مظفرآباد : آج 5 فروری پاکستان سمیت دنیا بھر میں آج مظلوم کشمیریوں سے اظہار یکجہتی کے لیے یوم یکجہتی کشمیر بھرپور انداز میں منایا جارہا ہے۔
اس سلسلے میں آزاد کشمیر اور پاکستان سمیت دنیا بھر میں ریلیوں اور دیگر تقریبات کا انعقاد کیا جائے گا، یکجہتی کشمیر کے موقع پر آزاد کشمیر قانون ساز اسمبلی کا خصوصی اجلاس بھی منعقد کیا جائے گا۔
قانون ساز اسمبلی کے اجلاس سے وزیراعظم پاکستان شہباز شریف خطاب کریں گے، کوہالہ کے مقام پر یوم یکجہتی کشمیر کےحوالے سے تقریب کا انعقاد کیا جائے گا۔
آج مختلف مقامات پر سیمینارز، کانفرنسیں، ریلیاں اوراحتجاجی مظاہرے ہوں گے۔ کئی کلو میٹر کی ہاتھوں کی زنجیریں بنائی جائیں گی۔ چوکوں اور چوراہوں پر بھارتی مظالم کے خلاف جلسے اور جلوس ہوں گے۔ کوہالہ پل پر انسانی ہاتھوں کی سب سے بڑی زنجیر بنائی جائے گی، تقریب میں پاکستان اور آزاد کشمیر کے رہنما شرکت کریں گے۔
مقبوضہ کشمیر کی خصوصی حیثیت ختم
واضح رہے کہ بھارت نے 5 اگست 2019 کو اپنے آئین کے آرٹیکل 370 کا خاتمہ کرتے ہوئے مقبوضہ کشمیر کو اس کی خصوصی حیثیت سے محروم کردیا تھا۔
مقبوضہ جموں و کشمیر کو تقسیم کرتے ہوئے اسے دو وفاقی اکائیوں میں تبدیل کردیا تھا جس کا اطلاق گزشتہ سال 31 اکتوبر سے ہوگیا تھا، ساتھ ہی بھارت نے مقبوضہ کشمیر میں کرفیو نافذ کرتے ہوئے مکمل لاک ڈاؤن کردیا تھا جو 5 اگست سے اب تک جاری ہے۔
مقبوضہ جموں و کشمیر کے عوام کو مواصلاتی نظام کی بندش کا بھی سامنا ہے جس کی وجہ سے معاشی بحران پیدا ہوگیا ہے اور شہری اپنے اہل خانہ سے رابطہ قائم کرنے سے محروم ہوگئے ہیں، تاہم گزشتہ ماہ خطے میں محدود موبائل ڈیٹا اور انٹرنیٹ سروس کو عارضی طور پر بحال کیا گیا تھا لیکن اس کے باوجود عوام کو مشکلات ہیں۔
