Tag: load shedding

کراچی : شہر قائد میں بارش کا پانچواں روز ہے لیکن کچھ علاقے ایسے بھی ہیں جہاں آج بھی علاقہ مکین بجلی سے محروم ہیں، اور بجلی کی عدم فراہمی کے باعث پینے کا پانی بھی میسر نہیں۔

تفصیلات کے مطابق کراچی اور اس کے مضافات میں چار روز قبل ہونے والی بارش کے بعد بجلی کا نظام درہم برہم ہوگیا،80فیڈرز بند ہونے اور20کیبل فالٹس کی وجہ سے کئی علاقوں میں تاحال بجلی کی فراہمی معطل ہے۔

شہرِ قائد کا 25 فیصد حصہ بجلی سے محروم ہے، تار ٹوٹنے اور سب اسٹیشنز بند ہونے کے باعث بھی عوام کو  بجلی کی فراہمی میں  تعطل کا سامنا ہے،کیبل فالٹس اور تکنیکی خرابی کے نام پر لوڈ شیڈنگ نے عوام کو عذاب میں مبتلا کر رکھا ہے۔

کے الیکٹرک کی کارکردگی کا یہ عالم ہے کہ شہر کے بیشتر علاقوں میں90 گھنٹے بعد بھی بجلی بحال نہ ہوسکی، اس حوالے سے ذرائع کا کہنا ہے کہ کراچی کے علاقے سٹی ریلوے کالونی، ہمپ یارڈ،ہجرت کالونی،ملیر، سعود آباد، یوسف گوٹھ، کلفٹن، ڈیفنس، پنجاب کالونی میں بھی بجلی بند ہے۔

اس کے علاوہ بوٹ بیسن ،اولڈسٹی ایریا،کھارادر،لیاری کے مختلف علاقوں سمیت ایم اےجناح روڈ، ڈیفنس،سائٹ کے مختلف علاقوں میں بھی 5روزسے بجلی بند ہے، میٹروول، ماری پوڑ، اورنگی، گلبرگ اور لیاقت آباد کے مختلف علاقوں میں تاحال بجکی کی فراہمی معطل ہے۔

بجلی بند ہونے کی وجہ سے شہریوں کو شدید مشکلات کا سامنا ہے، دوسری جانب کراچی کی گلیاں سیوریج کا ناکارہ نظام ہونے کی وجہ سے ندی نالوں کا منظر پیش کررہی ہیں۔

کراچی ؛ شہر قائد میں جمعرات کو ہونے والی بارش کے بعد شہر کے متعدد علاقوں سے بجلی آج بھی غائب ہے تو کئی جگہ غیر اعلانیہ لوڈ شیڈنگ کی جارہی ہے جس پر شہریوں کے صبر کا پیمانہ لبریز ہوگیا۔

تفصیلات کے مطابق شہر میں بارش کے پانی کی عدم نکاسی کے ساتھ ساتھ بجلی کی طویل دورانیے کی بندش شہریوں کیلئے دہرا عذاب بن گئی ہے اور وہ غم و غصے کے عالم میں سراپا احتجاج ہیں۔

اس حوالے سے کراچی کے علاقے صدر کے قریب اللہ والی کالونی کے مکینوں نے بجلی نہ ہونے پر احتجاجی مظاہرہ کیا، بچے اور اہل علاقہ کےالیکٹرک کی گاڑی کو روک کر اس پر سوار ہوگئے، ان کا کہنا ہے کہ بجلی بحال ہونے تک گاڑی سے نہیں اتریں گے۔

مظاہرین نے میڈیا کو بتایا کہ ضلع جنوبی کے مختلف علاقوں میں گزشتہ48گھنٹوں سے زائد کا وقت ہوگیا لیکن ابھی بجلی نہیں آئی ہے۔ اس موقع پر موٹر سائیکل سوار افراد بھی کے الیکٹرک کی گاڑی کے ساتھ چلتے رہے۔

کے الیکٹرک کی گاڑی پر مامور عملے کا کہنا تھا کہ 70فیصد بیسمنٹ ایریا میں برساتی پانی موجود ہے، پانی کی نکاسی کے بعد مرحلہ وار بجلی بحال کریں گے۔

ان کا کہنا تھا کہ پانی کی موجودگی میں بجلی کی بحالی نقصان دہ ہوسکتی ہے، لہٰذا شہری صورتحال کی نزاکت سمجھیں اور عملے کے ساتھ تعاون کریں۔

علاوہ ازیں شہر کے بیشتر علاقوں میں غیراعلانیہ لوڈ شیڈنگ کاسلسلہ آج بھی جاری ہے، محمود آباد سیکٹر اے، کورنگی کراسنگ، لانڈھی کے مختلف علاقوں میں بجلی غائب ہے جبکہ شادمان ٹاؤن، جمشید روڈ، فاطمہ جناح کالونی اور ناگن چورنگی کے اطراف کی آبادیوں میں کئی گھنٹے سے بجلی بند ہے۔

دوسری جانب کے الیکٹرک ترجمان کا کہنا ہے کہ شہر میں نکاسی آب کے بعد پانی کی سطح کم ہونے کے ساتھ ہی بجلی بحالی کا عمل تیزی سے جاری ہے، اشفاق کالونی کیماڑی، حنیف آباد اورنگی ٹاؤن، کورنگی سیکٹر بی51اور سی میں بجلی کی فراہمی جاری ہے۔

ترجمان کے مطابق آئی آئی چندریگر روڈ، مجاہد کالونی، کلفٹن بلاک 5، ڈی ایچ اے فیز2، 5، 8 میں بجلی بحال کردی گئی،اس کے علاوہ لانڈھی کے متعدد علاقوں میں بجلی بحال کر دی گئی ہے جبکہ متاثرہ علاقوں میں نکاسی آب کے ساتھ ساتھ بجلی بحالی کا کام بھی جاری ہے، فوج اور دیگراداروں کے نکاسی آب سے متعلق اقدامات پر شکر گزار ہیں۔