اسلام آباد: ایرانی سفارت خانے نے شرپسند عناصر کے ایرانی اداروں سے تعلقات سے متعلق خبروں کی تردید کردی ہے۔
تفصیلات کے مطابق اسلام آباد میں واقع ایرانی سفارت خانے کی جانب سے آج بروز جمعہ ایک اعلامیہ جاری کیا گیا جس میں کہا گیا ہے کہ بے بنیاد خبروں کا مقصد دونوں ممالک کے تعلقات خراب کرنا ہے۔
اعلامیے میں کہا گیا ہے کہ کسی بھی شرپسند شخص کے ایران کے کسی ادارے سے تعلقات نہیں ہیں اور ایسی تمام بے بنیاد خبروں کی تردید کرتے ہیں۔
پڑوسی ملک کے سفارت خانے کی جانب سے جاری کردہ اعلامیے میں یہ بھی کہا گیا ہے کہ پاکستان اور ایران برادر ممالک ہیں اور ایران ہر مشکل گھڑی میں پاکستان کے ساتھ کھڑا رہا ہے‘ کسی کو بھی اپنی سرزمین پاکستان کے خلاف استعمال کرنے کی اجازت نہیں دیں گے۔
عزیر بلوچ کے کس کس سیاسی جماعت سے رابطے تھے؟
سفارت خانے کی جانب سے واضح کیا گیا ہے کہ پاکستان اور ایران کے درمیان استوار رشتے صدیوں قدیم ہیں اور ایسی خبریں پاک ایران باہمی تعلقات کو نقصان نہیں پہنچا سکتیں۔
واضح رہے کہ گزشتہ کچھ دنوں سے خبریں گردش میں ہیں کہ لیاری سے تعلق رکھنے والے بدنامِ زمانہ گینگسٹر عذیر بلوچ کے ایرانی اور بھارتی انٹلی جنس حکام سے روابط ہیں‘ عذیر بلوچ کو دوروز قبل پاک فوج نے جاسوسی کے الزام میں پولیس کی تحویل سے اپنی تحویل میں لیا تھا۔
یاد رہے کہ پاکستان میں گرفتار ہونے والے بھارتی جاسوس کلبھوشن یادو نے بھی پاکستان تک رسائی حاصل کرنے کے لیے ایران کا راستہ اختیار کیا تھا۔
