٹر سائیکل سوار کی جان لے لی

    اس سے قبل مانسہرہ کالونی کے قریب واٹر ٹینکر نے ایک موٹر سائیکل سوار کی جان لے لی، ٹریفک حادثے کے بعد موٹر سائیکل سوار کی لاش بہت دیر تک واٹر ٹینکر کے نیچے پھنسی رہی۔

  • کراچی : ڈاکوؤں سے مزاحمت پر ایک اور شہری جان سے چلا گیا

    کراچی : ڈاکوؤں سے مزاحمت پر ایک اور شہری جان سے چلا گیا

    کراچی کے علاقے کورنگی مہران ٹاؤن میں راشن کی دکان پر ڈاکوؤں سے مزاحمت کے دوران فائرنگ سے دکاندار جاں بحق ہوگیا، ملزمان فرار ہونے میں کامیاب ہوگئے۔

    اس حوالے سے پولیس حکام کا کہنا ہے کہ 55 سالہ شہری اپنی دکان پر بیٹھا تھا، مسلح ملزمان نے ڈکیتی کی کوشش کی، ڈاکوؤں سے مزاحمت پر ہونے والی فائرنگ کے نتیجے میں سینے میں لگنے والی گولی جان لیوا ثابت ہوئی۔

    متوفی کو زخمی حالت میں جناح اسپتال منتقل کیا گیا جہاں وہ زخموں کی تاب نہ لاتے ہوئے چل بسا جبکہ شناخت 55 سال امیر کے نام سے ہوئی مقتول کا تعلق پشاور سے ہے۔

    مقتول کے لواحقین نے بتایا کہ 15روز پہلے بھی اسی دکان پرڈکیتی کی واردات ہوئی تھی، ڈاکو دکان سے70ہزار روپے نقدی لوٹ کر لے گئے تھے۔

    آج ڈاکو دوباہ آئے اور رقم کا مطالبہ کیا نہ دینے پر گولی ماردی، مقتول نے8ماہ قبل راشن کی دکان کھولی تھی، اس کا آبائی تعلق پشاور سے تھا۔

    یاد رہے کہ سال2025کے پہلے مہینے میں صرف کراچی میں اب تک ڈاکوؤں سے مزاحمت پر 6 افراد قتل کیے جا چکے ہیں لیکن تاحال ان کے لواحقین کو انصاف نہیں مل سکا ہے۔

    علاوہ ازیں کراچی کے علاقے بلدیہ گلشن غازی میں ایک گھر میں فائرنگ ک اواقعہ پیش آیا ہے جس کے نتیجے میں ایک شخص کے زخمی ہونے کی اطلاعات ہیں۔

    ریسکیو حکام کے مطابق نارتھ کراچی جے4اسٹاپ پر فائرنگ سے زخمی ایک شہری کو ابتدائی طبی امداد کیلیے اسپتال منتقل کیا گیا ہے جس کی شناخت 36سالہ فرحان کے نام سے ہوئی ہے۔

  • کراچی کے مختلف علاقوں میں بدترین ٹریفک جام

    کراچی کے مختلف علاقوں میں بدترین ٹریفک جام

    کراچی کے مختلف علاقوں میں آج بھر بدترین ٹریفک جام دیکھنے میں آیا گاڑیوں میں موجود ہزاروں شہری سڑکوں پر پھنس کر رہ گئے۔

    کراچی کے علاقے کورنگی کراسنگ پر بدترین ٹریفک جام کے باعث ہزاروں شہری رُل گئے، کورنگی ندی سے کورنگی ناصر جمپ جانے والی مکمل طور پر سڑک بند ہوگئی۔

    اس کے علاوہ قیوم آباد سے کورنگی کراسنگ جانے والے روڈ پر گاڑیوں کی کبی قطاریں لگ گئیں، صورتحال پر قابو پانے والے ٹریفک پولیس کے افسران و اہلکار سڑکوں سے غائب ہیں۔

    ٹریفک جام

    اس حوالے سے اے آر وائی نیوز کے نمائندے عدنان راجپوت کے مطابق ذرائع کا کہنا ہے کہ لانڈھی قائد آباد میں ایک جماعت کی جانب سے منعقدہ جلسے کے باعث انڈسٹریل ایریا سے آنے والے ہیوی ٹریفک کو ناصر جمپ کی طرف سے کورنگی کراسنگ کی جانب بھیجا جارہا ہے۔

     اے آر وائی نیوز کے گفتگو کرتے ہوئے ایک شہری نے کہا کہ گزشتہ 2گھنٹے سے کورنگی کراسنگ پر ٹریفک جام کی یہی صورت حال درپیش ہے جائیں تو کہاں جائیں؟

    مزید پڑھیں : کراچی میں بدترین ٹریفک جام ، ہزاروں شہری رل گئے

    علاوہ ازیں آج شہر کے مختلف علاقوں لیاقت آباد تین ہٹی اور اطراف کے علاقوں میں ٹریفک جام کے باعث شہریوں کو شدید مشکلات کا سامنا رہا۔

  • ڈاکوؤں کی فائرنگ سے 2 سالہ بچی اور شہری جاں بحق

    ڈاکوؤں کی فائرنگ سے 2 سالہ بچی اور شہری جاں بحق

    کراچی کے علاقے کورنگی میں ڈاکوؤں کی فائرنگ سے 2 سالہ بچی جان سے چلی گئی جبکہ بنارس میں ڈکیتی مزاحمت پر فائرنگ سے زخمی شخص دم توڑ گیا۔

    تفصیلات کے مطابق شہر قائد میں ڈکیتی کی وارداتیں رکنے کا نام نہیں لے رہیں، مسلح افراد شہر بھر میں دندناتے پھررہے ہیں اور پولیس روایتی بے حسی کا شکار ہے۔

    ڈکیتی کا ایک واقعہ کورنگی چار نمبر اویس شہید پارک کے قریب پیش آیا ہے جہاں دو مسلح ملزمان ایک گلی میں کھڑے شہری سے موٹرسائیکل چھین رہے تھے جس پر اس نے مزاحمت کی۔

    پو لیس حکام کے مطابق مزاحمت کے دوران ڈاکوؤں نے فائرنگ کردی تو گولی گھر کے اندر موجود دو سالہ بچی حورین کو جا لگی جس نے موقع پر ہی دم توڑ دیا۔

    ڈاکو شہری سے موٹر سائیکل چھین کر فرار ہونے میں کامیاب ہوگئے، بچی کی لاش قانونی کارروائی کے لیے اسپتال منتقل کردی گئی۔

    میڈیا سے گفتگو کرتے ہوئے جاں بحق بچی کے چچا نے بتایا کہ بھائی جیسے ہی گھرپہنچا تو ڈاکوؤں نے گھیر لیا،بھائی نے مزاحمت بھی نہیں کی تھی پھر بھی ڈاکوؤں نے فائرنگ کردی۔

    بھتیجی گھر میں داخل ہورہی تھی کہ اس دوران گولی اس کی گردن میں لگ گئی، ڈاکوؤں کی فائرنگ سے میری بہن بھی زخمی ہوئی۔

    دوسرے واقعے میں کراچی کے علاقے بنارس میں ڈکیتی میں مزاحمت پر فائرنگ سےزخمی ہونے والا شخص زخموں کی تاب نہ لاتے ہوئے دوران علاج دم توڑ گیا۔

    ڈاکوؤں نے موٹر سائیکل سوار دو بھائیوں سے موبائل چھیننے کی کوشش کی، دونوں بھائیوں کے پکڑنے پر ڈاکوؤں نے فائرنگ کردی، دونوں بھائیوں کو ایک ہی گولی لگی، مزید تحقیقات جاری ہیں۔

  • کراچی: سلیم نامی شخص کا قتل قاتل کی بہن سے دوستی کا نتیجہ نکلا

    کراچی: سلیم نامی شخص کا قتل قاتل کی بہن سے دوستی کا نتیجہ نکلا

    کراچی: چند روز قبل کراچی کے علاقے کورنگی سو کوارٹر کے قریب سلیم نامی شخص کا قتل غیرت کے نام پر ہونے کا انکشاف ہوا ہے، زمان ٹاؤن پولیس نے قتل میں ملوث دونوں ملزمان کو گرفتار کر لیا۔

    تفصیلات کے مطابق کورنگی سو کوارٹر میں چند روز قبل سلیم نامی شخص کا قتل ہوا تھا، ایس ایس پی طارق نواز نے بتایا کہ زمان ٹاؤن پولیس نے ٹیکنیکل بنیادوں پر 2 ملزمان کو گرفتار کر لیا ہے، جن میں مرکزی ملزم ایاز اور ذیشان شامل ہیں۔

    ایس ایس پی کے مطابق مقتول سلیم کو غیرت کے نام پر قتل کیا گیا، مقتول پہلے پختون آباد میں ٹائل کی دکان پر کام کرتا تھا، جہاں سلیم کی قاتل ایاز کی بہن سے دوستی ہو گئی، لیکن جب ایاز کو پتا چلا تو سلیم پختون آباد چھوڑ کر کورنگی میں چھپ گیا۔

    طارق نواز کے مطابق کافی عرصے بعد ایاز کو معلوم ہوا کہ سلیم کورنگی میں کام کرتا ہے، جس پر ملزم نے ساتھی ذیشان کو بھیج کر سلیم کو ٹائل کے کام کے لیے بلایا، اور راستے ہی میں ایاز نے کار سے اتر کر موٹر سائیکل پر ہی سلیم کو گولی مار دی۔

    پولیس حکام کا کہنا ہے کہ گرفتار ملزمان سے اسلحہ اور کار بھی برآمد کر لی گئی ہے، ملزم ایاز ماضی میں بھی قتل کے مقدمے میں گرفتار ہو کر جیل جا چکا ہے، جب کہ ملزم ذیشان پر بھی ناجاٸز اسلحے کے مقدمات درج ہیں۔

    گرفتار ملزمان سے مزید تفتیش کا آغاز کر دیا گیا ہے۔

  • این اے 240: ٹی ایل پی کا نتائج ماننے سے انکار، بڑا فیصلہ کرلیا

    این اے 240: ٹی ایل پی کا نتائج ماننے سے انکار، بڑا فیصلہ کرلیا

    کراچی کے حلقے این اے 240 کے ضمنی الیکشن نتائج پر تحریک لبیک پاکستان نے تحفظات کا اظہار کرتے ہوئے دوبارہ گنتی کی درخواست دائر کردی ہے۔

    تفصیلات کے مطابق حلقے میں دوبارہ گنتی کی درخواست ٹی ایل پی کے امیدوار شہزادہ شہباز نے ریٹرننگ افسر کو جمع کرائی، درخواست میں موقف اپنایا گیا کہ ضمنی انتخاب کے نتائج پر مطمئن نہیں ہوں، لہذا دوبارہ گنتی کرائی جائے، دوبارہ گنتی ہماراقانونی حق ہے۔

    ٹی ایل پی امیدوار نے سوالات اٹھائے کہ کیوں 300پولنگ اسٹیشن کے بعد کافی دیر تک نتائج روکےگئے؟ آر ٹی ایس نے اچانک33منٹ تک کام کرنا کیسے چھوڑا؟

    سعد رضوی کی پریس کانفرنس

    رات گئے کورنگی میں پریس کانفرنس کرتے ہوئے ٹی ایل پی سربراہ علامہ سعد رضوی نے الزام عائد کیا کہ ضمنی الیکشن کے دوران تین پولنگ اسٹیشن سے بیلٹ باکس اٹھائے گئے، ان کے ثبوت ہمارے پاس موجود ہے،اس کے علاوہ مختلف پولنگ اسٹیشن پر منصوبے کے تحت دھاندلی کی گئی۔

    یہ بھی پڑھیں: این اے 240 ضمنی انتخاب: ایم کیو ایم نے میدان مار لیا

    ادھر الیکشن کمیشن نےاین اے 240کا فارم سینتالیس جاری کردیا ہے، جس کے مطابق حلقے میں پولنگ اسٹیشن کی تعداد309تھی جبکہ حلقےمیں کل ووٹوں کی تعداد529855تھی، جن میں مردووٹرز29385 اور خواتین ووٹرزکی تعداد235470 تھی۔

    الیکشن کمیشن کے مطابق مجموعی طورپر44388ووٹرز نےحق رائےدہی استعمال کیا، کراچی:کاسٹ کیےگئےمرد ووٹرزکی تعداد31677رہی جبکہ12711خواتین نےحق رائےدہی استعمال کیا،ووٹ کاسٹ کرنے کی شرح 8.38فیصدرہی، 440 ووٹ خارج ہوئے۔

  • این اے 240 ضمنی الیکشن میں ناقص انتظامات، عملہ پریشان

    این اے 240 ضمنی الیکشن میں ناقص انتظامات، عملہ پریشان

    کراچی کے حلقے این اے 240 میں ضمنی انتخاب کی ناقص انتظامات کی قلعی کھل گئی، عملہ انتخابی سامان موٹر سائیکل اور رکشوں میں لے جانے لگا۔

    تفصیلات کے مطابق کراچی کے حلقے این اے دو سو چالیس میں ضمنی الیکشن کے لئے کل میدان سجے گا، الیکشن کمیشن کی جانب سے انتظامات مکمل کرنے کے بلند وبانگ دعوے کئے گئے تاہم حقیقت اس کے برعکس ہے۔

    پولنگ سامان کی ترسیل کے لئے حاصل ٹرانسپورٹ ناکافی ہونے کے باعث عملہ انتخابی مواد اپنی مدد آپ کے تحت متعلقہ پولنگ اسٹیشن لے جارہاہے، اے آر وائی نیوز کو موصول فوٹیج میں دیکھا جاسکتا ہے کہ پریذائیڈنگ افسر انتخابی سامان موٹر سائیکل اور رکشوں پر لے جارہے ہیں۔

    اس سے قبل انتظامیہ نےانتخابی مواد پولیس کی نگرانی میں پولنگ اسٹیشنز پہنچانے کا دعویٰ کیا تھا، بیان میں کہا گیا تھا کہ ریٹرننگ افسران کے دفتر سے انتخابی سامان کی تقسیم جاری ہے تمام انتخابی سامان آج پولنگ اسٹیشنز پر پہنچایا جائے گا۔

    یہ بھی پڑھیں:این اے 240 کے تمام پولنگ اسٹیشن حساس قرار

    ادھر تعینات عملے میں شکایت کی ہیں کہ متعدد پولنگ اسٹیشنز پر پینے کے پانی اور پنکھوں کا بندوبست نہیں ہے، شدید گرمی اور حبس زدہ موسم میں کام کرنے میں مشکلات درپیش ہیں۔

    تمام پولنگ اسٹیشنز حساس اور انتہائی حساس قرار

    الیکشن کمیشن نے این اے 240کے تمام پولنگ اسٹیشنز کو حساس اور انتہائی حساس قرار دیا ہے، پولنگ کے روز پولیس اور رینجرز کے جوان اپنی فرائض انجام دینگے۔

    واضح رہے کہ دو ہزار اٹھارہ کے عام انتخابات میں این اے 240 سے متحدہ قومی موومنٹ پاکستان کے امیدوار اقبال محمد علی کامیاب ہوئے تھے تاہم وہ 19 اپریل 2022 کو انتقال کرگئے تھے جس کے باعث یہ نشست خالی ہوئی تھی۔

    کل ہونے والے ضمنی انتخاب میں ایم کیو ایم پاکستان، پیپلز پارٹی اور تحریک لبیک پاکستان کے درمیان سخت مقابلے کی توقع ہے۔

  • مصروف سڑک پر فلمی انداز میں کیش وین لوٹنے کی لرزہ خیز واردات (فوٹیج بچے نہ دیکھیں)

    مصروف سڑک پر فلمی انداز میں کیش وین لوٹنے کی لرزہ خیز واردات (فوٹیج بچے نہ دیکھیں)

    کراچی : شہر قائد کے علاقے کورنگی میں ایک مصروف سڑک پر فلمی انداز میں کیش وین لوٹنے کی لرزہ خیز واردات کی گئی، جس کی سی سی ٹی وی فوٹیج اے آر وائی نیوز نے حاصل کی ہے۔

    کراچی کے علاقے کورنگی کی سڑک پر فلمی طرز پر کیش وین لوٹنے کی کوشش کی گئی لیکن ڈاکو پیسے لوٹنے میں ناکام رہے، تاہم اس واردات میں ایک کیشیئر کی جان چلی گئی۔

    واردات کیسے ناکام ہوئی؟ اے آر وائی نیوز کو موصول سی سی ٹی وی فوٹیج میں دیکھا جا سکتا ہے کہ سیکیورٹی گارڈز نے جانوں کی پروا نہ کرتے ہوئے کئی منٹ تک ڈاکوؤں کا بے جگری سے مقابلہ کیا۔

    فوٹیج کے مطابق کورنگی کی سڑک پر جہاں تعمیراتی کام جاری ہے، ایک سفید رنگ کی کیش وین کو سفید کار نے چلتی سڑک پر اس کے سامنے فلمی انداز میں آ کر روک لیا، ڈاکوؤں کو جدید ہتھیاروں کے ساتھ کار سے اترتے دیکھا جا سکتا ہے۔

    فوٹیج میں ڈاکوؤں اور سیکیورٹی گارڈز میں مقابلہ ہوتے بھی دیکھا جا سکتا ہے، فوٹیج کے مطابق ایک سیکیورٹی گارڈ شدید زخمی ہو کر سڑک پر گیا، کیش وین کے قریب دوسرا سیکیورٹی گارڈ بھی زخمی ہو کر گر پڑا۔

    تین منٹ سے زائد رہنے والی اس کشمکش کے دوران فائرنگ سے وین میں بیٹھا کیشیئر گولی لگنے سے موقع ہی پر دم توڑ گیا، تاہم ڈاکو وین کے اندر موجود ہیوی تجوری نکالنے میں ناکام رہے۔

    سیکیورٹی گارڈز کی مزاحمت کے بعد ناکامی پر ملزمان کار میں بیٹھے اور فرار ہو گئے۔