Tag: Life Struggle

معروف اداکارہ فضہ علی کا کہنا تھا کہ وہ بچپن سے ہی اپنے گھر کے حالات دیکھ کر ٹوٹ چکی تھیں اور اس کے بعد پھر ان کی شادی بھی ناکام رہی۔

تفصیلات کے مطابق معروف اداکارہ فضہ علی نے اے آر وائی ڈیجیٹل کے مارننگ شو گڈ مارننگ پاکستان میں شرکت کی اور اپنی زندگی کی تلخیوں کے بارے میں بتایا۔

اداکارہ نے بتایا کہ ان کے والد نے کبھی بھی ان کی اور والدہ کی ذمہ داری نہیں اٹھائی، ہماری والدہ نے ہی ہمیں پالا اور ہمارے تمام اخراجات پورے کیے۔

انہوں نے بتایا کہ ان کی والدہ کبھی انہیں دادا دادی کے گھر چھوڑ جاتی تھیں تو وہاں وہ سب کے درمیان بہت عجیب سا محسوس کرتے تھے کیونکہ سب بچے اپنے والدین کے ساتھ ہوتے تھے جبکہ وہ اکیلا پن محسوس کرتے تھے۔

اسکول میں بھی سب ان کے والد کے بارے میں دریافت کرتے تھے اور وہ مختلف جوابات دیا کرتی تھیں۔

فضہ نے بتایا کہ اس کے بعد ان کی شادی ہوئی تو شوہر کو لوگوں میں گھلنا ملنا اور تقریبات میں جانا پسند تھا، انہیں فیملی لائف نہیں چاہیئے تھی۔

اداکارہ کے مطابق وہ خود ہی اپنے اخراجات پورے کرتی تھیں اور پھر جلد ہی انہوں نے علیحدگی اختیار کرلی تھی۔