کراچی : ایم کیو ایم پاکستان کے رہنما فیصل سبزواری نے کہا ہے کہ کوٹہ سسٹم اور خود مختار بلدیاتی نظام نہ ملا تو علیحدہ صوبے کا مطالبہ کریں گے، متحدہ نے شہری سندھ کے استحصال کا مقدمہ عدالتوں میں لے جانے کا اعلان کردیا۔
تفصیلات کے مطابق ایم کیو ایم پاکستان نے کوٹے کے نام پر پیپلز پارٹی کی جانب سے شہری سندھ کے استحصال کا مقدمہ عدالتوں میں لے جانے کا اعلان کردیا۔
ایم کیو ایم نے ایک بار پھر سندھ حکومت اور پیپلز پارٹی کو نشانہ بناتے ہوئے ملازمتوں میں نوکریاں نہ دینے ، میرٹ کا قتل کرنے ، متعصبانہ کوٹہ سسٹم، پبلک سروس کمیشن کی غیر جانب داری اور شہری سندھ کو زیادتی کا نشانہ بنانے پر سوالات اٹھا دئیے۔
فیصل سبزواری کا کہنا ہے کہ کوٹہ سسٹم پر عدالتی کمیشن بنایا جائے اگر خود مختار بلدیاتی نظام نہ ملا تو صوبے کا مطالبہ بھی آئے گا۔ ایم کیو ایم پاکستان کی رابطہ کمیٹی نے عدالتوں سے شہری سندھ کے معاشی و سیاسی تجاوزات کو روکنے کا مطالبہ کردیا۔
فیصل سبزواری نے مزید کہا کہ ہمیں احساس نہ دلایا جائے کہ اٹھارہویں ترمیم کا ساتھ دے کر ایم کیو ایم نے غلطی کی، انہوں نے شہری سندھ کا مقدمہ لے کر دوبارہ عدالتوں میں جانے اور کوٹہ سسٹم پر عدالتی کمیشن بنانے کا مطالبہ کردیا۔
ایم کیو ایم رہنما نے کہا کہ عدالتیں اگر کراچی کو چالیس سال پرانی شکل میں لانا چاہتی ہیں تو پھر شہری سندھ پر قائم سیاسی و معاشی تجاوزات کا خاتمہ بھی کرنا ہوگا، شہری سندھ کو نظر انداز کرنے کا سلسلہ نہ روکا تو صوبے کا مطالبہ آئے گا۔
ایم کیو ایم رہنمائوں نے سندھ حکومت کو الٹی میٹم دیا کہ شہری سندھ کا لوٹا گیا پیسہ واپس کرکےزیادتیوں کا سلسلہ روکا جائے ورنہ دما دم مست قلندر ہوگا۔
