ARYNews.tv | Urdu – Har Lamha Bakhabar

Tag: LOC firing

  • بھارت کے جارحانہ عزائم خطے کے امن کیلئے خطرہ ہیں، فردوس عاشق اعوان

    بھارت کے جارحانہ عزائم خطے کے امن کیلئے خطرہ ہیں، فردوس عاشق اعوان

    اسلام آباد : معاون خصوصی اطلاعات فردوس عاشق اعوان نے لائن آف کنٹرول پر بھارتی فوج کی بلااشتعال فائرنگ کی مذمت کرتے ہوئے کہا بھارت کے جارحانہ عزائم خطے کے امن کیلئے خطرہ ہیں۔

    تفصیلات کے مطابق معاون خصوصی اطلاعات فردوس عاشق اعوان نے سماجی رابطے کی ویب سائٹ ٹوئٹر پر لائن آف کنٹرول پر بھارتی فوج کی بلااشتعال فائرنگ کی مذمت کرتے ہوئے کہا بھارت ایل اوسی پردونوں اطراف کشمیریوں کوبربریت کانشانہ بنارہاہے، بھارت کے جارحانہ عزائم خطے کے امن کیلئے خطرہ ہیں۔

    فردوس عاشق اعوان کا کہنا تھا کہ وطن کے دفاع کی خاطر قربان ہونے والے شہدا ہمارا فخر ہیں، پوری قوم شہدا کو خراج عقیدت پیش کرتی ہے۔

    یاد رہے گزشتہ روز بھی امن کے دشمن بھارت نے پاکستانی چوکیوں پر پھرگولہ باری اور ایل اوسی پر فائرنگ کی ، جس کے نتیجے میں تین جوان شہید ہوگئے تھے جبکہ پاک فوج کی جوابی کارروائی میں پانچ فوجی جہنم واصل ہوئے اور کئی زخمی جبکہ بھارتی فوج کے کئی بنکر اڑا دیئے گئے۔

    مزید پڑھیں : بھارتی فوج کی بلا اشتعال فائرنگ سے پاک فوج کے 3 جوان شہید

    شہید ہونے والوں میں نائیک تنویر، لانس نائیک تیمور اور سپاہی رمضان شامل تھے۔

    ڈی جی آئی ایس پی آر کا کہنا تھا کہ بھارت نے مقبوضہ کشمیر سے توجہ ہٹانے کیلئے ایل اوسی پر اشتعال انگیزی بڑھا دی ہے۔

  • ایل او سی پر فائرنگ، ایک نوجوان شہید، پاک فوج کی جوابی کارروائی، تین بھارتی فوجی ہلاک

    ایل او سی پر فائرنگ، ایک نوجوان شہید، پاک فوج کی جوابی کارروائی، تین بھارتی فوجی ہلاک

    راولپنڈی : لائن آف کنٹرول پر بھارتی افواج نے بلا اشتعال فائرنگ کرتے ہوئےایک نوجوان کو شہید اور نو افراد کو زخمی کردیا، پاکستانی پاک فوج کی جوابی کارروائی سے تین بھارتی فوجی ہلاک ہوگئے۔

    تفصیلات کے مطابق بھارتی فوج نے ایل او سی سیکٹرز پر سیز فائر کی ایک بار پھر خلاف ورزی کی ہے اور اشتعال انگیزی کرتے ہوئے ایک نوجوان کو شہید اور خواتین و بچوں سمیت9افراد کو شدید زخمی کردیا۔

    پاک فوج کے شعبہ تعلقات عامہ آئی ایس پی آر کا کہنا ہے کہ بھارتی فورسز کی جانب سے ایک بار پھر لائن آف کنٹرول کے مختلف سیکٹرز پر سیز فائر کی خلاف ورزیاں جاری ہیں۔

    بھارتی فوجیوں نے فائرنگ کرتے ہوئے ایک نوجوان26سالہ نعمان احمد کو شہید کردیا جبکہ خواتین اور بچوں سمیت9افراد شدید زخمی ہوگئے، جنہیں طبی امداد کیلئے مقامی اسپتال منتقل کیا گیا۔

    آئی ایس پی آر کے مطابق بھارتی فوج نے لائن آف کنٹرول (ایل او سی) اور شہری آبادی پر جان بوجھ کر فائرنگ کی، بھارتی فوج کی جانب سے دنا، جوڑا، لیپا، شاردا، دھدنیال کی شہری آبادی پر اندھا دھند فائرنگ کی گئی۔

    اس کے علاوہ بھارتی فوج نے مارٹر گولوں اور آرٹلری کا بھاری استعمال کیا، پاک فوج کی جانب سے بھی بھارتی جارحیت کا منہ توڑ جواب دیا گیا۔

    بھرپور جوابی کارروائی میں بھارتی چوکیوں کو نشانہ بنایا گیا، جوابی کارروائی سے3بھارتی فوجی ہلاک اور کئی فوجیوں کے زخمی ہونے کی اطلاعات ہیں۔

  • ایل او سی: پاک فوج کا بھارتی اشتعال انگیزی کا منہ توڑ جواب، پانچ بھارتی فوجی ہلاک

    ایل او سی: پاک فوج کا بھارتی اشتعال انگیزی کا منہ توڑ جواب، پانچ بھارتی فوجی ہلاک

    راولپنڈی: بھارتی فوج نے ایل او سی کی شہری آبادی پر بلااشتعال فائرنگ کرکے خاتون اور بچوں سمیت چھ پاکستانیوں کو زخمی کردیا، پاک فوج نے جوابی کارروائی میں پانچ بھارتی فوجی مار گرائے۔

    تفصیلات کے مطابق لائن آف کنٹرول پر بھارتی فوج کی جانب سے ایک بار پھر بلا اشتعال فائرنگ کی گئی ہے، آئی ایس پی آر کا کہنا ہے کہ بھارتی فوج نےچری کوٹ سیکٹر پر فائرنگ کی۔

    بھارتی فوج کی جانب سے ایل او سی پر آئے روز بلا اشتعال فائرنگ کے واقعات سامنے آرہے ہیں، آج چری کوٹ سیکٹر پر بھارتی فوج نے فائر کھول دیے۔

    مزید پڑھیں: وقت آگیاہے بھارت اپنےجھوٹے دعوؤں پر سچ بولے، ڈی جی آئی ایس پی آر

    پاک فوج کے شعبہ تعلقات عامہ آئی ایس پی آر کا کہنا ہے کہ بھارتی فورسز کی فائرنگ سے ایک خاتون اور چاربچوں سمیت چھ شہری زخمی ہو گئے۔

    آئی ایس پی آر کے اعلامیے کے مطابق بھارتی فورسز نے ایل او سی پرشہری آبادی کونشانہ بنایا، فائرنگ سے ہونے والے زخمیوں کو طبی امداد کیلئے فوری طور پر اسپتال منتقل کردیا گیا، زخمیوں میں شبنم، کاشان، فیضان، نشا، آصفہ شامل ہیں جن کا تعلق سریاں گاؤں سے ہے جبکہ ایک زخمی شاہد حسین کا تعلق شفرگاؤں سے ہے۔

    آئی ایس پی آر کے مطابق پاک فوج نے بھرپورجوابی کارروائی کرکے بھارتی چیک پوسٹوں کو نشانہ بنایا جس کے نتیجے میں پانچ بھارتی فوجی مارے جانےاور کئی کے زخمی ہونے کی اطلاعات ہیں۔

  • بھارتی فوج کی ایل او سی کی شہری آبادی پر فائرنگ، دو افراد زخمی

    بھارتی فوج کی ایل او سی کی شہری آبادی پر فائرنگ، دو افراد زخمی

    راولپنڈی : بھارتی فوج نے ایل او سی کے قریب شہری آبادی پر فائرنگ کردی، دو افراد زخمی ہوگئے، بھارت نے پاک فوج پر ہی شہریوں کو مارنے کا الزام لگا دیا۔

    تفصیلات کے مطابق پاک فوج کے شعبہ تعلقات عامہ آئی ایس پی آر نے لائن آف کنٹرول کی گزشتہ24گھنٹے کی صورتحال کے حوالے سے آگاہ کرتے ہوئے کہا ہے کہ بھارتی فوج  کی جانب سے لائن آف کنٹرول (ایل او سی) کے باغسر سیکٹر کی شہری آبادی پر اندھا دھند فائرنگ کی گئی۔

    بھارتی فوج نے نیزہ پیر، پانڈو، خنجر منور، پٹل اور باغسر سیکٹرز میں بلا اشتعال فائرنگ کی لیکن پاک فوج کی جانب سے بھرپور جوابی کارروائی کی گئی جس سے دشمن کی گنیں خاموش ہو گئیں۔

    بھارتی فوج کی فائرنگ کے نتیجے میں دو شہری زخمی ہوگئے، فائرنگ سے زخمی ہونے والوں میں55سالہ عظمت بی بی اور75سالہ باباجان شامل ہیں۔

    آئی ایس پی آر کے مطابق ایل او سی پر بھارتی فوج کی جانب سے اب باقاعدہ شہری آبادی کو نشانہ بنایا جارہا ہے جبکہ بھارت کی جانب سے پاک فوج پر ایل او سی کے اس پار شہری آبادی کو نشانہ بنانے کا پروپیگنڈہ کیا جارہا ہے ،پاک فوج متعدد بار بتا چکی ہے کہ وہ آبادی کو نشانہ نہیں بنا رہی۔

    آئی ایس پی آر کا مزید کہنا ہے کہ ہم شہری آبادی کو نشانہ بنانے کے بھارتی الزامات مسترد کرتے ہیں، بھارت کو جواب دیتے ہوئے کشمیری بھائیوں کا خیال رکھا جاتا ہے، پاک فضائیہ اور پاک بحریہ سرحدوں کے دفاع کیلئے ہمہ وقت چوکس چوکنا ہیں۔

  • پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    راولپنڈی : گزشتہ24گھنٹوں کے دوران بھارتی فوج نے ایل او سی کے مختلف سیکٹرز پر وقفے وقفے سے فائرنگ کا سلسلہ جاری رکھا، پاک فوج کی جوابی کارروائی سے آگ اگلتی دشمن کی توپیں خاموش ہوگئیں۔

    تفصیلات کے مطابق لائن آف کنٹرول پر گزشتہ24گھنٹے کی صورتحال کیا رہی اس حوالے سے آئی ایس پی آر نے رپورٹ جاری کردی ہے رپورٹ کے مطابق بھارت کی ایل او سی پر بلااشتعال فائرنگ کئی گھٹے تک جاری رہی۔

    بھارتی فورسز نے نیزہ پیر، خنجر منور، بٹل، باغ سر، پانڈو سیکٹرز پر فائرنگ کی، آئی ایس پی آر کے مطابق بھارتی فورسز کی جانب سے وقفے وقفے سے فائرنگ کی گئی، پاک فوج نے مؤثر جوابی کارروائی کرکے بھارتی چیک پوسٹوں کو نشانہ بنایا، گزشتہ24گھنٹےمیں پاکستان کا کوئی جانی نقصان نہیں ہوا۔

    ترجمان پاک فوج کا کہنا ہے کہ لائن آف کنٹرول پر مسلح افواج ہر قسم کی بھارتی جارحیت سے نمٹنے کیلئے مکمل طور پر تیار ہیں۔

    علاوہ ازیں گزشتہ روز بھارتی فوج کی فائرنگ اور گولہ باری کے باعث شہید ہونے والے نائیک خرم شہید کی نمازجنازہ ڈی جی خان میں ادا کردی گئی ،آئی ایس پی آر کے مطابق نائیک خرم شہید کو پورے فوجی اعزاز کے ساتھ سپرد خاک کردیا گیا۔

  • ابھی نندن کی حوالگی کے فوری بعد بھارتی فوج کی ایل او سی پر فائرنگ، ایک شہری شہید

    ابھی نندن کی حوالگی کے فوری بعد بھارتی فوج کی ایل او سی پر فائرنگ، ایک شہری شہید

    کوٹلی : پاکستان کی جانب سے امن کے پیغام کے جواب میں بھارت نے جنگی جنون کا مظاہرہ کرتے ہوئے ایل او سی پر شدید گولہ باری کی جس کے نتیجے میں ایک شہری شہید اور5زخمی ہوگئے۔

    تفصیلات کے مطابق بھارت کی پیٹھ پر چھرا گھونپنے کی عادت نہ گئی جس وقت گرفتار بھارتی پائلٹ کو واہگہ پر بھارتی حکومت کے حوالے کیا گیا عین اسی وقت بھارتی فوج نے اپنی سطحی سوچ کا مظاہرہ کرتے ہوئے لائن آف کنٹرول کے تین مقامات پر شہری آبادی پر بلااشتعال فائرنگ اور گولہ باری کی۔

    بھارتی فوج کی جانب سے نکیال سیکٹر پر بلا اشتعال گولہ باری سے ایک پاکستانی شہری شہید جبکہ دو افراد زخمی ہوگئے، اس کے علاوہ کھوئی رٹہ سیکٹر، سماہنی سیکٹر، راولاکوٹ میں تتہ پانی اوردرہ شیخان پر گولہ باری کی، جس سے مزید تین افراد زخمی ہوئے۔ پاک فوج کی جانب سے بھرپور جوابی کارروائی جاری ہے۔

    مزید پڑھیں: مقبوضہ کشمیرمیں بھارتی فوج کی فائرنگ ‘ 2 کشمیری شہید

    واضح رہے کہ اس سے قبل قابض بھارتی فورسز نے مقبوضہ کشمیر میں ظلم و بربریت جاری رکھتے ہوئے ضلع کپواڑہ میں دو کشمیری نوجوانوں کو فائرنگ کرکے شہید کردیا۔

    اس حوالے سے کشمیری میڈیا کا کہنا ہے کہ ظالم بھارتی فوج کی جانب سے کشمیری نوجوانوں کی شہادت کے بعد علاقے میں غیراعلانیہ کرفیو نافذ کردیا گیا ہے۔

    اس کے علاوہ انٹرنیٹ اور موبائل فون سروس بھی بند کردی گئی ہے،کشمیری میڈیا کے مطابق بھارتی فورسزنے تلاشی کے بہانے خواتین، بچوں کوگھروں سے نکال دیا تھا۔

  • ایل او سی پر سیز فائر کی خلاف ورزی: بھارتی فوج کی فائرنگ سے ایک شہری زخمی

    ایل او سی پر سیز فائر کی خلاف ورزی: بھارتی فوج کی فائرنگ سے ایک شہری زخمی

    سیالکوٹ : بھارتی فوج نے ایک بار پھر سیز فائر کی خلاف ورزی ورزی کرتے ہوئے ایل او سی پر اندھا دھند فائرنگ کردی جس کے نتیجے میں محمد مشتاق نامی شخص زخمی ہوگیا۔

    تفصیلات کے مطابق  وادی کشمیر سے قریب ورکنگ باؤنڈری لائن پر بھارتی فوج نے سیزفائر کی ایک بار پھر خلاف ورزی کی ہے، پاک فوج کے شعبہ تعلقات عامہ آئی ایس پی آر کے مطابق بھارتی فوج نے کھوئی رٹہ سیکٹر پر شہری آبادی کو نشانہ بنایا۔

    بھارتی سیکیورٹی فورسز کی بلا اشتعال فائرنگ اور گولہ باری سے محمد مشتاق نامی شخص زخمی ہوگیا جس کو ابتدائی طبی امداد کیلئے سی ایم ایچ کینٹ ہسپتال منتقل کیا گیا ہے۔

    بھارتی سیکورٹی فورسز کی بلااشتعال فائرنگ و مارٹر گولے گرنے سے عمارتوں کو لگے اور دیہی علاقوں کے مکینوں میں خوف و ہراس پھیل گیا، دوسری جانب بھارتی فائرنگ و گولہ باری کا چناب رینجرز نے منہ توڑ جواب دیا اور دشمن کی توپوں کا منہ بند کردیا۔

    اس سے قبل نو جنوری کو بھارتی فوج نے ایل او سی میں شاہ کوٹ سیکٹر پر سیز فائر کی خلاف ورزی کرتے ہوئے شہری آبادی پر بلا اشتعال فائرنگ کی تھی جس کی زد میں آکر ایک خاتون شہید ہوگئیں۔

    یاد رہے کہ بھارت مقبوضہ کشمیر میں ریاستی جبر کے ساتھ ساتھ ایل او سی پر اکثر سیز فائر کی خلاف ورزیاں کرتا رہا ہے لیکن پاک فوج کے فوری اور مؤثر جواب کے بعد دشمن کو منہ کی کھانا پڑتی ہیں ۔

  • لائن آف کنٹرول باگسر سیکٹر پر بھارت کی بلا اشتعال فائرنگ، شہری شہید

    لائن آف کنٹرول باگسر سیکٹر پر بھارت کی بلا اشتعال فائرنگ، شہری شہید

    اسلام آباد: پاک فوج کے شعبہ تعلقات عامہ آئی ایس پی آر کے مطابق بھارتی فوج نے لائن آف کنٹرول پر باگسر سیکٹر پر بلا اشتعال فائرنگ کی جس سے ایک شہری شہید اور ایک خاتون زخمی ہوگئیں۔

    پاک فوج کے شعبہ تعلقات عامہ آئی ایس پی آر کا کہنا ہے کہ بھارتی فوج نے لائن آف کنٹرول پر باگسر سیکٹر پر بلا اشتعال فائرنگ کی۔ بھارتی فوج نے جان بوجھ کر شہری آبادی کو نشانہ بنایا۔

    آئی ایس پی آر کا کہنا ہے کہ بھارتی فوج کی فائرنگ سے 26 سال کا عظیم شہید جبکہ 1 خاتون زخمی ہوگئیں۔

    آئی ایس پی آر کا کہنا ہے کہ پاک فوج نے بھرپور جوابی کارروائی کی اور بھارتی چیک پوسٹوں کو نشانہ بنایا۔

    دوسری جانب بلا اشتعال فائرنگ اور شہری کی شہادت پر دفتر خارجہ نے بھارتی ڈپٹی ہائی کمشنر کو طلب کرلیا اور شہری آبادی کو نشانہ بنانے پر شدید احتجاج کیا۔

    دفتر خارجہ نے کہا کہ بھارتی فائرنگ سے باگسر سیکٹر میں ایک شہری عظیم شہید ہوا جبکہ ایک خاتون زخمی بھی ہوئی۔ بھارٹی ڈپٹی ہائی کمشنر کو بلا اشتعال فائرنگ پر احتجاجی مراسلہ بھی تھمایا گیا۔

    خیال رہے کہ گزشتہ ہفتے ترجمان دفتر خارجہ نے واضح طور پر کہا تھا کہ پاکستان کسی بھی جارحیت کا منہ توڑ جواب دے گا، پاکستان بھارت کے ساتھ تمام مسائل پر مذاکرات کا کہتا ہے، بھارت مذاکرات سے بھاگ رہا ہے۔

  • بھارتی فوج کی ایک مرتبہ پھر بلااشتعال فائرنگ، پاک فوج کا جوان ظہیر احمد شہید

    بھارتی فوج کی ایک مرتبہ پھر بلااشتعال فائرنگ، پاک فوج کا جوان ظہیر احمد شہید

    راولپنڈی : بھارتی فوج کی جانب سے ایک مرتبہ پھر کنٹرول آف لائن پر بلااشتعال فائرنگ کے نتیجے میں پاک فوج کا سپاہی ظہیر احمد شہید ہوگیا۔

    پاک فوج کے شعبۂ تعلقات عامہ (آئی ایس پی آر) کے مطابق کہ بھارتی فوج نے ایک بار پھر ایل اوسی کی خلاف ورزی کرتے ہوئےتھب سیکٹر پربلااشتعال فائرنگ کی، بلااشتعال فائرنگ سے پاک فوج کا سپاہی ظہیراحمد شہید ہوگیا، شہید سپاہی ظہیر احمد کا تعلق سلطان پور بھمبر سے ہے۔

    آئی ایس پی آر کے مطابق پاک فوج نے مؤثر اور جوابی کارروائی کی، جس میں دشمن کی چوکیوں کو نشانہ بنایا گیا، جوابی کارروائی کے بعد بھارتی فوج کی توپیں خاموش ہوگئیں۔

    یاد رہے 2 نومبر کو بھی بھارتی فوج کی جانب سے لائن آف کنٹرول پر اشتعال انگیزی کی گئی تھی، فائرنگ سے 2 بچوں کی ماں منزہ بی بی شہید ہوگئیں تھیں، جس کے بعد پاکستان نے بھارتی ڈپٹی ہائی کمشنر جے پی سنگھ کو دفترِ خارجہ طلب کیا اور واقعے پر شدید احتجاج ریکارڈ کرایا تھا۔

    خیال رہے ترجمان دفترِ خارجہ نے اپنے بیان میں کہا تھا کہ بھارتی فوج مسلسل شہری آبادی کو نشانہ بنا رہی ہے، بھارت رواں سال 2312 بار سیز فائر کی خلاف ورزی کر چکا ہے۔

    مزید پڑھیں :  بھارت 2018 میں 2312 بار سیز فائر کی خلاف ورزی کر چکا ہے، دفتر خارجہ 

    واضح رہے 14 اکتوبر کو بھی بھارتی فوج نے کنٹرول لائن پر بلا اشتعال فائرنگ کی تھی جس کے نتیجے میں 8 سالہ بچہ شدید زخمی ہوگیا تھا۔

    اس سے قبل 11 اکتوبر کو بھارتی فوج نے سیالکوٹ سیکٹر پر بلا اشتعال فائرنگ کی تھی، جس میں بھارتی فورسز نے سکھیال گاؤں کو نشانہ بنایا تھا، بلا اشتعال فائرنگ سے محمد حنیف نامی شہری شدید زخمی ہوا تھا۔

    بھارتی فوج نے لائن آف کنٹرول کے قریب  وزیرِ اعظم آزاد کشمیر راجہ فاروق حیدر  کے ہیلی کاپٹر پر بھی بلا اشتعال فائرنگ کی تھی لیکن خوش قسمتی سے کوئی جانی و مالی نقصان نہیں ہوا۔

  • بھارتی فوج کی بلا اشتعال فائرنگ سے شہید جوان عثمان ارشد فوجی اعزاز کے ساتھ سپردخاک

    بھارتی فوج کی بلا اشتعال فائرنگ سے شہید جوان عثمان ارشد فوجی اعزاز کے ساتھ سپردخاک

    دنیا پور : راولا کوٹ میں بھارتی فوج کی بلا اشتعال فائرنگ سے شہید ہونے والے جوان عثمان ارشد کو فوجی اعزاز کے ساتھ سپردخاک کیا گیا۔

    تفصیلات کے مطابق ایل اوسی پربھارتی فائرنگ سے شہید سپاہی عثمان کی نمازآبائی گاؤں چک نمبر 360 میں نماز جنازہ ادا کردی گئی ، پاک فوج کے جوانوں نے شہید کو گارڈ آف آرنر پیش کیا، نماز جنازہ میں پاک فوج کے افسران، جوانوں اور اہل علاقہ کی بڑی تعداد نے شرکت کی۔

    جس کے بعد عثمان ارشد کو فوجی اعزاز کے ساتھ سپرد خاک کیا گیا۔

    ارشد شہید کے تین بھائی اور دو بہنیں ہیں۔ تین برس قبل پاک آرمی 59 بلوچ رجمنٹ میں بھرتی ہوئے تھے۔

    شہیدعثمان ارشد کی والدہ کا کہنا ہے کہ بیٹے کی شہادت پر فخر ہے، اپنے باقی بیٹے بھی ملک پر قربان کرنے کو تیار ہوں۔

    یاد رہے گذشتہ روز بھارتی فائرنگ سےشہید ہونےوالےپاک فوج کے جوان شہید نائیک محمد طارق محمود کو فو جی اعزاز کے ساتھ سپردخاک کیا گیا تھا، پا ک آرمی کے بہادر سپوت نا ئیک محمد طارق محمود شہید نے سوگواران میں والدین بیوہ اور دو بچے چھو ڑے ہیں جبکہ شہید کا کا دوسرا بھائی بھی پاک آرمی میں اپنے فرا ئض سر انجام دے رہا ہے۔

    مزید پڑھیں : ایل او سی پر بھارتی اشتعال انگیزی، فائرنگ سے تین فوجی شہید

    یاد رہے کہ گذشتہ روز بھارتی فوج کی جانب سے راولا کو ٹ سیکٹر پر بلااشتعال فائرنگ کی گئی ، جس کے نتیجے میں تین فوجی شہید ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔