ریاض: آئی ایم ایف کی منیجنگ ڈائریکٹر کرسٹالینا جارجیوا نے کہا ہے کہ پاکستان جیسے ملکوں میں مہنگائی ہدف تک لانا ان کی اوّلین ترجیحات میں سے ہے۔
تفصیلات کے مطابق بین الاقوامی مالیاتی ادارے کی منیجنگ ڈائریکٹر کرسٹالینا جارجیوا نے سعودی عرب کے شہر ریاض میں ورلڈ اکنامک فورم کے خصوصی سیشن میں گفتگو کرتے ہوئے کہا کہ کووِڈ نائنٹین کی وبا کی وجہ سے بعض ممالک جیسا کہ پاکستان کو نمایاں مشکلات کا سامنا ہے۔
انھوں نے کہا کرونا وبا کے باعث معاشی نقصان سے کم آمدنی والے ممالک زیادہ متاثر ہوئے، ہمارے لیے اس وقت تین ترجیحات ہیں، اوّل ترجیح یہ ہے کہ جن ملکوں میں مہنگائی بہت زیادہ ہے اسے ہدف تک لایا جائے، ہم کسی حد تک مہنگائی میں کمی لانے میں کامیاب ہوئے ہیں تاہم ابھی کام باقی ہے۔
ایم ڈی آئی ایم ایف نے مزید کہا ہماری دوسری ترجیح مالیاتی خسارے میں کمی پر توجہ مرکوز کرنا ہے، جو بہت مشکل مرحلہ ہے، جب کہ تیسری ترجیح تعاون کے لیے مزید راستے تلاش کرنا ہے۔
کرسٹیالینا نے کہا کہ پچھلے چند سالوں کی مشکلات کے باوجود ترقی اور معیشت بہتر ہے، ہم نے ترقی کے تخمینوں کو اس سال کے لیے بہتر کیا ہے، ایڈوانس معیشتوں میں امریکا کی کارکردگی اچھی ہے۔
