پنجاب : لاہور سمیت پنجاب کے مختلف شہروں میں بارش نےگرمی کا زور توڑ دیا، وہیں شہریوں کی مشکلات میں اضافہ بھی کردیا ہے۔
پنجاب بھر میں سیلابی ریلوں کی تباہ کاریاں جاری تھیں کہ برستے بادلوں نے پنجاب کو دوبارہ اپنی لپیٹ میں لے لیا ہے، لاہور، فیصل آباد، گوجرانوالا، سرگودھا سمیت مختلف شہروں میں جہاں برسات اور سیلاب کا پانی بمشکل نکلا ہی تھا، وہاں سڑکیں دوبارہ زیر آب آگئیں، نشیبی علاقوں میں گلی محلے ندی نالوں کا منظر پیش کرنے لگے ہیں۔
جھنگ،سرگودھا سمیت اُن شہروں اور دیہات میں جہاں سیلابی ریلوں نے شدید تباہی مچا رکھی ہے، بارش نے متاثرین کی مشکلات مزید بڑھا دیں جبکہ حادثات میں بھی اضافہ ہوگیا ہے۔
سرگودھا کے نواحی علاقے جھاوریاں میں چھت گرنے سے ایک ہی خاندان کے چار افراد جان سے گئے، دوسری جانب چاول سمیت پہلے تباہی سے بچ جانے والی باقی ماندہ فصلیں بھی متاثر ہوئیں ہیں۔
محکمہ موسمیات نے گلگت، آزادکشمیر سمیت پنجاب بھرمیں بارش کا سلسلہ وقفے وقفے سے جاری رہنے کی پیش گوئی کی ہے۔
