برازیلا: برازیل کے صدر جیر بولزونرو کا تیسری بار بھی کرونا ٹیسٹ مثبت آگیا، ڈاکٹرز نے انہیں مکمل آئسولیشن میں جانے کا مشورہ دے دیا۔
بین الاقوامی میڈیا رپورٹ کے مطابق برازیلین صدر کا 7 جولائی کو پہلا کرونا ٹیسٹ مثبت آیا تھا جس کے باوجود انہوں نے احتیاطی تدابیر پر عمل نہیں کیا۔
برزیلین حکام نے تصدیق کی کہ طبیعت میں بہتری کے باوجود 7 جولائی سے 23 جولائی تک جیربولزونرو کے تین کرونا ٹیسٹ ہوئے جن کی رپورٹیں مثبت آئیں۔
یاد رہے کہ برازیلین صدر کرونا کو عام زکام کہہ چکے ہیں جس پر انہیں کافی تنقید کا سامنا کرنا پڑا تھا کیونکہ برازیل میں کرونا کی صورت حال بدستور تشیوشناک ہے۔
مزید پڑھیں: برازیل کے صدر کرونا کا شکار
یاد رہے کہ کرونا سے متاثر ہونے اور مرنے والے افراد کی تعداد میں یومیہ بنیادوں پر اضافہ دیکھنے میں آرہا ہے اور سب سے تشویشناک بات یہ ہے کہ ویکسین کے معاملے میں اب تک کوئی پیشرفت سامنے نہیں آسکی۔
بین الاقوامی اعداد و شمار کے مطابق دنیا بھر میں کرونا سے متاثر ہونے والے افراد کی تعداد ڈیڑھ کروڑ 99 ہزار 660 سے تجاوز کرچکی ہے جبکہ مرنے والوں کی تعداد 6 لاکھ 19 ہزار 609 تک پہنچ گئی ہے۔
دنیا بھر میں کرونا کے 53 لاکھ 63 ہزار 591 مریض اسپتالوں، قرنطینہ مراکز میں زیرِ علاج اور گھروں میں آئسولیشن میں ہیں، جن میں سے 63 ہزار 637 کی حالت تشویش ناک ہے جبکہ 91 لاکھ 16 ہزار 460 افراد وائرس سے صحت یاب بھی ہو چکے ہیں۔
