کیا آپ جانتے ہیں آج دنیا بھر میں قہقہہ لگانے اور ہنسنے کا عالمی دن منایا جارہا ہے؟ ماہرین کا ماننا ہے کہ ذہنی دباؤ سے نجات پانے کے لیے قہقہہ سب سے آسان تھراپی ہے۔
ہنسنے اور قہقہہ لگانے کا عالمی دن ہر سال مئی کے پہلے اتوار کو منایا جاتا ہے، اس دن کو منانے کا آغاز سنہ 1998 سے بھارت سے تعلق رکھنے والے ایک ڈاکٹر مدن کتریا کی بدولت ہوا۔
ڈاکٹر مدن دنیا بھر میں لافٹر یوگا موومنٹ کے بانی تھے اور انہوں نے انسانی جسم پر قہقہے کے مثبت اثرات کا بغور مطالعہ کر رکھا تھا۔
ماہرین کہتے ہیں کہ ہنسنا ہماری صحت کے لیے اتنا ہی ضروری ہے جتنا ورزش کرنا، یا صحت مند غذا کھانا، اس کی وجہ دراصل ہنسنے مسکرانے کے وہ فوائد ہیں جو بہت سے لوگ نہیں جانتے۔
آئیں آج ہم آپ کو بتاتے ہیں کہ ہنسنے کے کیا فوائد ہیں۔
طبی طور پر فائدہ مند
ماہرین کے مطابق زور دار قہقہہ لگانا یا ہنسنا صحت کے لیے فائدہ مند ہے۔
قہقہہ لگانے سے جسم کا دوران خون تیز ہوتا ہے، یادداشت بہتر ہوتی ہے، قہقہہ قوت مدافعت کو بہتر کر کے جسم کو دل کے امراض سے لڑنے میں مدد فراہم کرتا ہے، اور دماغی تناؤ کو وقتی طور پر ختم کر کے دماغ کو ہلکا پھلکا کردیتا ہے۔
ماہرین کے مطابق اگر آپ کسی کے سامنے جعلی ہنسی بھی ہنسیں گے تب بھی آپ کو یہی فوائد حاصل ہوں گے۔
لڑائی جھگڑوں سے بچت
اگر کسی سے سنجیدہ بحث یا لڑائی کے دوران آپ ہنس پڑیں تو آپ کسی بڑے جھگڑے سے بچ سکتے ہیں۔ بعض دفعہ چھوٹی بات پر کی جانے والی بحث بھی بڑے جھگڑے میں تبدیل ہوجاتی ہے، ہنسنا اس جھگڑے سے بچاتا ہے۔
ذہنی تناؤ سے نجات
اگر آپ ذہنی طور پر پریشان ہیں، اداس ہیں یا ڈپریسڈ ہیں تو کوئی اچھی مزاحیہ فلم دیکھیں۔ فلم کے دوران ہنسنے سے آپ کے دماغ کے ان کیمیائی مادوں کا خاتمہ ہوجائے گا جو تناؤ کا سبب بنتے ہیں اور یوں آپ کا دماغ پرسکون ہوجائے گا۔
فلم ختم ہونے کے بعد آپ کو احساس ہوگا کہ آپ کا ذہنی تناؤ اور اداسی ختم ہوچکی ہے۔ اب آپ پرسکون ہو کر اپنی ٹینشن کا منطقی حل سوچ سکتے ہیں۔
خوف میں کمی
ماہرین کے مطابق خوفناک چیزوں پر ہنسنے سے ان کا خوف کم ہوجاتا ہے۔ اگر کوئی ہارر فلم دیکھتے ہوئے اس کے کرداروں کو مزاحیہ کردار سمجھ کر ان پر ہنسا جائے تو اس سے خوف کم ہوجائے گا اور فلم کے بعد بھی خوف کے اثرات محسوس نہیں ہوں گے۔
بوریت کا خاتمہ
ہنسنا آپ کی بوریت کو بھی ختم کرتا ہے۔ اگر آپ بوریت محسوس کر رہے ہیں تو پرانی خوشگوار یادوں کو یاد کر کے ان پر ہنسیں۔ اس سے آپ کی بوریت ختم ہوجائے گی۔
اسی طرح اگر آپ کسی کے ساتھ مل کر بور ہو رہے ہیں کیونکہ آپ کے پاس کرنے کو کچھ نہیں تو آپ ایک دوسرے کو اپنی خوشگوار یادیں سنا کر ہنسا سکتے ہیں۔
