اسلام آباد (17 اگست 2025): وزیر اعظم شہباز شریف کی خصوصی ہدایت پر خیبر پختونخوا سمیت سیلاب سے متاثرہ اضلاع میں ریلیف اور بحالی کی سرگرمیوں کو تیز کر دیا گیا۔

ریڈیو پاکستان کے مطابق اس مقصد کیلیے وفاقی وزراء کو براہِ راست ریلیف آپریشنز میں شامل کیا گیا تاکہ متاثرہ عوام کو بروقت اور موثر امداد فراہم کی جا سکے۔

وزیر اعظم شہباز شریف کی ہدایت پر وفاقی وزیر امور کشمیر و گلگت بلتستان انجینئر امیر مقام شانگلہ اور بونیر، وفاقی وزیر پاور ڈویژن ضلع بونیر، وفاقی وزیر مذہبی امور سردار یوسف مانسہرہ جبکہ معاون خصوصی مبارک زیب ضلع باجوڑ میں امدادی سامان کی تقسیم اور نگرانی کیلیے موجود ہیں۔

یہ بھی پڑھیں: سیلاب زدہ علاقوں میں پاک فوج کی امدادی سرگرمیاں جاری

گزشتہ روز بھی انجینئر امیر مقام نے وزیر اعظم شہباز شریف کی ہدایت پر پورا دن متاثرہ اضلاع میں گزارا اور امدادی سرگرمیوں کی براہِ راست نگرانی کی۔

این ڈی ایم اے کو وزیر اعظم نے ہدایت دی کہ وہ صوبائی ڈیزاسٹر مینجمنٹ اداروں (پی ڈی ایم ایز/جی بی ڈی ایم اے) اور ضلعی انتظامیہ کے ساتھ قریبی رابطے میں رہ کر ریلیف آپریشنز کو مزید مربوط بنائے۔ متاثرہ علاقوں میں امداد کی ترجیحی فہرست کو بھی حتمی شکل دی جا رہی ہے تاکہ ضرورت مند افراد تک بروقت راشن، خیمے اور ادویات پہنچائی جا سکیں۔

شہباز شریف کی ہدایت پر امدادی سامان سے بھرے مزید ٹرک خیبر پختونخوا کے مختلف متاثرہ اضلاع میں روانہ کیے جا رہے ہیں۔ یہ سامان ضلعی انتظامیہ کے سپرد کیا جا رہا ہے تاکہ شفاف انداز میں تقسیم کو یقینی بنایا جا سکے۔

پاک فوج، دیگر ریاستی ادارے اور مختلف این جی اوز بھی ریلیف آپریشنز میں بھرپور حصہ لے رہے ہیں۔

وزیر اعظم شہباز شریف نے چیئرمین این ڈی ایم اے کو ہدایت کی ہے کہ خیبر پختونخوا، گلگت بلتستان اور آزاد جموں و کشمیر کے ڈیزاسٹر مینجمنٹ اداروں سے مسلسل رابطے میں رہتے ہوئے امدادی سرگرمیوں کو مزید مؤثر بنایا جائے۔

انہوں نے اس مشکل گھڑی میں سیلاب متاثرین کے ساتھ مکمل یکجہتی کا اظہار کرتے ہوئے کہا کہ ہم سیلاب متاثرہ عوام کو تنہا نہیں چھوڑیں گے، حکومت ہر ممکن مدد فراہم کرے گی۔

اسلام آباد (17 اگست 2025): پاکستان ٹیلی کمیونیکیشن اتھارٹی (پی ٹی اے) خیبر پختونخوا اور ملک کے دیگر سیلاب زدہ علاقوں میں ٹیلی کام صور تحال کے حوالے سے نگرانی کا سلسلہ جاری رکھے ہوئے ہے۔

ترجمان پی ٹی اے نے بتایا کہ حالیہ سیلاب سے متعدد موبائل اور فکسڈ لائن سائٹس متاثر ہوئی ہیں جس کے باعث سروسز میں تعطل پیدا ہوا ہے۔

انہوں نے بتایا کہ پی ٹی اے کی ٹیمیں متاثرہ علاقوں میں موجود ہیں اور وفاقی و صوبائی اداروں، ضلعی انتظامیہ اور ٹیلی کام آپریٹروں کے ساتھ رابطے میں ہیں تاکہ سروسز کے حوالے سے فوری بحالی کا عمل یقینی بنایا جا سکے۔

یہ بھی پڑھیں: پی ٹی اے نے شہریوں کو خبردار کر دیا

بونیر میں پی ٹی اے نے وفاقی وزیر امیر مقام، چیئر مین پی ٹی آئی گوہر خان، ڈپٹی کمشنر بونیر کاشف قیوم اور پی ٹی سی ایل و سی ایم اوز کے اعلیٰ نمائندگان کے ساتھ نیٹ ورک کی بحالی کے اقدامات کے جائزے کیلیے اجلاس منعقد کیا۔

واضح رہے کہ پی ٹی اے کی جانب سے آپریٹروں کے تعاون سے کم سے کم وقت میں کمیونیکیشن سروسز کی بحالی کے حوالے سے بھرپور اقدامات کیے جا رہے ہیں تاکہ بلا تعطل ٹیلی کام خدمات ریسکیو اور ریلیف آپریشنز کے حوالے سے بروقت اقدامات اٹھائے جا سکیں۔

پشاور (16 اگست 2025): صوبہ خیبر پختونخوا میں بارشوں اور سیلابی صورتحال کے باعث خصوصی کنٹرول روم قائم کر دیا گیا۔

محکمہ بلدیات خیبر پختونخوا نے اس حوالے سے اعلامیہ جاری کر دیا جس کے مطابق بارش اور سیلاب کی صورتحال کے پیش نظر ڈائریکٹوریٹ جنرل میں کنٹرول روم قائم کیا گیا۔

اعلامیے میں بتایا گیا کہ کنٹرول روم میں عملے کی خصوصی ڈیوٹیاں لگا دی گئیں، بارش اور سیلاب پر کنٹرول روم سے مسلسل نگرانی کی جائے گی۔

یہ بھی پڑھیں: کلاؤڈ برسٹ : کیا بادل پھٹنے کی پیش گوئی کی جاسکتی ہے؟

مزید بتایا گیا کہ تمام فیلڈ دفاتر کو ہنگامی صورتحال میں کنٹرول روم سے رابطے کی ہدایت کر دی گئی۔

گزشتہ روز وزیر اعظم شہباز شریف کی ہدایت کے مطابق این ڈی ایم اے خیبر پختونخوا کی صوبائی حکومت اور پی ڈی ایم اے کے ساتھ مکمل تعاون کر رہا ہے، پچھلے 24 گھنٹوں کے دوران شدید بارشوں، سیلاب، لینڈ سلائیڈنگ اور آسمانی بجلی گرنے کے مختلف واقعات کے باعث صوبے میں 180 افراد، گلگت بلتستان میں 5 جبکہ آزاد کشمیر میں 9 افراد جاں بحق ہوئے۔

این ڈی ایم اے کے مطابق خیبر پختونخوا کے مختلف اضلاع میں ہونے والی بارشوں کے نتیجے میں 23 افراد زخمی بھی ہوئے ہیں۔ متاثرہ علاقوں میں پی ڈی ایم اے سمیت پاک آرمی، ضلعی انتظامیہ، ریسکیو 1122 اور مقامی رضاکار امدادی کاروائیوں میں مصروف عمل ہیں۔

این ڈی ایم اے تمام متعلقہ اداروں کی جانب سے جاری امدادی کارروائیوں کی ہمہ وقت نگرانی کر رہا ہے جبکہ ہنگامی صورتحال سے نمٹنے کیلیے تمام ادارے اقدامات کو یقینی بنا رہے ہیں۔

ممکنہ طور پر مزید بارشوں کی صورت میں لینڈ سلائیڈنگ کے واقعات میں مزید اضافے کا خدشہ ہے ، شہریوں سے گزارش ہے کہ بارشوں اور سیلاب کے دوران محتاط رہیں اور حفاظتی اقدامات کو یقینی بنائیں۔ این ڈی ایم اے نے سیاحوں سے اپیل کی ہے کہ اگلے 5 تا6 روز تک شمالی علاقہ جات کے سفر سے گریز کریں۔

چیئرمین پی ٹی آئی بیرسٹر گوہر کا کہنا ہے کہ کے پی کی عوام کو تنہا نہیں چھوڑیں گے، نقصانات کا ازالہ کریں گے۔

اے آر وائی نیوز سے گفتگو کرتے ہوئے بیرسٹر گوہر نے کہا کہ علی امین گنڈاپور سے بات ہوئی ہے تمام وسائل بروئے کار لائے گئے ہیں، زخمیوں کا بھرپور خیال رکھا جائے گا، اسپتالوں میں تمام ریسورس استعمال کریں گے۔

انہوں نے کہا کہ جانی نقصان کے ساتھ ساتھ انفرا اسٹرکچر کو بری طرح نقصان پہنچا ہے، وفاقی حکومت اور این ڈی ایم اے سے درخواست ہے کہ رابطے میں رہے۔

یہ پڑھیں: خیبرپختونخوا میں مزید موسلا دھار بارشوں کی پیشگوئی

بیرسٹڑ گوہر نے کہا کہ اس وقت ہماری پوری توجہ لاپتا افراد کی تلاش اور انہیں بچانا ہے، لوگوں کو ریسکیو کرنا اور فرسٹ ایڈ کرنا ہماری پہلی ترجیح ہے۔

چیئرمین پی ٹی آئی نے کہا کہ صوبائی حکومت اپنے وسائل کے مطابق کام کررہی ہے، ریسکیو ہیلی کاپٹر کریش ہوا جس پر بہت دکھ ہے، بونیر کی عوام کا جذبہ قابل ستائش ہے۔

انہوں نے کہا کہ جس چیز کی بھی ضرورت ہے لوگ بھرپور مدد کررہے ہیں، اس وقت سیاست نہیں ہورہی سب مل کر بھائیوں کی مدد کررہے ہیں، جماعت اسلامی، عوامی نیشنل پارٹی سمیت تمام جماعتیں مدد کررہی ہیں۔