Tag: Kuwait

کویت سٹی: کویت کے سرکاری خبر رساں ادارے ’کونا‘کے ٹویٹر اکاؤنٹ کی ہیکنگ کے بارے میں انکشاف ہوا ہے کہ مذکورہ کام ادارے کے افراد میں سے ہی کسی نے کیا ہے۔

کویتی حکومت نے اعلان کیا ہے کہ کویتی خبر رساں ادارے ’کونا‘ کا ٹویٹر اکاؤنٹ باہر سے کسی سے نہیں بلکہ اندر سے ہی ہیک کیا گیا تھا۔

سرکاری بیان کے مطابق ادارے کے 3 افراد پر شبہ ہے کہ انہوں نے ہی کونا کی ویب سائٹ سے یہ خبر جاری کردی تھی کہ امریکی افواج کویتی چھاؤنی چھوڑنے والی ہیں۔

انٹرنیشنل سائبر سیکیورٹی کے ماہرین نے چھان بین کے بعد کہا کہ جس انداز سے کویتی خبر رساں ادارے کونا کا اکاؤنٹ ہیک کیا گیا، وہ روایتی طریقے سے مختلف ہے۔ ٹویٹر اکاؤنٹ پر نجی اکاؤنٹ کو ہیک کیا گیا نہ کہ سرکاری ادارے کے آن لائن انفارمیشن سسٹم کو۔

ماہرین کے مطابق جس انداز سے کونا کو ہیک کیا گیا، اس سے لگتا ہے کہ کونا کے ٹویٹر اکاؤنٹ کنٹرول کرنے والے افراد میں سے کسی ایک کے سمارٹ فون کو ہیک کیا گیا۔

انہوں نے کہا کہ الیکٹرانک لنک بھیج کر اسمارٹ فون کو کھولا گیا اور پھر خفیہ نمبر ڈال کر واردات کی گئی۔ ہیکر نے اکاؤنٹ کھولا یا کسی اور موبائل کے ذریعے اسے اس انداز سے قابو کیا کہ اسمارٹ فون کے مالک کو اس کا اندازہ نہ ہوسکے۔

ذرائع کا کہنا ہے کہ امریکی افواج سے متعلق جھوٹی خبر جاری کرنے کا آپریشن عارضی عمل کا نتیجہ نہیں تھا بلکہ کافی عرصے سے اس پر کام ہو رہا تھا۔

واقعے کے بعد وزارت داخلہ کی اسپیشل ٹیموں نے کونا کے ہیڈ کوارٹر پہنچ کر واقعہ کی تفش کی۔ انہوں نے توجہ دلائی کہ سوشل میڈیا کے ذریعے خبریں جاری کرنے کے لیے کئی آلات استعمال کیے جارہے ہیں۔ ان کی تعداد 3 سے زیادہ ہوسکتی ہے جبکہ ان میں سے ایک غیر ملکی ہے۔

مذکورہ 3 افراد میں سے ایک نے چند دن قبل بھی سلیمانی کے قتل سے متعلق ایک رپورٹ جاری کی تھی اور فوراً ہی اسے کونا کی ویب سائٹ سے ہٹا دیا گیا تھا کیونکہ وہ خبر جاری کر کے اس شخص نے نازک پوزیشن میں ڈال دیا تھا۔

خیال رہے کہ گزشتہ روز کویتی خبر رساں ادارے کونا کے ٹویٹر اکاؤنٹ سے خبر جاری کی گئی کہ امریکا نے اپنی افواج کویت سے نکالنے کا فیصلہ کرلیا ہے۔

تاہم تھوڑی دیر بعد ہی حکومتی ترجمان اور سوشل میڈیا کے سربراہ طارق المزرم نے اعلان کیا تھا کہ کونا کا اکاؤنٹ ہیک کر لیا گیا ہے اور وہاں سے جاری کردہ امریکی افواج کے انخلا کی خبر غلط ہے۔

مذکورہ خبر میں کویت کے نائب وزیر اعظم و وزیر دفاع شیخ احمد المنصور کے حوالے سے لکھا گیا کہ امریکی افواج کے انخلا کا بیان دراصل انہوں نے دیا ہے، تاہم بعد میں کونا نے اس کی بھی تردید کردی۔