Tag: Leg and Foot Swelling Disorder

  • پیروں میں سوجن : کھڑے ہوکر کام کرنے والے افراد کیلیے اہم خبر

    پیروں میں سوجن : کھڑے ہوکر کام کرنے والے افراد کیلیے اہم خبر

    پیروں میں سوجن جسے طبی اصطلاح میں کرونک وینز ان سفیشنسی کہا جاتا ہے، ایک عام طبی حالت ہے جو مختلف وجوہات کی بنا پر ہو سکتی ہے۔

    اے آر وائی نیوز کے پروگرام باخبر سویرا میں ویسکولر سرجن ڈاکٹر فہد میمن نے اس مرض کی وجوہات اس سے بچاؤ کے بارے میں ناظرین کو آگاہ کیا۔

    انہوں نے بتایا کہ انسان کی ٹانگ میں دو قسم کی شریانیں ہوتی ہیں ایک شریان خون کو اوپر سے نیچے لے جاتی ہے اور دوسری کا کام خون کو واپس اوپر پہچانا ہوتا ہے۔ وہ لوگ جو زیادہ تر کام کھڑے ہوکر کرتے ہیں ان کی ٹانگوں میں خون کی گردش کا عمل سُست ہوجاتا ہے جس کی وجہ سے رگیں پھول جاتی ہیں۔

    ڈاکٹر فہد نے بتایاکہ ٹانگوں میں خون رکے رہنے سے سوجن پیدا ہوتی ہے، پاکستان میں یہ بیماری 100 میں سے 70 فیصد افراد کو ہوتی ہے جن میں جوان اور بزرگ دونوں شامل ہیں۔ اگر اس بیماری کا فوری علاج نہ کیا جائے یا اس میں سستی کا مظاہرہ کیا جائے تو ٹانگوں کا رنگ کالا سیاہ اور السرز ہوجاتے ہیں۔

    بعض اوقات ٹانگوں کی رگیں پھول جاتی ہیں، شدید صورت میں یہ مرض السرز پیدا کردیتا ہے جس سے ٹانگوں میں زخم ہوجاتے ہیں جسے بھرنے میں بہت زیادہ وقت لگ سکتا ہے۔

    اس مسئلے کی بنیادی وجوہات کو سمجھنا اور علاج کے اختیارات پر غور کرنا ضروری ہے۔ بیماری کی علامات میں ٹخنوں اور پیروں کے گرد سوجن، ٹانگوں میں بھاری پن یا سن ہونے کا احساس ہوتا ہے ایسی صورت میں فوری طور پر ویسکولر سرجن سے رابطہ کریں۔