امریکا میں طیارہ حادثے میں جان کی بازی ہارنے والی خاتون پائلٹ این تھو نیوین کا موت سے قبل آخری پیغام منظر عام پر آگیا۔
غیر ملکی ذرائع ابلاغ کے مطابق امریکی ریاست انڈیانا میں چھوٹا طیارہ گر کر تباہ ہوگیا، حادثے میں خاتون پائلٹ ہلاک ہوگئی، اپنی موت سے قبل اس نے فیس بک پر آخری ویڈیو شیئر کی تھی جو سوشل میڈیا کی زینت بن گئی۔
امریکی میڈیا کا کہنا ہے کہ 44 سالہ ویتنامی پائلٹ این تھو نیوین کا طیارہ انڈیانا کے شہر گرین ووڈ میں کریش کرگیا تھا، وہ تنہا دنیا کا چکر لگانے والی پہلی ویتنامی خاتون پائلٹ بننے کے مشن پر تھی۔
رپورٹس کے مطابق طیارہ گرنے کا حادثہ انڈی ساؤتھ گرین ووڈ ایئرپورٹ سے روانگی کے فوراً بعد پیش آیا، طیارہ فضا سے گھومتا ہوا ایک پیٹرول پمپ کے پیچھے گر گیا، خاتون پائلٹ طیارے میں تنہا تھی، جو موقع پر ہی ہلاک ہوگئی۔
خاتون نے اپنے آخری پیغام میں کہا تھا کہ میں آج انڈیانا سے پنسلوانیا کیلئے اپنی دوسری پرواز پر روانہ ہورہی ہوں، اس موقع پر میں کافی خوش ہوں، آپ سب سے گزارش ہے اس سفر میں میرا ساتھ دیں کیونکہ میں ایک تاریخ رقم کرنے روانہ ہورہی ہوں۔
ان کا کہنا تھا کہ ”یہ صرف ایک پرواز نہیں، ایک مشن ہے اگلی نسل کی ایشیائی خواتین پائلٹس اور انجینئرز کے لیے، آئیے ہم سب آگے بڑھتے رہیں۔”
ایئرانڈیا کریش: کیا بھارت نے برطانوی شہریوں کی جگہ کسی اور کی باقیات فیملیز کو دیں؟
واضح رہے کہ ویتنامی پائلٹ کا یہ سفر 27 جولائی کو امریکی شہر اوشکوش، وسکونسن سے شروع ہوا تھا۔ انڈیانا کے بعد ان کی اگلی منزل پنسلوانیا تھی، جہاں پہنچنے سے قبل ہی یہ افسوسناک حادثہ رونما ہوگیا تھا۔
رپورٹس کے مطابق این تھو نیوین نے پرڈیو یونیورسٹی سے ریاضی میں بیچلر اور ایروناٹکس و ایسٹروناٹکس میں ماسٹرز کیا، جبکہ جارجیا ٹیک سے ایرواسپیس انجینئرنگ میں ڈاکٹریٹ کی ڈگری حاصل کی، وہ ڈریگن فلائٹ ٹریننگ اکیڈمی کی چیف انسٹرکٹر بھی تھیں۔
