Tag: Kuwait

کویت سٹی: غیر ملکیوں کی کویت واپسی کے لیے وزرا کونسل نے شان دار اعلان کر دیا ہے۔

تفصیلات کے مطابق کویت میں کرونا وبا کی صورت حال پر قابو پائے جانے کے سبب جہاں ایک طرف ریاست میں ریسٹورنٹس اور کیفے دوبارہ کھولے جانے کی منظوری دی گئی ہے وہاں غیر ملکیوں کی واپسی کے لیے بھی اہم اعلان کیا گیا ہے۔

منگل کو وزرا کونسل نے ہفتہ وار اجلاس میں فیصلہ کیا ہے کہ مزید نوٹس جاری ہونے تک براہ راست پروازوں کو صرف بھارت، نیپال، پاکستان، بنگلہ دیش اور سری لنکا کے لیے صرف کویت سے روانہ ہونے والی پروازوں تک محدود کیا جائے گا۔

فیصلے میں کہا گیا کہ مذکورہ ممالک کے لیے کارگو پروازیں بدستور جاری رہیں گی، نیز ان پروازوں کے عملے کو تبدیل نہ کرنے کا بھی پابند کیا گیا ہے۔

کابینہ نے ریاست میں آنے والے مندرجہ ذیل مسافروں کے لیے شرائط کے ساتھ قرنطینہ ختم کرنے کا بھی فیصلہ کیا ہے، مسافروں نے کویت پہنچنے کی تاریخ سے تین دن کے اندر پی سی آر ٹیسٹ کروایا ہو جو منفی ہو۔

وہ مسافر جنھوں نے ریاست کویت سے منظور شدہ کرونا وائرس ویکسین لگوائی ہو، اور وہ مسافر جو کرونا وائرس کے انفیکشن سے ٹھیک ہوئے ہیں اور انھیں صحت یاب ہوئے 90 دن سے زیادہ مدت نہ ہوئی ہو۔

کابینہ نے 2 مئی 2021 کو ملک سے باہر جانے کے لیے شہریوں کو حفاظتی ویکسین لگائے جانے کے سلسلے میں ایک قرارداد بھی منظور کی ہے، جس میں کہا گیا ہے کہ ہفتہ 22 مئی 2021 سے مندرجہ ذیل زمرے اس فیصلے سے خارج ہوں گے۔

ایسے شہری جن کے پاس وزارت صحت کا منظور شدہ سرٹیفیکٹ ہو، کہ وہ صحت کی وجوہ کی بنا پر ویکسین حاصل کرنے سے قاصر ہیں، اور حاملہ شہری خواتین جن کے پاس وزارت صحت کا منظور شدہ حمل کے ثبوت کا سرٹیفکیٹ ہو۔

کویت سٹی: کویتی حکام کا کہنا ہے کہ غیر ملکی گھریلو ملازمین پانچ مقامات سے کویت میں داخل ہو سکتے ہیں۔

تفصیلات کے مطابق کویت بین الاقوامی ہوائی اڈے کے سرکاری ذرائع نے اعلان کیا ہے کہ 20 نمبر ویزا رکھنے والے گھریلو ملازمین کی کویت ریاست میں واپسی کی سہولت کے لیے ’بلسلامہ‘ پلیٹ فارم میں 5 نئے شہر شامل کر دیے گئے ہیں۔

حکام نے اسپانسرز اور ٹریول آفسز کو ہدایت کی ہے کہ وہ اڈیس ابابا، استنبول، ابوظبی، دبئی اور شارجہ سے گھریلو ملازمین کی کویت واپسی کے لیے فلائٹ ٹکٹ کے ساتھ پیکجز بک کر سکتے ہیں۔

واضح رہے کہ کویتی صحت حکام نے بھارت سے کویت آنے والے مسافروں کے داخلے پر حال ہی میں پابندی لگائی ہے، تاہم وہ ایک غیر ممنوعہ ملک میں 14 دن تک قیام کرنے کے بعد کویت میں داخل ہو سکتے ہیں۔

حکام کا کہنا ہے کہ گھریلو ملازمین کی واپسی کے لیے راستے کھلے ہیں، اور وہ متعدد مقامات سے کویت میں داخل ہو سکتے ہیں لیکن انھیں صحت کے حوالے سے ہدایات کی مکمل اور سخت پیروی کرنی ہوگی۔

بلسلامہ پلیٹ فارم نیشنل ایوی ایشن سروسز کمپنی (این اے ایس) کا قائم کردہ ہے، جس کے تحت ایک مقررہ قیمت پر براہ راست پروازوں کے ذریعے کویت میں داخل ہوا جا سکتا ہے، اس میں 3 پی سی آر ٹیسٹ، کھانے اور ادارہ جاتی قرنطین کے لیے مخصوص مقامات شامل ہیں، اور اس پیکج کی قیمت میں کوئی رد و بدل نہیں کیا جاتا۔

کویت سٹی: کویت میں عید الفطر کے لیے 4 دن کی عام تعطیلات دیے جانے کا انکشاف ہوا ہے۔

تفصیلات کے مطابق کویت میں  عید الفطر کے لیے چار دن کی چھٹیاں دی گئی ہیں، جب کہ تنخواہوں کی ادائیگی وقت پر پوری ہوگی۔

عید کی چھٹیوں کے بارے میں ایک سوال کے جواب میں ذرائع نے مقامی میڈیا کو بتایا کہ اگر عید کا پہلا دن جمعرات کو اس مہینے کی 13 تاریخ کو پڑتا ہے تو چھٹی جمعہ کی بجائے جمعرات، جمعہ ، ہفتہ اور اتوار سمیت 4 دن ہوگی جو 13 ، 14 ، 15 اور 16 مئی سے مطابقت رکھتے ہیں، جب کہ 17 مئی کو باضابطہ طور پر ڈیوٹی پر واپس آنا ہوگا۔

انھوں نے مزید کہا اگر عید کا پہلا دن رواں ماہ کی 12 تاریخ کو آجاتا ہے تو تعطیلات 4 دن ہوں گی جو بالترتیب یہ ہیں: 12 ، 13 ، 14، 15 (بدھ، جمعرات، جمعہ اور ہفتہ) جب کہ کام کے اوقات معمول کے مطابق 16 مئی بروز اتوار سے شروع ہوں گے۔

ملازمین کی تنخواہوں سے متعلق بتایا گیا کہ سرکاری اداروں کو واجب الادا قسطوں کے لیے صارفین کے کسی بھی پریمیم کی کٹوتی کے بغیر بینکوں سے ملازمین کو مئی کی تنخواہیں بر وقت اور مکمل تقسیم کی جائیں گی، جب کہ ریٹائرڈ افراد کی تنخواہ عید سے قبل ان کے کھاتوں میں جمع کی جائے گی۔

واضح رہے کہ قانون کے مطابق کویتی شہریوں کی جانب سے لیے گئے قرضوں کی قسطوں میں کٹوتی اگلے اکتوبر تک ملتوی کی گئی ہے۔

کویت سٹی: مملکت کویت میں منظور شدہ ویکسینز لینے والے افراد کو ادارہ جاتی قرنطینہ سے مستثنیٰ قرار دے دیا گیا۔

تفصیلات کے مطابق کویت میں آنے والے وہ افراد اب ادارہ جاتی قرنطینہ کی شرط سے مستثنیٰ ہوں گے جنھوں نے کویت کی منظور شدہ ویکسینز میں سے کوئی ایک لی ہوگی۔

اس سلسلے میں کویتی وزارت صحت نے سول ایوی ایشن کو ایک نوٹس بھی جاری کر دیا ہے، جس کے مطابق وزارتِ صحت کی جانب سے منظور شدہ ویکسین کی فہرست میں فائزر بائیو این ٹیک، آسٹرا زینیکا آکسفورڈ، موڈرنا اور جانسن اور جانسن کی تیار کردہ کرونا ویکسینز شامل ہیں۔

وزارت صحت کے سکریٹری ڈاکٹر مصطفیٰ رضا نے جاری نوٹس میں منظور شدہ ویکسینز کی فہرست میں مسلسل اپڈیٹ سے بھی آگاہ کیا۔

وزارت صحت کے نوٹس میں کہا گیا ہے کہ ریاست کویت کے ذریعے منظور شدہ ویکسینز کے وصول کنندگان کو چھوٹ اور سہولیات دی جا رہی ہیں، خواہ یہ ویکسی نیشن ریاست کویت میں ہو یا بیرون ملک، ان افراد کو ادارہ جاتی قرنطینہ سے استثنیٰ حاصل ہوگا۔

یہ افراد کابینہ کی 22 مارچ 2021 کو جاری کردہ قرار داد کے مطابق گھر کا قرنطینہ کریں گے، جب کہ استثنیٰ کے حوالے سے دیگر شرائط مندرجہ ذیل ہوں گی:

منظور شدہ ویکسینز لینے والے وہ افراد ادارہ جاتی قرنطینہ سے مستثنیٰ ہوں گے جنھوں نے ویکسین کی ایک خوراک لی ہو اور 5 ہفتوں سے زیادہ کا عرصہ گزر چکا ہو۔ وہ افراد جنھوں نے کسی ویکسین کی 2 خوارکیں لی ہوں اور دوسری خوراک کے بعد 2 ہفتے سے زیادہ دن گزر چکے ہوں۔

وہ لوگ جو کرونا وائرس کے انفیکشن سے صحت یاب ہوئے اور ریاست کویت میں منظور شدہ ویکسین میں سے کسی ایک کی ایک خوراک وصول کی ہو، اور 2 ہفتے ہو چکے ہوں، وہ بھی ادارہ جاتی قرنطینہ کی شرط سے مستثنیٰ ہوں گے۔

واضح رہے کہ کویت آمد سے 72 گھنٹے قبل پی سی آر ٹیسٹ کی شرط جاری ہے، جب کہ گھریلو قرنطینہ کے بعد بھی پی سی آر ٹیسٹ لازم ہے۔