ARYNews.tv | Urdu – Har Lamha Bakhabar

Tag: leave Lebanon

  • برطانیہ کی اپنے شہریوں کو فوری لبنان چھوڑنے کی ہدایت

    برطانیہ کی اپنے شہریوں کو فوری لبنان چھوڑنے کی ہدایت

    اسرائیل فوج کی جانب سے لبنان میں حزب اللہ کے ٹھکانوں کو نشانہ بنایا جارہا ہے، ایسے میں برطانیہ کی حکومت نے اپنے شہریوں کو فوری لبنان چھوڑنے کی ہدایت جاری کردی ہے۔

    بین الاقوامی خبر رساں ادارے کی رپورٹ کے مطابق برطانیہ کے سیکرٹری خارجہ ڈیوڈ لیمی کا کہنا ہے کہ لبنان میں زمینی صورتحال تیزی سے تبدیل ہورہی ہے۔

    اُنہوں نے کہا کہ آنے والے گھنٹوں اور دنوں میں معاملات خراب ہو سکتے ہیں، بیروت پر اسرائیلی حملے کے بعد مشرق وسطیٰ میں تشدد بڑھنے کے خدشات ہیں۔

    برطانوی میڈیا کے مطابق لبنان چھوڑنے کے خواہشمند افراد کی مدد کے لیے ریپڈ رسپانس یونٹ قائم کردیا گیا ہے۔

    میڈیا رپورٹ کے مطابق قبرص میں 700 فوجی تعینات ہیں اور برطانوی شہریوں کے لیے کمرشل پروازوں میں سیٹیں بک کرائی گئی ہیں۔

    دوسری جانب متحدہ عرب امارات کی دو بڑی فضائی کمپنیوں ایمریٹس اور فلائی دبئی نے لبنان میں جنگی صورتحال کے باعث فلائٹ آپریشن کی معطلی میں توسیع کردی۔

    فلائی دبئی کے ترجمان کا اس حوالے سے کہنا ہے کہ دبئی ایئرپورٹ سے بیروت کے لیے پروازیں 7 اکتوبر تک منسوخ کی گئی ہیں۔

    واضح رہے کہ ایمریٹس اور فلائی دبئی نے لبنان کیلیے منگل 24 ستمبر کو فلائٹ آپریشن عارضی طور پر معطل کرنے کا اعلان کیا تھا۔

    فلائی دبئی کے ترجمان کا کہنا تھا کہ لبنان کی صورتحال کو دیکھ رہے ہیں،صورتحال کے مطابق اپنی پروازوں کے شیڈول میں تبدیلی کریں گے۔

    ’اسرائیل کے حملے بند نہ ہوئے تو اقوام متحدہ طاقت کے استعمال کی سفارش کرے‘

    ترجمان کے مطابق مسافروں اور کیبن کریو کی سیفٹی ہماری اولین ترجیح ہے۔ مسافر، ری بکنگ یا ٹکٹ کی قیمت کی واپسی کے لیے فلائی دبئی کے کال سینٹر یا ٹریول ایجنٹ سے رابطہ کر سکتے ہیں۔

  • سعودی عرب کی اپنے شہریوں کو اہم ہدایت

    سعودی عرب کی اپنے شہریوں کو اہم ہدایت

    لبنان اور اسرائیل کے ایک دوسرے پر راکٹ حملوں کے بعد مشرق وسطیٰ میں صورت حال مزید کشیدہ ہو گئی ہے۔ سعودی عرب نے بھی اپنے شہریوں کو لبنان چھوڑنے کی ہدایت کر دی۔

    بین الاقوامی خبر رساں ادارے کی رپورٹ کے مطابق ریاض سے سعودی وزارت خارجہ نے اپنے اعلامیہ میں کہا ہے کہ سعودی شہری لبنان کا سفر کرنے سے گریز کریں۔

    سعودی وزارت خارجہ نے کہا کہ لبنان میں سعودی سفارتخانہ جنوبی علاقے کی پیشرفت پر گہری نظر رکھے ہوئے ہے۔

    اس سے قبل امریکا، برطانیہ اور سوئیڈن نے اپنے شہریوں کو لبنان چھوڑنے کی ہدایت کر دی ہے، بیروت میں امریکی سفارت خانے سے جاری بیان میں کہا گیا ہے کہ شہری کسی بھی دستیاب پرواز سے لبنان سے فوری نکلنے کی کوشش کریں۔

    برطانوی وزیر خارجہ ڈیوڈ لیمی نے کہا ہے کہ خطے میں تناو بہت زیادہ ہے، صورت حال تیزی سے بگڑ سکتی ہے، شہریوں کو پیغام ہے کہ وہ لبنان سے فوراً نکل جائیں۔

    سوئیڈن نے بیروت میں سفارت خانہ بند کر دیا ہے، سوئڈش وزیر خارجہ کا کہنا ہے کہ مشرقی وسطیٰ میں تنازع پھیل سکتا ہے، اس لیے شہریوں کو جلد از جلد لبنان چھوڑنے کی ہدایت کی جاتی ہے۔ کینیڈا، آسٹریلیا، بھارت اور فرانس نے بھی اپنے شہریوں کو لبنان چھوڑنے کی ہدایت کر دی ہے۔

  • لبنان کا سفر نہ کریں، امریکہ نے اپنے شہریوں کو خبردار کردیا

    لبنان کا سفر نہ کریں، امریکہ نے اپنے شہریوں کو خبردار کردیا

    اسرائیل اور لبنانی حزب اللہ گروپ کے درمیان بڑھتی ہوئی کشیدگی کو مدنظر رکھتے ہوئے امریکا نے اپنے شہریوں کو لبنان کا سفر نہ کرنے کی ہدایت جاری کی ہے۔

    بین الاقوامی خبر رساں ادارے کی رپورٹ کے مطابق امریکی محکمہ خارجہ نے لبنان کے لیے اپنی ٹریول ایڈوائزری کو چار درجے تک بڑھا دیا۔ جس میں واضح طور پر کہا گیا ہے کہ لبنان کا سفر کرنے سے گریز کریں۔

    حزب اللہ کی جانب سے تازہ ترین پیش رفت میں گزشتہ روز پارٹی کے سینئر رہنما فواد شکر کے قتل پر سوگ منایا گیا، گزشتہ روز اسرائیلی حملے میں بیروت کے جنوبی مضافات میں ایک عمارت پر میزائل داغا گیا تھا جس کے نتیجے میں فواد شکر شہید ہوگئے تھے۔

    بدھ کی علی الصبح تہران میں ایک حملے میں حماس کے پولٹ بیورو کے سربراہ اسماعیل ھنیہ نے جام شہادت نوش کیا، دو رہنماؤں کے قتل کے بعد خطے میں کشیدگی میں اضافہ ہوگیا ہے۔

    حزب اللہ نے ایک بیان میں کہا ہے فواد شک نے القدس کی راہ میں ایک عظیم شہید کے طور پر قربانی دی ہے۔ وہ مزاحمت کی عظیم علامتوں میں سے ایک تھے۔ ان کی فتوحات ہی ان کی صلاحتیوں کا بتا رہی ہیں۔ وہ میدان کے ایسے رہنما تھے جنہوں نے آخری سانس تک جہاد کو نہیں چھوڑا۔

    ایران میں انتقام کی علامت ’سرخ پرچم‘ لہرا دیا گیا

    حزب اللہ کے قریبی ذرائع کے مطابق فواد شکر کا جسد خاکی ہدف بنائی گئی عمارت کے ملبے کے نیچے سے ملا ہے، بیان کے مطابق حزب اللہ کے سکریٹری جنرل حسن نصر اللہ آج جمعرات کو جلوس جنازہ سے خطاب کرتے ہوئے اس مذموم حملے اور بڑے جرم کے بارے میں سیاسی موقف کا اظہار کریں گے۔

  • سعودی عرب،کویت،یواےای کا اپنے شہریوں کولبنان چھوڑنے کا حکم

    سعودی عرب،کویت،یواےای کا اپنے شہریوں کولبنان چھوڑنے کا حکم

    ریاض : سعودی عرب، کویت اور متحدہ عرب امارات نے اپنے شہریوں کو لبنان چھوڑنے کا حکم دیدیا۔

    خبررساں ایجنسی کے مطابق سعودی عرب، کویت اور متحدہ عرب امارات نے اپنے شہریوں کو لبنان چھوڑنے کا حکم دیدیا ہے اور ہدایت کی ہے شہری لبنان کے سفرسے گریزکریں۔

    جاری سفری انتبا میں شہریوں کو کہا گیا کہ جولبنان میں ہیں وہ وہاں سے نکل جائیں اورجو جاناچاہتے ہیں وہ اپناارادہ ملتوی کردیں۔جب کہ سعودی شہری بھی براہ راست یا کسی اور ملک سے لبنان کا سفر نہ کریں۔

    سعودی حکام کا کہنا ہے کہ ہدایت لبنان میں سیاسی بحران اور سیکورٹی کی غیر یقینی صورتحال کے پیش نظر جاری کی گئی۔

    یاد رہے کہ بحرین پہلے ہی اپنےشہریوں کو لبنان نہ جانے کی ہدایت کرچکا ہے، بحرین حکومت کی جانب سے جاری ہدایت نامے میں کہا گیا تھا کہ وہ فوری طور پر لبنان کی سرزمین چھوڑ دیں۔

    واضح رہے کہ چند روز قبل لبنان کے وزیراعظم سعد الحریری نے سعودی عرب کے دورے کے دوران ایران پر براہ راست مداخلت کا الزام عائد کیا تھا ، جس کے بعد جان کے خطرے کے پیش نظر اپنے عہدے سے مستعفی ہونے کا اعلان کیا تھا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔