کراچی : متحدہ قومی موومنٹ کے کنوینئر خالد مقبول صدیقی نے کہا ہے کہ جاگیرداروں اور موروثی سیاست سے ملک میں تبدیلی نہیں لائی جاسکتی۔
یہ بات انہوں نے کراچی میں ایم کیوایم کے مرکز بہادر آباد پر وکلاء کنونشن سے خطاب کرتے ہوئے کہی۔ انہوں نے کہا کہ انصاف کی فراہمی میں ہی ریاست کا استحکام ہے۔
خالد مقبول صدیقی نے کہا کہ پاکستان ان کے ہاتھ میں آیا جو تاریخ کے بہترین غلام اور بدترین آقا ثابت ہوئے یہاں کا آئین معذور، قانون مجبور، انصاف مفرور ہے، اسمبلیوں میں بیٹھے لوگوں کی ضمیر برائے فروخت کی تختیاں لگی ہیں۔
انہوں نے کہا کہ کمزور معاشرے جاگیرداروں سرمایہ داروں کے لیے قانون بناتے ہیں، خان ہو، زرداری یا شریف ان سے کہا ہے کہ پہلے اسمبلیوں میں تبدیلی لائیں، جہاں چند خاندان نمائندگی کررہے ہوں وہاں کیسا انصاف اور کیسی تبدیلی۔
خالد مقبول صدیقی کا کہنا تھا کہ جس نے کبھی لاڑکانہ کے نلکوں کا پانی بھی نہ پیا ہو وہ عام شہری کیلئے کیا قانون بنائے گا؟ یہ نظام جبر، جاہلیت اور ملائیت پر پلتا ہے۔
متحدہ کنوینئر نے کہا کہ اگر آپ کی عدالتیں آزاد ہیں تو گھر پر آرام سے جاکر سوجائیں، اگرعدالت آزاد نہیں تو ہم سب کو کھڑا ہونا ہوگا، آئین خود کو محفوظ نہ رکھ سکا تو پاکستان کو کیسے محفوظ رکھ سکتا ہے۔
اپنے خطاب میں ان کا کہنا تھا کہ ملک میں ٹیکس دینے کا ٹھیکہ صرف کراچی نے نہیں لیا، بلدیاتی انتخابات میں ہماری خیرات سے کچھ لوگ کامیاب ہوئے، کامیاب ہونے والے اس شہر کے نمائندے نہیں۔
انہوں نے مزید کہا کہ کراچی میں نئی حلقہ بندیوں اور ووٹر لسٹوں کے ساتھ نئے الیکشن کا مطالبہ کررہے ہیں، ہم سب کو دعوت دیتے ہیں کہ آئیں اور ہمارا ساتھ دیں۔
