Tag: Kuwait

کویت سٹی: کویت نے آئندہ 5 سال کے اندر 70 فی صد تارکین وطن کو ان کے ملک واپس بھیجنے کا فیصلہ کر لیا ہے۔

تفصیلات کے مطابق کویت نے تارکین وطن کے حوالے سے ایک نیا منصوبہ بنا لیا ہے جس کے تحت پانچ سال کے اندر ستر فی صد غیر ملکیوں کو ان کے ملک واپس بھیجا جائے گا۔

یہ فیصلہ کویت میں آبادیاتی عدم توازن کے ٹھوس حل کے لیے کیا گیا ہے، اس سلسلے میں کویتی قومی اسمبلی کو حکومتی ارادے کی یقین دہانی بھی حاصل ہو گئی ہے۔

ذرایع کا کہنا ہے کہ ستر فی صد تارکین وطن کی ملک بدری کے لیے ڈیموگرافک قانون کے آرٹیکل 5 کو ختم کیا جائے گا، اس میں ایسی شقیں شامل ہیں جن کے تحت مجموعی طور پر 10 لاکھ سے زائد تارکین وطن کو استثنیٰ حاصل ہے۔

قانون کے تحت جن تارکین وطن کو استثنیٰ حاصل ہے ان میں گھریلو ملازمین سمیت طبی اور تعلیمی شعبہ جات کی ملازمتیں شامل ہیں۔

اس منصوبے کے اگلے مرحلے پر کارکنوں کی اسمارٹ بھرتیوں کی اہمیت کو بھی واضح کیا گیا ہے، تاہم اس سے قبل غیر ہنر مند اور ناخواندہ کارکنوں کو ملک بدر کیا جائے گا جب کہ 1 لاکھ 60 ہزار نئی اسمارٹ بھرتیاں کی جائیں گی۔

اس سلسلے میں ہیومن ریسورس ڈویلپمنٹ کمیٹی نے قانون میں ترمیم کے مسودے اور اس کے حوالے سے قومی اسمبلی کے فیصلے کا جائزہ لینے کے لیے ایک اجلاس بھی منعقد کیا، مسودے کے مطابق حکومت قومی اسمبلی میں سالانہ رپورٹ پیش کرنے کی پابند رہے گی، یہ مسودہ فی الوقت قانون ساز کمیٹی کے پاس ہے۔

کمیٹی کے چیئرمین خلیل الصالح کا کہنا تھا کہ اس قانون کا مقصد یہ ہے کہ حکومت کویت میں غیر ملکی کارکنوں کے لیے ایک حد مقرر کرنے کا طریقہ کار وضع کرے، کرونا کی وبا نے کویت میں آبادیاتی امور کے مسئلے کو اجاگر کیا، نئی قانون سازی کا مقصد بھی یہ ہے کہ آئندہ ایسے مسائل پیدا نہ ہوں، انھوں نے یہ بھی کہا کہ اس قانون کے متعدد فوائد ہیں جن میں غیر ملکی ملازمین کو کنٹرول کرنا سرفہرست ہے۔

انھوں نے کہا یہ قانون کویت میں غیر ملکی کارکنوں کی کارکردگی کی ضمانت فراہم کرے گا، سیکورٹی کی صورت حال بہتر بنائے گا، کارکنوں کی وجہ سے پیش آنے والی پریشانیوں کو کم کرے گا، اور خود کشیوں، قتل اور دھوکا دہی کے واقعات میں کمی آئے گی۔

الصالح کا کہنا تھا کہ امید ہے کہ اس قانون کا نفاذ حقیقی طور پر کیا جائے گا اور بات صرف کاغذات تک محدود نہیں رہے گی۔

کویت سٹی: کویت کے وزیر صحت باسل الصباح نے براہ راست پروازوں کی تجویز پر غور کرنے کا وعدہ کر لیا ہے۔

تفصیلات کے مطابق کویت کے وزیر صحت ڈاکٹر باسل الصباح نے براہ راست پروازوں سے کویت پہنچنے کی تجویز پر غور شروع کر دیا ہے۔

گزشتہ روز کویت ایئرویز نے اعلان کیا تھا کہ وزیر صحت نے کویت ایئرویز اور جزیرا ایئرویز کے نمائندوں کے ساتھ اس سلسلے میں خصوصی ملاقات کی ہے، جس میں براہ راست پروازوں کی اجازت کے سلسلے میں گفتگو ہوئی۔

کویت ایئر ویز کا کہنا تھا کہ وزیر صحت کو براہ راست پروازوں کے ذریعے کویت پہنچنے والے مسافروں کے سلسلے میں وزارت صحت کے منظور شدہ اقدامات کے اطلاق کے حوالے سے تجاویز دی گئیں، جس پر تفصیلی تبادلہ خیال کیا گیا۔

تجاویز میں یہ بھی شامل تھا کہ ایئر پورٹس کو ڈائریکٹ فلائٹس کے لیے کھولا جائے اور مذکورہ دو ایئر لائنز سے کویت آنے والے مسافروں سے ایئرپورٹ پر اترتے ہی کرونا کے 2 پی سی آر ٹیسٹس کے پیسے وصول کیے جائیں یا پھر ٹکٹ میں اسے شامل کیا جائے۔

وزیر صحت نے مذکورہ ایئرلائنز کی تجاویز کے سلسلے میں اپنے مکمل تعاون کا اظہار کیا اور کہا کہ ان پر جلد غور کیا جائے گا۔ ڈاکٹر باسل الصباح نے کہا کہ وزارت صحت کا تکنیکی عملہ ان تجاویز کا ہر طرح سے جائزہ لے گا۔

کویت کے وزیر صحت سے ایئر لائنز کے نمائندوں کی اس ملاقات کے بعد یہ توقع کی جا رہی ہے کہ کویت میں براہ راست پروازوں کا سلسلہ شروع ہو جائے گا۔

کویت سٹی: کویت میں فیس ماسک نہ پہننے پر اب جرمانہ کیا جائے گا۔

تفصیلات کے مطابق کویت کی کابینہ نے فیس ماسک نہ پہننے والوں پر جرمانہ عائد کرنے کا فیصلہ کر لیا ہے۔

اس سلسلے میں کویتی کابینہ نے فتویٰ اور قانون سازی کی کمیٹی کو ایک مسودہ پیش کیا ہے جس میں تجویز دی گئی ہے کہ صحت کے سلسلے میں مقرر قواعد کی خلاف ورزی پر اور کرونا وبا کے پیش نظر ماسک نہ پہننے والوں پر فوری جرمانہ عائد کیا جائے۔

قانونی مسودے کی تجویز کے مطابق کرونا ایمرجنسی کے سلسلے میں فیس ماسک نہ پہننے والوں پر عائد کیا جانے والا فوری جرمانہ 50 سے 100 دینار کے درمیان ہوگا۔

کویت میں قوانین کی خلاف ورزی پر بڑی کارروائی

کابینہ نے گھروں سے باہر موسم بہار کے کیمپوں کے انعقاد پر بھی پابندی کی سفارش کر دی ہے۔

کابینہ میں پیش ہونے والی اس سفارش کو بھی منظور کر لیا گیا ہے کہ شاپنگ مالز، کمپلیکس، کیفے، ریستوران اور ہیلتھ فٹنس کلبز میں داخلہ ایڈوانس بکنگ سے مشروط ہوگا، اس سلسلے میں ہدایات بھی جاری کر دی گئی ہیں کہ مالز، کلبز اور ریستورانز ایڈوانس بکنگ کے بغیر گاہکوں کو قبول نہ کریں۔

ذرایع کے مطابق ملک میں اجتماعات سے نمٹنے اور انھیں روکنے کے لیے وزرا کونسل کی جانب سے وزارت داخلہ کو اختیارات دیے جائیں گے۔

کویت سٹی: کویت کے بینکوں نے رواں ماہ ہی سے تنخواہوں سے قرض کی قسطوں کی کٹوتی کا فیصلہ کر لیا ہے۔

تفصیلات کے مطابق کویت میں بینکوں کی اقساط میں کٹوتی اسی ماہ اکتوبر سے شروع ہوگی، قرضوں کی اقساط کی ادائیگی کی مدت میں توسیع کے سلسلے میں مرکزی یا دوسرے بینکوں کی جانب سے تاحال کوئی ہدایت نامہ جاری نہیں ہوا۔

یہ کہا جا رہا ہے کہ اگر قرضوں کی قسطوں کی ادائیگی میں اس طرح کی کوئی توسیع کی گئی تو اس سے بینکوں کا خسارہ دگنا ہو کر 750 ملین کویتی دینار ہو جائے گا، جس سے بینکوں کے بجٹ پر ناقابل برداشت بوجھ پڑ جائے گا۔

بینکوں کو پہلے ہی اس حوالے سے بہت نقصان اٹھانا پڑا ہے کہ حکومت کی جانب سے کرونا وبا کے پیش نظر کاروبار بند کیے گئے تھے۔

بینک اس صورت میں قرض کی قسطوں کو ملتوی کر سکتے ہیں اگر حکومت اس کی قیمت برداشت کرے، تاہم اس امر کا امکان اس لیے نہیں ہے کیوں کہ اس کی لاگت بہت زیادہ ہے، گزشتہ ماہ ختم ہونے والی 6 ماہ کی مدت کے دوران یہ لاگت تقریباً 380 ملین کویتی دینار تھی۔

ادھر کویتی حکومت فی الوقت اس اضافی اخراجات کو اس لیے برداشت کرنے سے قاصر ہے کہ اسے عوامی اخراجات کے لیے دستیاب کیش لیکویڈیٹی میں شدید کمی کا سامنا ہے، دوسری طرف خسارہ بھی تاریخی سطح پر بڑھ چکا ہے۔

یہ بھی بتایا جا رہا ہے کہ بینکوں کی جانب سے تنخواہوں میں قسطوں کی کٹوتی کو ملتوی کرنے کی خبریں محض افواہیں ہیں۔