Tag: Local Bodies Election

سندھ میں بلدیاتی انتخابات کی تیاریاں شروع ہوگئیں،  کراچی کے ضلع شرقی، کورنگی اور غربی کی ابتدائی حلقہ بندیوں کی فہرست جاری کردی گئی ہے۔

اے آر وائی نیوز کے مطابق سندھ میں بلدیاتی انتخابات کی تیاریاں شروع کردی گئی ہیں اور پہلے مرحلے میں کراچی کے اضلاع شرقی، کورنگی  اور غربی کی ابتدائی حلقہ بندیوں کی فہرست جاری کردی گئی ہے، اگلا مرحلہ ان حلقہ بندیوں پر اعتراض جمع کرانے کے حوالے سے ہوگا۔

حلقہ بندیوں پر اعتراضات حلقہ بندی اتھاری کے پاس 17 فروری سے 4 مارچ تک جمع کرائے جاسکتے ہیں۔

جاری کردہ فہرست کے مطابق ضلع شرقی کی ابتدائی حلقہ بندیوں میں چنیسرٹاؤن، گلشن،جناح، صفورہ اور سہراب گوٹھ شامل ہیں۔

ضلع شرقی میں 43 یونین کمیٹیاں ہیں،ہر یوسی میں 4 وارڈ ہیں اور یوسی کی آبادی زیادہ سے زیادہ 77 ہزارسےزائد اور کم سے کم 45 ہزار ہے۔

ضلع کورنگی کی ابتدائی حلقہ بندیوں کی جاری کردہ فہرست کے مطابق ضلع کورنگی کے4ٹاؤنزہیں جن میں لانڈھی، شاہ فیصل، کورنگی اور ماڈل کالونی ٹاؤن شامل ہیں۔

ضلع کورنگی میں 37 یونین کمیٹیاں ہیں اور ہریوسی میں4وارڈ ہیں، یوسی کی زیادہ سے زیادہ آبادی 76ہزارسےزائد اور کم سےکم آبادی50 ہزار ہے۔

کورنگی میں سب سے زیادہ شاہ فیصل کی یوسی میں 76ہزار سے زائد آبادی رکھی گئی ہے جب کہ کم سے کم آبادی ماڈل کالونی ٹاؤن کی ایک یوسی کی50 ہزارہے۔

 ضلع غربی کی ابتدائی حلقہ بندیوں کی جاری فہرست میں ضلع غربی میں مومن آباد ،اورنگی اور منگھو پیر ٹاؤنز کو شامل کیا گیا ہے اور ضلع میں 26 یونین کمیٹیاں ہیں۔