اصفہان: جامعہ کراچی کے وائس چانسلر نے مسلم ممالک کی جامعات کی درجہ بندی کے الگ نظام کی تجویز دے دی۔
تفصیلات کے مطابق کراچی یونیورسٹی کے وائس چانسلر پروفیسر ڈاکٹر خالد محمود عراقی نے کہا ہے کہ مسلم ممالک کی جامعات کی درجہ بندی کا نظام الگ ہونا چاہیے، جس میں پوری دنیا کی جامعات کی بہ جائے صرف مسلم ممالک کی جامعات کی درجہ بندی ہو، جو مسلم دنیا کے حالات اور زمینی حقائق کو مدنظررکھتے ہوئے کی جائے۔
ایران میں منعقدہ نویں سائنس و ٹیکنالوجی ایکسچینج پروگرام سے خطاب کرتے ہوئے انھوں نے کہا ’’جب تک مسلم دنیا تعلیم و تحقیق پر سرمایہ کاری اور اس کو اوّلین ترجیحات میں شامل نہیں کرے گی، اس وقت تک مسلم دنیا کی جامعات کی درجہ بندی میں بہتری نہیں آ سکتی۔‘‘
ڈاکٹر خالد عراقی نے مزید کہا کہ ترقی پذیر مسلم ممالک اور بالخصوص موجودہ دور میں پاکستان میں برین ڈرین کی وجہ سے ہنرمند اور ذہین افراد بیرون ملک رخ کر رہے ہیں، انسانی سرمایہ جس تیزی سے مغربی ممالک کا رخ کر رہا ہے وہ لمحہ فکریہ ہے، کسی بھی ملک کے لیے اس کی عوام یا تو سرمایہ ہوتی یا پھر بوجھ بن جاتی ہے، لیکن ہمارے یہاں سرمایہ دیگر ممالک منتقل ہو رہا ہے جب کہ بوجھ میں اضافہ ہوتا جا رہا ہے۔
انھوں نے کہا ترقی یافتہ ممالک اپنے ہاں نہ صرف بہترین دماغ لے جاتے ہیں بلکہ ترقی پذیر ممالک ہنرمند اور ذہین افراد کی قلت کا شکار ہو جاتے ہیں اور اس طرح ترقی یافتہ ممالک کو ترقی پذیر ممالک پر حکمرانی کا مزید موقع مل جاتا ہے۔
