لاہور: لاہور کے علاقے ہنجروال میں نشے کی لت میں مبتلا ایک شخص نے اپنی ہی فیملی پر حملہ کر کے انھیں زخمی کر دیا۔

تفصیلات کے مطابق لاہور کے علاقے ہنجروال میں نشے سے روکنے پر نشہ میں مبتلا شخص نے بیوی بچوں پر چھری سے حملہ کر دیا۔

پولیس کے مطابق واقعہ منگل کی شب پیش آیا جب افتخار نامی شخص نے نشے کی حالت میں اہل خانہ سے جھگڑے کے بعد ان پر حملہ کیا۔ حملے کے نتیجے میں مریم بی بی، ان کی بیٹی ماہم اور بیٹا ابوبکر شدید زخمی ہو گئے، جنھیں فوری طور پر طبی امداد کے لیے جناح اسپتال منتقل کیا گیا، پولیس حکام کے مطابق ماں اور بیٹے کی حالت تشویش ناک ہے۔

اربوں روپے کی جعلی الاٹمنٹس، سی ڈی اے کے 5 افسران گرفتار

واقعے کے بعد ملزم افتخار موقع سے فرار ہو گیا، جس کی گرفتاری کے لیے پولیس کی جانب سے مختلف مقامات پر چھاپے مارے جا رہے ہیں۔ پولیس کا کہنا ہے کہ مقدمہ درج کر کے تفتیش کا آغاز کر دیا گیا ہے، اور جلد ہی ملزم کو گرفتار کر کے قانون کے کٹہرے میں لایا جائے گا۔

یاد رہے کہ 12 اپریل کو لاہور میں مالکن کے مبینہ تشدد سے گھر میں کام کرنے والی کمسن ملازمہ جاں بحق ہو گئی تھی، پولیس کے مطابق یہ واقعہ لاہور کے علاقے ہنجروال میں پیش آیا جہاں ایک ظالم مالکن کے مبینہ تشدد سے گھر میں کام کرنے والی ملازمہ جاں بحق ہو گئی۔ مدعی کے مطابق کام ٹھیک نہ کرنے پر بچی کو مالکن اور اس کے خاوند نے قتل کیا تھا۔

لاہور: لاہور بھر میں مختلف سیکیورٹی چیلنجز کے باعث آپریشن ونگ افسران اور پولیس جوان اتوار کو بھی ڈیوٹی پر مستعد رہے۔

تفصیلات کے مطابق لاہور میں مختلف سیکیورٹی چیلنجز کی وجہ سے 15 ہزار سے زائد اہلکار تعینات کیے گئے ہیں، اور اس سلسلے میں بنائے گئے سیکیورٹی پلان پر مکمل عمل درآمد جاری ہے، گزشتہ روز بھی ڈی آئی جی آپریشنز نے تمام مقامات کے مسلسل دورے کیے، اور سیکیورٹی پلان پر عمل درآمد کا جائزہ لیا۔

ڈی آئی جی آپریشنز تمام مقامات پر خود پہنچے، اور تمام افسران بھی مسلسل فیلڈ میں رہے، چرچ، پی ایس ایل، اور مینار پاکستان کانفرنس سمیت سب جگہ پولیس مکمل الرٹ رہی۔

ڈی آئی جی آپریشنز فیصل کامران کے مطابق پی ایس ایل میچ اور کانفرنس کے شرکا کو بھی سیکیورٹی فراہم کی گئی، پی ایس ایل انتظامات پر 9087 اہلکار و افسران تعینات ہیں، جب کہ مینار پاکستان کانفرنس پر 1588 اہلکار و افسران تعینات کیے گئے۔

فیصل کامران کے مطابق ایلیٹ فورس، ڈولفن، پی آر یو سمیت تھانوں کی گاڑیاں پٹرولنگ پر مامور ہیں، شرکا کو چیکنگ کے بعد ہی داخلے کی اجازت دی جا رہی ہے، انھوں نے کہا کہ آپریشنز ونگ سیکیورٹی چیلنجز کے ساتھ جرائم کنٹرول پر بھی مکمل متحرک ہے۔

لاہور: قدیمی لاہور کو محفوظ بنانے کے لیے 5 کلو میٹر لمبی فصیل اور مغلیہ طرز پر باغ بنانے کا فیصلہ کیا گیا ہے۔

ذرائع محکمہ بلدیات کے مطابق قدیمی لاہور کے گرد 20 فٹ اونچی ساڑھے 5 کلو میٹر طویل مضبوط فصیل بنانے کا فیصلہ کیا گیا ہے، یہ فیصلہ پیٹرن انچیف لاہور اتھارٹی فار ہیریٹیج ریوائل نواز شریف کی مشاورت سے کیا گیا۔

پنجاب حکومت قدیمی شہر لاہور کے گرد مغلیہ دور کے طرز کا باغ بھی بنائے گی، فصیل 4 ارب 80 کروڑ 29 لاکھ کی لاگت سے سرکلر روڈ کے ساتھ تعمیر ہوگی، شہر کے 12 دروازوں کے حسن کی بحالی کے لیے بھی پی سی ون تیار کر لیے گئے، ہیریٹیج زون، مال روڈ، انار کلی، نیلا گنبد اور ملحقہ علاقوں کا سروے بھی مکمل کر لیا گیا ہے۔

قدیم لاہور کی بحالی کے لیے پی سی ونز کو حتمی شکل دے دی گئی ہے، لاہور کے ہیریٹیج ایریاز کی بحالی کے لیے شہر کو 6 زونز میں تقسیم کیا گیا ہے، اندرون لاہور اور ملحقہ علاقوں میں انڈر گراؤنڈ پارکنگ بنائی جائے گی، بھاٹی گیٹ، شاہ عالم مارکیٹ، موچی گیٹ، دہلی گیٹ، شیرانوالہ گیٹ کے قریب نئی پارکنگ بنائی جائے گی۔

ذرائع محکمہ بلدیات کا کہنا ہے کہ شاہ عالم گیٹ، یکی گیٹ، موچی گیٹ اور اکبری گیٹ کو دوبارہ تعمیر کیا جائے گا، شاہ عالم مارکیٹ تا بھاٹی چوک تک پیدل گرز گاہ بھی بنائی جائے گی۔

ذرائع کے مطابق تجاوزات کو مستقل طور پر ختم کر کے فصیل بنائی جانے کا فیصلہ کیا گیا ہے، حکومت پنجاب نے لاہور میں سیاحت کے فروغ، اور ورثے کے تحفظ کے لیے میگا پلان تشکیل دیا ہے۔