لاہور : زندہ دلان شہر لاہور کو دنیا کے تخلیقی شہروں میں شامل کرلیا گیا ، یونیسکو کے ڈائریکٹرجنرل کا کہنا ہے کہ لاہورمیں ادب کی پھلتی پھولتی روایات اور شہر کی تاریخی عمارتیں اورثقافت کی وجہ سے یہ تخلیقی شہرہے۔
تفصیلات کے مطابق زندہ دلان شہر لاہور کو بڑا اعزاز مل گیا ، یونیسکو نے لاہور کو دنیا کے تخلیقی شہروں میں شامل کرلیا، عالمی ثقافتی ورثے کی تنظیم یونیسکو نے لاہور کو ادب کے درجے میں شامل کیا۔
یونیسکوکے ڈائریکٹرجنرل اوڈرے ازولے کے مطابق لاہور میں ادب کی پھلتی پھولتی روایات اورشہر کی تاریخی عمارتیں اورثقافت کی وجہ سے یہ تخلیقی شہر ہے، اس کیٹیگری میں دنیا بھر کے چھیاسٹھ شہر شامل ہیں۔
آدرے آزولے کا کہنا تھا کہ پوری دنیا میں یہ شہر ثقافت کو اپنی حکمت عملی کا ایک ستون بناتے ہیں اور یہ سیاسی اور معاشرتی جدت کے حق میں ہیں جو نوجوان نسل کے لئے انتہائی اہم ہے۔ ان نئے شہروں کے اعلان کے بعد اب یونیسکو کے تخلیقی شہروں کے نیٹ ورک کی کل تعداد 246 ہوگئی ہے۔
انھوں نے مزید کہا وہ شہر جو اس نیٹ ورک کا حصہ بنتے ہیں تمام براعظموں اور خطوں سے مختلف آمدنی اور آبادی پر مشتمل ہوتے ہیں۔ وہ مشترکہ مشن کے حصول کیلئے مل کر کام کرتے ہیں تاکہ پائیدار ترقی کے لئے اقوام متحدہ کے 2030 کے ایجنڈے اور اہداف کو حاصل کیا جاسکے۔
دوسری جانب کمشنر کا کہنا ہے کہ لاہور یونیسکو کریٹیو سٹی نیٹ ورک میں شامل ہوا ، لاہور پہلا شہر ہے جس کو عالمی سطح پر اعزاز ملاہے، رواں سال یونیسکو کریٹیو سٹی میں لاہور سمیت 66 شہروں کو شامل کیا گیا، ہمیں دعوت ملی تھی جس کے بعد ہم نے درخواست دی۔
یاد رہے رواں سال جولائی میں پاکستان تاریخی شالا مارباغ کو خطرناک عمارتوں میں شامل ہونے سے بچانے میں کام یاب ہو گیا تھا اور عالمی ورثہ کمیٹی نے پاکستان کا مؤقف تسلیم کرلیا تھا۔
واضح رہے کہ یونیسکو اقوام متحدہ کا ایک ادارہ ہے جو عالمی سطح پر تعلیم، سائنس اور ثقافت سے متعلق معاملات دیکھتا ہے۔