لاہور (31 اگست 2025): ڈپٹی کمشنر لاہور نے نوٹیفکیشن جاری کرتے ہوئے کہا ہے کہ شہر میں تعلیمی سرگرمیاں یکم ستمبر سے بحال ہو جائیں گی۔

تفصیلات کے مطابق شدید بارشوں اور سیلاب کے بعد لاہور میں اسکول دوبارہ کھل رہے ہیں، ڈپٹی کمشنر کی جانب سے جاری کردہ نوٹیفکیشن میں کہا گیا ہے کہ تمام اسکول یکم ستمبر سے دوبارہ کھل جائیں گے۔

نوٹیفکیشن کے مطابق سیلاب سے متاثرہ علاقوں کے اسکول اور ریلیف کیمپس بدستور بند رہیں گے، والدین اور طلبہ کو ہدایت کی گئی ہے کہ وہ اسکول انتظامیہ سے رابطے میں رہیں۔

ضلعی انتظامیہ نے کہا ہے کہ تمام اسکول محکمہ تعلیم کی ہدایات پر عمل درآمد کے پابند ہوں گے۔

تعلیمی ادارے 5 ستمبر تک بند رکھنے کا نوٹیفکیشن جاری

واضح رہے کہ آج بھی لاہور اور گرد و نواح میں وقفے وقفے سے بارش کا سلسلہ جاری ہے، بارش سے نشیبی علاقے زیر آب آنے کا خدشہ ہے، جب کہ محکمہ موسمیات نے آئندہ چوبیس گھنٹوں کے دوران مزید بارش کا امکان ظاہر کیا ہے۔

پنجاب کے سیلاب متاثرہ اضلاع میں طوفانی بارشیں ہو رہی ہیں، آج دن بھر وقفے وقفے سے بارش کی پیشگوئی ہے، قصور اور اوکاڑہ میں بھی وقفے وقفے سے بارش کا امکان ہے، ننکانہ صاحب میں بارش سے گلیاں بازار تالاب کا منظر پیش کرنے لگے ہیں۔ ننکانہ کے نواحی گاؤں میں مکان کی چھت گرنے سے خاتون اور دو بچیاں جاں بحق ہو گئیں جب کہ تین افراد زخمی ہو گئے، ملکوال میں شدید بارش کے باعث مکان کی چھت گرنے سے 9 ماہ کا بچہ جاں بحق دو افراد زخمی ہو گئے ہیں۔

لاہور (24 اگست 2025): پی آئی اے روڈ پر زہریلا کھانا کھانے سے 2 بچوں کی ہلاکت کے بعد پولیس نے متعدد افراد کو گرفتار کیا ہے۔

تفصیلات کے مطابق ڈی آئی جی آپریشنز نے پی آئی اے روڈ لاہور پر واقع ریسٹورنٹ رولنگ پیلس میں زہریلا کھانا کھانے سے دو بچوں کی ہلاکت کے واقعے کا نوٹس لیتے ہوئے مقدمہ درج کر لیا ہے، اور ہوٹل مالک سمیت کچن اسٹاف کو گرفتار کر لیا۔

ایف آئی آر کے مطابق لاہور کی فیملی نے 16 اگست کی رات ریسٹورنٹ میں کھانا کھایا تھا، لیکن گھر پہنچتے ہی دونوں بیٹیوں اور ایک بیٹے کی طبیعت خراب ہو گئی، افسوس ناک طور پر دونوں بیٹیاں 18 اور 19 اگست کی رات فوت ہو گئیں، 6 سالہ تحریم اور 4 سالہ ارحا زہریلا کھانا کھانے سے جاں بحق ہوئیں۔

ڈی آئی جی آپریشنز فیصل کامران کے مطابق مقدمہ والد عظیم کی مدعیت میں تھانہ ستوکتلہ میں درج کیا گیا ہے، جس کے بعد ہوٹل مالک اور کچن ملازمین کو گرفتار کیا گیا، واقعے کی تمام پہلوؤں سے تحقیقات کی جا رہی ہیں۔

شوارما کھانے سے متعدد افراد کی حالت غیر ہو گئی

واضح رہے کہ گزشتہ روز پنجاب کے شہر حافظ آباد میں مبینہ طور پر شوارما کھانے سے متعدد افراد کی حالت غیر ہو گئی تھی، فوڈ اتھارٹی کے ترجمان نے بتایا کہ مضر صحت شوارما کھانے سے 3 فیمیلیوں کے 9 افراد متاثر ہوئے ہیں، جو سول اسپتال میں داخل کر دیے گئے ہیں، اور تمام کی حالت خطرے سے باہر ہے۔

پنجاب فوڈ اتھارٹی نے تفصیلی چیکنگ کے بعد شوارما پوائنٹ کو سیل کر دیا، 40 کلو گوشت، 16 لٹر آئل، 15 کلو مایونیز، بھاری مقدار میں فرائز اور سلاد کو تلف کر دیا گیا۔

ادھر گزشتہ رات ٹھٹھہ شہر میں مکلی کے قریب مضر صحت بریانی کھانے سے خاتون اور بچوں کی حالت غیر ہو گئی، اہل خانہ نے بتایا کہ بریانی باہر سے خرید کر کھائی تھی۔ متاثرہ افراد کو جناح اسپتال منتقل کر دیا گیا ہے، خاتون اور 3 بچوں کو نیم بے ہوشی کی حالت میں اسپتال لایا گیا، ریسکیو حکام کا کہنا ہے کہ بریانی باہر سے منگوائی گئی تھی جس کے کھانے کے بعد بچوں کی حالت بگڑنا شروع ہو گئی۔

لاہور (10 اگست 2025): چوہنگ واقعے کے بعد پنجاب کے شہر لاہور میں پولیس نے اجتماعی زیادتی کے ایک اور کیس میں ملزمان کا انکاؤنٹر کر دیا۔

تفصیلات کے مطابق لاہور میں سی سی ڈی پولیس کا اجتماعی زیادتی کے ملزمان سے فائرنگ کا تبادلہ ہوا، جس میں 2 ملزمان ہلاک ہو گئے، جن کی شناخت شعیب اور زبیر کے نام سے ہوئی ہے۔

سی سی ڈی کے مطابق ہلاک ملزمان نے 2 روز قبل مانگا منڈی سے 13 سالہ لڑکی کو اغوا کیا تھا، اور مغوی لڑکی کو اجتماعی زیادتی کا نشانہ بنایا، پولیس کا کہنا ہے کہ ملزمان کی فائرنگ سے سب انسپکٹر شبیر زخمی ہوا، جب کہ انسپکٹر عمران یوسف کی بلٹ پروف جیکٹ پر گولیاں لگیں۔

قبل ازیں، لاہور کے علاقے چوہنگ میں ایک واقعہ شہ سرخیوں کی زینت بنا تھا جس میں 4 ملزمان نے شوہر کے سامنے اس کی بیوی سے اجتماعی زیادتی کی تھی، سی سی ڈی پولیس نے ملزمان سے آمنا سامنا ہونے کے کئی واقعات میں یکے بعد دیگر چاروں ملزمان کو گولیاں مار کر ہلاک کر دیا تھا۔

لاہور : شوہر کے سامنے بیوی سے گینگ ریپ کا چوتھا ملزم بھی انجام کو پہنچ گیا

ادھر نارووال میں 2 خطرناک ملزمان سی سی ڈی حراست سے فرار ہو گئے ہیں، پولیس کا کہنا ہے کہ ملزمان قتل، ڈکیتی کی درجنوں وارداتوں ملوث میں تھے، دوران ریکوری ملزمان کے 4 ساتھیوں نے کریل پل پر فائرنگ کی، اس دوران دونوں خطرناک ملزمان ساتھیوں سمیت فرار ہو گئے، جب کہ ایک اہلکار فائرنگ سے زخمی ہوا۔

لاہور(7 اگست 2025):کاہنہ پولیس نے 72گھنٹے میں مختلف کارروائی کے دوران 17 ملزمان کو گرفتار کرلیا۔

تفصیلات کے مطابق لاہور میں کاہنہ پولیس نے 72گھنٹے میں 17 ملزمان کو گرفتار کرلیا، گرفتار ملزمان میں 6 منشیات فروش، 3 ریکارڈ یافتہ اور 4 اشتہاری شامل ہیں۔

پولیس کا کہنا ہے کہ گرفتار ملزمان میں 2 ہوائی فائرنگ،2 ملزمان اسلحہ رکھنے والے بھی شامل ہیں جبکہ منشیات فروشوں سے 3 کلو سے زائد آئس اور 2 کلو 300 گرام چرس برآمد ہوا۔

لاہور پولیس کا کہنا ہے کہ گرفتار اشتہاری اقدام قتل، غیر قانونی اسلحہ سمیت دیگر 6 مقدمات میں مطلوب تھے، ریکارڈ یافتہ ملزمان چوری، بوگس چیک و دیگر 19 مقدمات میں ریکارڈ یافتہ ہیں،گرفتار 2 ملزمان سے 4 پستول، میگزینز و گولیاں برآمد ہوا۔

اس سے قبل لاہور چوکی میو اسپتال پولیس نے منشیات فروشوں کیخلاف کارروائی کے دوران ریکارڈ یافتہ سمیت 2 منشیات فروش کو گرفتار کیا تھا۔

ملزمان کو دوران  پیٹرولنگ مختلف مقامات سے گرفتار کیا گیا، پولیس کے مطابق ملزمان سے ہزاروں مالیت کی 1100 گرام چرس اور 305 گرام آئس برآمد کر لی گئی، گرفتار ملزمان میں طارق اور عثمان عرف پیا شامل ہیں۔