Tag: #KPOAttack

کراچی : کراچی پولیس چیف آفس پر حملے کرنے والے تینوں دہشت گردوں کی شناخت کرلی گئی ہے۔

تفصیلات کے مطابق کراچی پولیس چیف آفس پر حملے کی تحقیقات میں اہم پیشرفت ہوئی ،حملہ کرنے والے تینوں دہشت گردوں کی شناخت ہوگئی۔

پولیس حکام نے بتایا کہ خودکش بمبارکی شناخت زالا نورکے نام سے ہوئی، جس کا تعلق وزیرستان سے تھا۔

کراچی پولیس چیف کے دفتر پہ حملہ آوروں میں سے دو کا تعلق شمالی وزیرستان و لکی مروت سے تھا تیسرے خود کش حملہ آور کی شناخت کیجا رہی ہے دھشتگرد کاروائی کی ذمہ واری کالعدم ٹی ٹی پی نے قبول کی تھی pic.twitter.com/7UZ4zkIYxh

— Faizullah Khan فیض (@FaizullahSwati) February 17, 2023

حملے میں مارے گئے دوسرے دہشت گرد کی شناخت کفایت اللہ کے نام سے ہوئی جو لکی مروت کا رہا ئشی تھا۔

حملے میں ہلاک تیسرے مبینہ دہشت گرد کی شناخت مجید بلوچ کے نام سے ہوئی ، مجید بلوچ دتہ خیل شمالی وزیرستان کا رہائشی تھا۔

یاد رہے تینوں دہشت گردوں کی لاشیں کے پی او سے جناح اسپتال منتقل کردی گئیں تھی ، 2 دہشت گردوں کی لاشیں جبکہ ایک دہشت گرد کےاعضا کو منتقل کیاگیا، جہاں تینوں دہشت گردوں کی شناخت کی گئی۔

دوسری جانب بم ڈسپوزل اسکواڈ کی حملے سے متعلق رپورٹ سامنے آگئی ، جس میں بتایا کہ کراچی پولیس چیف آفس پرحملےمیں ملوث دہشت گردوں کےپاس تین خودکش جیکٹس تھیں ، ایک دہشت گرد نے خودکودھماکےسےاڑالیا۔

بی ڈی ایس حکام کا کہنا تھا کہ ہلاک دہشتگردوں سےدوخودکش جیکٹس، پانچ دستی بم اورتین گرنیڈلانچر برآمد ہوئے، دہشت گردوں سے برآمد خودکش جیکٹس آٹھ سےدس کلووزنی ہیں، اگر بروقت کارروائی نہ کی جاتی تو بڑا نقصان ہو سکتا تھا۔

یاد رہے گذشتہ روز کراچی کے علاقے شارع فیصل پر واقع کراچی پولیس چیف آفس پر دہشت گردوں کے حملے میں دو پولیس اورایک رینجرز اہلکارشہید ہوگئے تھے جبکہ خاکروب کی بھی جان گئی اور پانچ پولیس اہلکاروں سمیت بارہ زخمی ہوئے۔

پولیس اور رینجرز نے آپریشن کرتے ہوئے تینوں دہشت گرد کو ہلاک کردیا تھا۔