Tag: Kuwait

کویت میں گھر سے فرار ہونے والے پالتو شیر کو بہادر خاتون نے سڑک سے پکڑ لیا، جنگل کے بادشاہ کے فرار پر علاقے میں خوف وہراس پھیل گیا تھا

ذکر کسی خاتون کا ہو تو انسانی ذہن میں عموماْ نزاکت کا تصور ابھرتا ہے جو عام پالتو جانوروں سے بھی خوفزدہ نظر آتی ہے لیکن دنیا میں ایسی خواتین کی بھی کمی نہیں جو بہادری میں مردوں سے کم نہیں ہیں۔

.جی ہاں ایسا ہی ایک واقعہ پیش آیا کویت میں جہاں خاتون نے گھر سے فرار ہونے والے ایک شیر کو دلیری سے پکڑ کر بہادری کی مثال قائم کردی

سوشل میڈیا پر ایک ویڈیو گردش کررہی ہے جس میں دیکھا جاسکتا ہے کہ ایک خاتون بچوں کی طرح شیر گود میں پکڑے ایک مصروف شاہراہ سے گزر رہی ہے عرب ٹائمز کے مطابق یہ ویڈیو کویت کی ہے۔

رپورٹر کے مطابق گھر سے فرار ہونے والا شیر وسط شہر ایک سڑک پر نمودار ہوا تھا، شیر کو اس طرح سے آزادانہ گھومتے دیکھنا کسی بھی شخص کو خوفزدہ کرسکتا ہے لیکن یہاں ایک خاتون نے دیدہ دلیری کا مظاہرہ کرتے ہوئے لمحوں میں جنگل کے بادشاہ کو گردن سے دبوچ کر قابو میں کرلیا اور عام بچوں کی طرح اسے گود میں اٹھا لیا۔

ویڈیو میں دیکھا جاسکتا ہے کہ شیر خود کو خاتون کی گرفت سے چھڑانے کے لیے ہاتھ پاوٗں مار رہا تھا لیکن اس کی ایک نہ چلی، بہادر خاتون اسے اٹھائے گلی پار کر گئی اور کچھ دور چلنے کے بعد شیر کو چھوڑ دیا لیکن اس بات کو یقینی بنایا کہ وہ دوبارہ گھر سے فرار نہ ہوسکے۔

واقعہ کویت شہر کے علاقے سباہیا میں پیش آیا جس کے بعد وہاں کے رہائشیوں میں خوف وہراس پھیل گیا تھا۔

شیر کے لاپتہ ہونے کی اطلاع پر امدادی کارکن، رپورٹرز اور پولیس جائے وقوعہ کی طرف روانہ ہوگئے تھے لیکن ان کے پہنچنے سے پہلے ہی مذکورہ خاتون نے شیر کو قابو کرلیا تھا

یہ ویڈیو وائرل ہونے کے بعد اکثر سوشل میڈیا صارفین نے خاتون کو زو کیپر یا شیروں کی دیکھ بھال کرنے والی پروفیشنل ماہر قرار دیا جب کہ کئی لوگ خاتون سے متاثر بھی ہوئے ۔

واضح رہے کہ ایسا پہلی بار نہیں ہوا کہ کویت میں گھر سے پالتو شیر فرار ہوا ہو، دو ہزار تیرہ میں بھی ایک شیر گھر سے فرار ہوا تھا جسے پولیس نے پکڑ کر وین کے ذریعے واپس پہنچایا تھا۔