لاہور: پی ٹی آئی رہنما فرخ حبیب کا کہنا ہے کہ مخصوص نشستوں سے متعلق عدالتی فیصلے کے بعد پنجاب اسمبلی میں نمبر گیم بھی واضح ہوجائے گا۔
تفصیلات کے مطابق لاہور ہائی کورٹ کے باہر میڈیا سے گفتگو کرتے ہوئے فرخ حبیب نے کہا کہ پنجاب اسمبلی کی مخصوص نشستوں پر لاہور ہائیکورٹ کافیصلہ بہت اہم ہے، آج ہمارے الیکشن کمیشن سےمتعلق تحفظات درست ثابت ہوئے اور الیکشن کمیشن کے فیصلوں کا معیار سب کےسامنےعیاں ہوگیا۔
پی ٹی آئی رہنما نے کہا کہ آئین کے آرٹیکل دو سو چوبیس میں بہت واضح لکھا ہواہے کہ جس پارٹی کی مخصوص نشست خالی ہوگی اس کا ممبر اسمبلی بن جائیگا، الیکشن کمیشن کی جانب سے نوٹیفکیشن جاری نہ کرنا غیر آئینی تھا۔
یہ بھی پڑھیں:پنجاب اسمبلی کی مخصوص نشستوں سے متعلق لاہور ہائی کورٹ کا بڑا فیصلہ
فرخ حبیب نے کہا کہ الیکشن کمیشن کے جتنے بھی فیصلے آرہے ہیں ان کےمعیار کو دیکھنا چاہیے، دیکھنا چاہیے کہ وہ کس قسم کے فیصلے کررہےہیں؟ الیکشن کمیشن کو جھکاؤ رکھنے کی ضرورت نہیں یہ آئینی ادارہ ہے۔
واضح رہے کہ آج لاہور ہائی کورٹ نے پنجاب اسمبلی کی مخصوص نشستوں سے متعلق دائر درخواست پر تاریخ ساز فیصلہ دیا تھا۔
عدالت عالیہ نے پنجاب اسمبلی کی پانچ مخصوص نشستوں پر نوٹی فیکیشن جاری کرنے سے متعلق پی ٹی آئی کی درخواست کو منظور کرتے ہوئے الیکشن کمیشن کو جلد ان نشستوں پر نوٹی فیکیشن جاری کرنے کا حکم دیا جو کہ پاکستان تحریک انصاف کا مطالبہ تھا۔
