Tag: license

حج کمپنیوں کو لائسنس حاصل کرنے کے لیے کیا شرائط پوری کرنی ہوں گی؟

ریاض: سعودی وزارت حج و عمرہ نے حج کمپنیوں کے لیے لائسنس کے اجرا کے لیے شرائط جاری کی ہیں، لائسنس کے اجرا کی درخواست کی آخری تاریخ رواں سال 24 دسمبر ہے۔

اردو نیوز کے مطابق سعودی وزارت حج نے بیرون مملکت سے حج کمپنیوں کے لیے لائسنس کے اجرا کے لیے مقرر شرائط جاری کی ہیں۔

وزارت حج و عمرہ نے ایک بیان میں کہا کہ آئندہ حج سیزن کے دوران طوافہ کمپنیوں کے تحت کام کرنے والی کمپنیوں کے لیے لائسنس جاری کیے جائیں گے۔

نئی کمپنیاں گزشتہ کئی عشروں سے حجاج کو سہولتیں فراہم کرنے والی فیلڈ سروس ایجنیسوں کی جگہ لیں گی۔

وزارت حج کا کہنا ہے کہ لائسنس کا دورانیہ 5 برس کا ہوگا اور اس میں توسیع ہو سکے گی، لائسنس کے اجرا کی درخواست کی آخری تاریخ رواں سال 24 دسمبر ہے۔

وزارت کے مطابق لائسنس کے لیے درخواست دینے والی کمپنی کا مالک اور منتظم سعودی ہوں گے، ایک لاکھ حجاج کو سروس فراہم کرنے والی کمپنی کا کم از کم سرمایہ پچاس لاکھ ریال ہونا چاہیئے۔

ایک شرط یہ بھی عائد کی گئی ہے کہ لائسنس کی درخواست ایسا کوئی شخص نہیں دے سکتا جس کے خلاف وزارت خدمات میں کوتاہی کا فیصلہ سنا چکی ہو۔

اسی طرح فیس اور زر ضمانت کی شرائط کی پابندی بھی لازمی ہوگی۔

وزارت کا کہنا ہے کہ لائسنس حاصل کرنے والی کمپنی کو مقررہ ضوابط کے مطابق سہولتیں فراہم کرنا ہوں گی، ان میں قیام و طعام کی سہولتیں شامل ہوں گی۔

زر ضمانت کے طور پر کمپنی کے سرمائے کا کم از کم 10 فیصد جمع کروانا ہوگا، علاوہ ازیں سہولتوں کے لیے ٹھیکوں کا بھی 10 فیصد کسی مقامی بینک میں جمع کروانا ہوگا، اس کا دورانیہ ایک سال کا ہوگا۔

دسمبر 12, 2022
سعودی عرب میں تانبے اور چاندی کی کانیں دریافت کرنے کا منصوبہ

ریاض: سعودی عرب کے علاقوں ریاض، عسیر اور مدینہ منورہ میں معدنیات کی تلاش کے لیے 5 منصوبے پیش کیے گئے ہیں، ان علاقوں میں تانبے، زنک، چاندی اور سیسے کی کانیں دریافت کی جائیں گی۔

اردو نیوز کے مطابق سعودی وزیر صنعت و معدنیات بندر الخریف کا کہنا ہے کہ آئندہ برس ریاض، عسیر اور مدینہ منورہ میں معدنیات کی تلاش کے لیے 5 لائسنسز کی نیلامی کا منصوبہ ہے۔

سعودی وزیر صنعت کا کہنا ہے کہ تانبے، زنک، چاندی اور سیسے کی کانیں دریافت کرنے کے لیے مقامی اور غیرملکی سرمایہ کاروں کو موقع دیا جا رہا ہے۔

یہ پیشکش 2 سے 4 نومبر تک سڈنی میں معدنیات کی عالمی کانفرنس میں وزارت صنعت و معدنیات کی شرکت کے تناظر میں کی گئی ہے۔

مدینہ منورہ ریجن میں 187 مربع کلو میٹر سے زیادہ کے رقبے پر مہد الذہب کمشنری میں معدنیات کی تلاش کے لیے پرمٹ جاری ہوں گے، جہاں تانبے اور زنک کی موجودگی کے امکانات ہیں۔

دوسری جانب ریاض ریجن کی الدوادمی کمشنری کے الردینہ مقام پر 78 مربع کلو میٹر سے زیادہ کے رقبے میں خام زنک اور چاندی کی تلاش کے لیے پرمٹ جاری کیا جائے گا۔

ریاض کی القویعیہ کمشنری میں ام حدید کے علاقے میں 246 مربع کلو میٹر سے زیادہ کے رقبے میں چاندی، تانبے، زنک اور سیسے کے بڑے ذخائر موجود ہیں، ان پر کام ہوگا۔

علاوہ ازیں عسیر ریجن کی تثلیث کمشنری میں جبل الصھایبہ میں زنک، سیسہ، تانبہ اور لوہے کے ذخائر 283 مربع کلو میٹر کے رقبے میں تلاش کیے جائیں گے۔ یہاں ان کے خام ذخائر موجود ہیں۔

ریاض ریجن کی القویعیہ کمشنری میں جبل ادساس کا علاقہ 121 مربع کلو میٹر سے زیادہ بڑے رقبے پر پھیلا ہوا ہے، یہاں خام لوہے کے ذخائر اچھی خاصی مقدار میں موجود ہیں۔

سعودی وزارت صنعت و معدنیات پانچوں مقامات پر معدنیات کی تلاش میں دلچسپی رکھنے والی کمپنیوں سے ٹینڈر طلب کرے گی۔

اکتوبر 31, 2022
بلیک بیری فون ختم کردیے گئے

کینیڈین موبائل فون کمپنی بلیک بیری بالآخر ختم ہوگیا، بین الاقوامی میڈیا کے مطابق نئی کمپنی کو بلیک بیری کی تیاری کے لیے ملنے والا لائسنس منسوخ کردیا گیا ہے۔

جنوری 2022 میں بلیک بیری نے باضابطہ طور پر فونز کے لیے سپورٹ ختم کرنے کا اعلان کیا تھا۔

کینیڈین کمپنی کی جانب سے 4 جنوری 2022 سے بلیک بیری کے سافٹ ویئر بلیک بیری 7.1، بلیک بیری 10 یا دیگر پر کام کرنے والے فونز یا ٹیبلیٹس کے لیے سپورٹ ختم کردی گئی تھی۔

یعنی بلیک بیری ڈیوائسز پر وائی فائی کا استعمال، فون کالز، ٹیکسٹ میسجز اور دیگر فنکشنز اب کام نہیں کرتے، یعنی یہ فون صارفین کے لیے بیکار ہی ہوگئے ہیں۔

مگر بلیک بیری فونز پسند کرنے والوں کو توقع تھی کہ کینیڈین کمپنی کے مزید نئے فونز مارکیٹ میں دستیاب ہوں گے اور امریکی کمپنی آن ورڈ موبیلیٹی انہیں متعارف کروائے گی۔

خیال رہے کہ اگست 2020 میں کینیڈین کمپنی نے آن ورڈ موبیلٹی اور فوکس کون کی ذیلی کمپنی ایف آئی ایچ موبائل لمیٹڈ سے اشتراک کیا تھا تاکہ نئے بلیک بیری فونز متعارف کروائے جاسکیں۔

اس کے بعد اس بارے میں مزید کوئی تفصیلات سامنے نہیں آئیں مگر آن ورڈ موبیلٹی نے بتایا تھا کہ وہ اینڈرائیڈ پر کام کرنے والے بلیک بیری فون کو تیار کرنا چاہتی ہے۔

مگر 2021 کے اختتام پر آن ورڈ موبیلٹی نے کہا تھا کہ وہ 5 جی بلیک بیری فون کو پیش کرنے کے لیے تیار ہے۔

مگر اب یقینی طور پر بلیک بیری برانڈ کے عہد کا خاتمہ ہورہا ہے کیونکہ رپورٹس کے مطابق آن ورڈ موبیلٹی کو بلیک بیری کی تیاری کے لیے ملنے والا لائسنس منسوخ کردیا گیا ہے۔

فروری 14, 2022
سعودی عرب: خواتین کے لیے لیموزین ڈرائیونگ لائسنس کا اجرا

ریاض: سعودی محکمہ ٹریفک نے خواتین کے لیے لیموزین ڈرائیونگ لائسنس کا اجرا شروع کردیا ہے، خواتین مختص کردہ 18 ڈرائیونگ اسکولز سے لائسنس حاصل کرسکتی ہیں۔

سعودی ویب سائٹ کے مطابق سعودی محکمہ ٹریفک نے خواتین کے لیے لیموزین ڈرائیونگ لائسنس کا اجرا شروع کردیا ہے، لائسنس جاری کرنے کے انتظامات مکمل کرلیے گئے ہیں۔

محکمہ ٹریفک کا کہنا ہے کہ خواتین کے لیے 18 ڈرائیونگ اسکولز مخصوص کیے گئے ہیں جہاں سے وہ لیموزین ڈرائیونگ لائسنس حاصل کر سکتی ہیں۔

محکمے کے مطابق مملکت کے مختلف صوبوں اور کمشنریوں میں 18 ڈرائیونگ اسکولز کھلے ہوئے ہیں، ریاض، الشرقیہ، عسیر، جازان، نجران، الجوف، حائل، طائف اور جدہ میں واقع ڈرائیونگ اسکولوں سے خواتین ٹیکسی لائسنس حاصل کر سکتی ہیں۔

یاد رہے کہ مملکت میں خواتین کو ڈرائیونگ کرنے کی اجازت ملنے کے بعد بڑی تعداد میں مقامی اور غیر ملکی خواتین ڈرائیونگ کر رہی ہیں۔

اس ضمن میں ایک سروے میں کہا گیا تھا کہ خواتین کو گاڑی چلانے کی اجازت ملنے کے بعد مملکت میں گھریلو ڈرائیورز کی طلب میں کافی کمی واقع ہوگئی ہے، ڈرائیونگ کی اجازت سے قبل سعودی عرب میں سب سے زیادہ طلب گھریلو ڈرائیورز کی ہوتی تھی۔

جنوری 7, 2022
کویت میں کمپنیوں پر نئی پابندی عائد

کویت : ٹریول اور ٹورزم کمپنیوں کو کویتی حکومت کی جانب سے ہدایات جاری کی گئی ہیں کہ وہ لائسنس کے حصول کے بغیر کسی بھی پلیٹ فام سے کسی قسم کا عوامی پیغام جاری نہیں کر سکتے۔

کویت : وزارت برائے اوقاف و اسلامی امور کویت نے ہدایت جاری کی ہے کہ سیاحتی کمپنیوں کو بغیر لائسنس کے "عمرہ” کی سرگرمیوں کی تشہیر کرنے کی اجازت نہیں ہے۔

تفصیلات کے مطابق وزارت برائے اوقاف و اسلامی امور نے اعلان کیا کہ سیاحتی کمپنیوں کے لئے وزارت کے لائسنس کے بغیر "عمرہ” کی سرگرمیوں کی تشہیر کرنا سختی سے منع ہے۔

کویت کے مقامی روزنامہ کے ذریعہ موصولہ بیان میں واضح کیا گیا ہے کہ محکمہ حج اور عمرہ امور کی نمائندگی کرنے والی وزارت برائے اوقاف اور اسلامی امور نے کچھ ٹریول اور سیاحتی کمپنیوں کے ذریعہ عمرہ سرگرمی کے عمل کے بارے میں سوشل میڈیا سائٹس پر بہت سے اشتہارات کی نگرانی کی ہے۔

محکمہ حج اور عمرہ امور نے یہ بات نوٹ کی کہ ان کمپنیوں میں زیادہ تر کے پاس لائسنس موجود ہی نہیں ہے اور نہ ہی وہ وزارت اوقاف اور اسلامی امور کی جانب سے جاری کردہ عمرہ سرگرمیاں انجام دینے کے مجاز ہیں۔

وزارت نے تصدیق کی کہ تمام ٹریول اور ٹورزم کمپنیوں کے لئے قانون نمبر1/2015 کے مطابق وزارت سے انتظامی لائسنس حاصل کرنے کے بعد ہی سوشل میڈیا سائٹوں پر کسی بھی عمرہ سرگرمی کی تشہیر کرنا جائز ہے۔

وزارت اوقاف نے زور دے کر کہا کہ عوام کے مفاد میں خلاف ورزی کرنے والوں کے خلاف تمام قانونی اقدامات اٹھائے جائیں گے۔

ستمبر 21, 2021
سعودی عرب: ڈیجیٹل ڈرائیونگ لائسنس کے حوالے سے اہم وضاحت

ریاض: سعودی محکمہ ٹریفک کا کہنا ہے کہ فیلڈ اہلکار کی جانب سے ڈرائیونگ لائسنس طلب کیے جانے پر ڈرائیونگ لائسنس کارڈ دکھایا جائے۔

سعودی ویب سائٹ کے مطابق سعودی محکمہ ٹریفک کا کہنا ہے کہ اگر فیلڈ اہلکار کسی سعودی یا مقیم غیر ملکی سے ڈرائیونگ لائسنس طلب کریں تو ڈیجیٹل کے بجائے ڈرائیونگ لائسنس کارڈ دکھایا جائے۔

ایک مقامی شہری کے سوال پر کہ اگر فیلڈ اہلکار ڈرائیونگ لائسنس طلب کریں تو آیا ڈیجیٹل لنک دکھانا کافی ہوگا یا باقاعدہ ڈرائیونگ لائسنس کارڈ پیش کرنا ہوگا، محکمہ ٹریفک کا کہنا تھا کہ اگر فیلڈ اہلکار ڈرائیونگ لائسنس یا رخصۃ السیر (وہیکل رجسٹریشن) طلب کریں تو ایسی صورت میں مقامی شہری اور مقیم غیر ملکی کے لیے ضروری ہوگا کہ وہ باقاعدہ ڈرائیونگ لائسنس کارڈ یا وہیکل رجسٹریشن کارڈ پیش کریں۔

محکمہ ٹریفک کا کہنا تھا کہ فیلڈ الکار کو توکلنا ایپ میں موجود لنک دکھانا کافی نہیں ہوگا۔

محکمے کی جانب سے مزید کہا گیا کہ ڈرائیونگ لائسنس کی تجدید کے لیے فیس کی ادائیگی، خلاف ورزیوں پر جرمانوں کی ادائیگی اور طبی معائنہ کروانا ہوگا۔ ڈرائیونگ لائسنس کی تجدید ابشر کے ذریعے کی جاسکتی ہے۔

جنوری 10, 2021
ریاض: 3 لاکھ 36 ہزار سعودی خواتین کو تجارتی لائسنس جاری

ریاض: سعودی عرب میں خواتین تجارت سمیت ہر شعبے میں آگے بڑھ رہی ہیں، گزشتہ 2 برسوں میں 3 لاکھ 36 ہزار سعودی خواتین کو تجارتی لائسنس جاری کیے گئے۔

سعودی ویب سائٹ کے مطابق سعودی وزارت تجارت نے اعلان کیا ہے کہ سنہ 2019 کے دوران خواتین کو 1 لاکھ 11 ہزار تجارتی لائسنس جاری کیے گئے ہیں۔ یہ شرح سنہ 2018 کے مقابلے میں 49 فیصد زیادہ ہیں۔

حالیہ لائسنس جاری کیے جانے کے بعد سعودی عرب میں تاجر خواتین کے تجارتی لائسنسوں کی مجموعی تعداد 3 لاکھ 36 ہزار سے تجاوز کر گئی ہے۔

وزارت تجارت کے مطابق خواتین نے سب سے زیادہ تھوک، ریٹیل اور تعمیرات کے شعبوں کے لائسنس حاصل کیے، علاوہ ازیں قیام و طعام کی تجارتی سرگرمیوں کے لیے بھی لائسنس جاری کروائے گئے۔

خواتین نے امدادی صنعتوں، انتظامی خدمات، سبسڈی خدمات اور سائنسی، تکنیکی اور پیشہ ورانہ سرگرمیوں کے لیے بھی لائسنس حاصل کیے۔

وزارت تجارت کے مطابق تمام سعودی خواتین کو تجارتی لائسنس آن لائن جاری کیے گئے اور خواتین کو وزارت کے دفتر آنے کی زحمت نہیں دی گئی۔

وزارت کا مزید کہنا ہے کہ جب بھی کسی خاتون نے تجارتی لائسنس کے لیے درخواست دی، تو فوری طور پر آن لائن درخواست منظور کرلی گئی۔ کسی خاتون کو کسی طرح کی کوئی پریشانی نہیں ہوئی۔

مارچ 9, 2020
سعودی عرب میں ملازمت کے دروازے کھولنے والی کمپنیوں کے خلاف حکومت کا ایکشن

ریاض: سعودی عرب میں ملازمتیں دلانے والی 11 ریکروٹنگ کمپنیوں اور 53 ایجنسیوں کے لائسنس منسوخ کر کے ان کی خدمات معطل کردی گئیں۔

سعودی ویب سائٹ کے مطابق سعودی وزارت محنت و سماجی بہبو د نے سنہ 2019 کے دوران 11 ریکروٹنگ کمپنیوں اور 53 ایجنسیوں کے لائسنس منسوخ کیے ہیں۔

اس حوالے سے وزارت محنت کی خصوصی کمیٹی نے 64 فیصلے جاری کیے ہیں جن میں سے 11 کا تعلق ریکروٹنگ کمپنیوں اور 53 کا تعلق ریکروٹنگ ایجنسیوں سے تھا۔

ان تمام کمپنیوں اور ایجنسیوں کے لائسنس سلب کرلیے گئے جبکہ ان کی خدمات معطل کردی گئیں۔

وزارت محنت و سماجی بہبود کے ترجمان کے مطابق وزارت محنت تمام فریقین کو معیاری خدمات فراہم کرنے، ریکروٹنگ مارکیٹ میں استحکام پیدا کرنے، ریکروٹنگ مارکیٹ کو خلاف ورزیوں سے پاک کرنے اور تمام متعلقہ فریقین کو مطمئن کرنے کی پالیسی پر گامزن ہے۔

ترجمان نے سعودی شہریوں سے اپیل کی ہے کہ وہ جب بھی کسی ریکروٹنگ ایجنسی یا کمپنی کو قوانین و ضوابط کی خلاف ورزی کرتے ہوئے پائیں یا افرادی قوت کی درآمد کے سلسلے میں انہیں مشکلات کا سامنا ہو تو اس کی شکایت درج کروائیں۔

اس سلسلے میں 19911 پر رابطہ کر کے یا سعودی عرب کے کسی بھی حصے میں موجود لیبر آفس سے رجوع کر کے مطلع کیا جاسکتا ہے۔ اس ضمن میں اسمارٹ فون ایپلی کیشن کے ذریعے بھی شکایت درج کروائی جاسکتی ہے۔

جنوری 13, 2020
پنجاب میں ٹیچرز کے لیے لائسنس ہونا ضروری

لاہور: پنجاب کے وزیر تعلیم مراد راس کا کہنا ہے کہ پنجاب میں پہلی بار اسکول ایجوکیشن پالیسی تشکیل دی ہے، ان کے مطابق اب اساتذہ کا بھی لائسنس ہوگا۔

تفصیلات کے مطابق صوبائی وزرا مراد راس اور فیاض الحسن چوہان نے پریس کانفرنس سے خطاب کیا۔ پنجاب کے وزیر اطلاعات فیاض الحسن چوہان کا کہنا تھا کہ بینظیر بھٹو پر حملے کے وقت سیکیورٹی کی ذمہ داری رحمٰن ملک کی تھی، حیرت ہے رحمٰن ملک حملے کے فوراً بعد اسپتال کے بجائے زرداری ہاؤس پہنچے۔

فیاض الحسن چوہان کا کہنا تھا کہ بلاول کو پاپا سے پوچھنا ہوگا رحمٰن ملک بینظیر بھٹو کو چھوڑ کر زرداری ہاؤس کیوں پہنچے۔ بینظیر بھٹو کی موت کے بعد زرداری نے فون کر کے کیوں کہا کہ پوسٹ مارٹم نہ کرنا۔ بلاول سے کہوں گا کہ آج اپنے پاپا سے یہ سوال پوچھیں۔

انہوں نے کہا کہ زرداری گروپ نے کھربوں روپے کی منی لانڈرنگ کرپشن کی ہے۔ پیپلز پارٹی کھربوں روپے جلسوں پر لگا رہی ہے۔ یہ پیسے سندھ میں لگا دیتے تو آپ کا کچھ بن جاتا۔

صوبائی وزیر اطلاعات کا کہنا تھا کہ کوشش ہے سب کو ایک چھتری کے نیچے لانا ہے، لوگ پوچھتے ہیں کرپٹ لوگوں کو پکڑا جاتا ہے تو کیا ایکشن ہوا۔ جج بلیک میلنگ ویڈیو کیس ابھی عدالت میں چل رہا ہے۔ قانون نافذ کرنے والے اداروں نے عدالت کے حکم پر کارروائی کی۔

پنجاب کے وزیر تعلیم مراد راس کا کہنا تھا کہ اسکولوں پر 21 کروڑ روپے خرچ آئے گا۔ جن علاقوں میں اسکول موجود نہیں موبائل اسکول بھجوا رہے ہیں۔ پنجاب میں پہلی بار اسکول ایجوکیشن پالیسی تشکیل دی ہے۔

انہوں نے کہا کہ ٹیچر لائسنس کا معاملہ کابینہ نے منظور کرلیا ہے۔ وکیل کا لائسنس ہو سکتا ہے تو ٹیچر کا بھی ہونا چاہیئے۔

دسمبر 27, 2019
پائلٹس لائسنس بحالی کی درخواست، سی اے اے نے جہاز اڑانے سے روک دیا

کراچی : پی آئی اے کے پائلٹس اور فضائی میزبانوں کی تعلیمی اسناد کی تصدیق کے معاملے پر ایئر لائن انتظامیہ نے36سے زائد پائلٹوں اور میزبانوں کے لائسنس بحالی کی درخواست کر دی۔

پی آئی اے انتظامیہ کی جانب سے سول ایوی ایشن اتھارٹی کو ارسال کیے گئے مراسلے کی کاپی اے آر وائی نیوز کو موصول ہوگئی، سی اے اے نے دو روز قبل ان پائلٹس اور میزبانوں کے لائسنس معطل کر دئیے تھے۔

اس حوالے سے ذرائع کا کہنا ہے کہ تعلیمی اسناد کی عدم فراہمی پر متعلقہ ملازمین کے لائسنس معطل کئے گئے، ایئر لائن مراسلہ میں کہا گیا ہے کہ تعلیمی اسناد متعلقہ اداروں کو تصدیق کے لئے روانہ کی جا چکی ہیں، تصدیقی خطوط موصول ہوتے ہی عملے کے خلاف کارروائی عمل میں لائی جائے گی، متعلقہ تعلیمی اداروں کی رپورٹ ۤنے تک لائسنسز بحال کر دئیے جائیں۔

واضح رہے کہ سول ایوی ایشن اتھارٹی نے تعلمی اسناد جمع نہ کرانے والے پی آئی اے کے21پائلٹس کو گزشتہ روز اڑان بھرنے سے روک دیا تھا،21پائلٹس نے میٹرک اور و انٹر میڈیٹ کی تعلیمی اسناد سول ایوی ایشن اتھارٹی کو فراہم نہیں کی تھیں۔

ترجمان سی اے اے کے مطابق ان پائلٹس نے دوبارہ اپنے تعلیمی اسناد کی تصدیق کیلئے سی ا ے اے کو فراہم نہیں کیے تھے جس کی وجہ سے مذکورہ کپتانوں کو ڈیوٹیاں کرنے اور جہاز اڑانے پر مکمل طور پر روک دیا گیا تھا، ان پائلٹس کے نام فلائنگ ڈیوٹی شیڈول سے بھی نکال دیئے گئے ہیں۔

جنوری 1, 2019