لاہور: لاہور ہائیکورٹ نے ماڈل عبیرہ قتل کیس کی مرکزی ملزمہ طوبی کی یوسف کھوکھر نامی صحافی کے قتل کیس میں ضمانت منظور کرلی۔
جسٹس عبدالسمیع خان نے کیس کی سماعت کی، ملزمہ طوبی کی جانب سے عدالت کو بتایا گیا کہ یوسف کھوکھر نامی صحافی کے قتل سے کوئی تعلق نہیں، پولیس نے کئی ماہ پہلے ہونے والے قتل کے مقدمے میں بعد میں اسے ملوث کیا، جس کا پولیس کے پاس کوئی ثبوت موجود نہیں۔
ملزمہ کے وکیل نے عدالت کو بتایا ایف آئی آر میں کہا گیا کہ یوسف کھوکھر کو زہر دے کر قتل کیا گیا ہے مگر میڈیکل رپورٹ میں ایسی کوئی چیز ثابت نہیں ہوسکی لہذا عدالت ضمانت منظور کرے۔
عدالت نے ملزمہ کو ایک ایک لاکھ کے دو مچلکے جمع کرانے کا حکم دیتے ہوئے ضمانت منظور کرلی۔
ملزمہ طوبی کی یوسف کھوکھر کے قتل کیس میں ضمانت منظور ہوئی تاہم ابھی تک ماڈل عبیرہ قتل کیس میں ضمانت منظور نہیں ہوسکی۔
