Tag: Lasbela

لسبیلہ: بلوچستان کے ضلع لسبیلہ میں سیلابی پانی میں گھرے ایک خاندان کی حکومت سے فریاد سوشل میڈیا پر وائرل ہو گئی ہے۔

تفصیلات کے مطابق لسبیلہ میں سیلابی پانی میں گھرے ایک مصیبت زدہ خاندان نے حکومت سے ایک ویڈیو کے ذریعے درخواست کی ہے کہ ان کے خاندان کو ہنگامی بنیادوں پر ہیلی کاپٹر کے ذریعے ریسکیو کیا جائے۔

فیملی کے سربراہ خیر محمد نے اپنا فون نمبر 03337015350 بھی دیا اور کہا ان سے اس پر رابطہ کیا جا سکتا ہے۔

واضح رہے کہ بلوچستان ضلع لسبیلہ کے قریب اودگی میں بہت سے دیہات میں گھر زیر آب آ چکے ہیں، زیر آب گاؤں کے علاقہ مکینوں نے بھی مدد کی اپیل کی ہے۔

ادھر چیئرمین این ڈی ایم اے نے ایک بیان میں گزشتہ شام کو بتایا کہ لسبیلہ کے بارش سے متاثرہ علاقوں میں ریسکیو آپریشن کے لیے 2 ہیلی کاپٹر روانہ کیے جا رہے ہیں، تاہم موسم ٹھیک ہوتے ہی فضائی آپریشن بذریعہ ہیلی کاپٹر شروع کیا جائے گا۔

ان کا کہنا تھا کہ متاثرہ علاقوں میں فضائی آپریشن کے سلسلے میں کمشنر قلات ڈویژن اور ڈی جی پی ڈی ایم اے سے مسلسل رابطے میں ہیں۔

پی ڈی ایم اے کی امدادی ٹیموں نے بیلہ کے علاقے کاروان میں سیلابی پانی میں پھنسے 50 افراد کو ریسکیو کیا، جن میں خواتین اور بچے بھی شامل تھے۔

پی ڈی ایم اے بلوچستان کی ٹیمیں ڈائریکٹر فیصل طارق کی نگرانی میں اوکڑی سوکان میں بھی ریسکیو آپریشن کر رہی ہیں۔

مشیر برائے پی ڈی ایم اے بلوچستان میر ضیاء لانگو نے بتایا کہ حکومت بلوچستان پھنسے ہوئے لوگوں کی حفاظت کے لیے تمام وسائل بروئے کار لا رہی ہے۔