کراچی : سندھ حکومت کی جانب سے بلدیاتی ترمیمی ایکٹ کے خلاف اپوزیشن جماعتیں یکجا ہوگئیں، صورتحال سے نمٹنے کیلئے ملاقاتوں کا سلسلہ جاری ہے۔
اس حوالے سے تحریک انصاف سندھ کا ایک وفد حکمت عملی مرتب کرنے کے لیے متحدہ قومی موومنٹ پاکستان ایم کیو ایم کےعارضی مرکز بہادر آباد دفتر پہنچ گیا۔
تحریک انصاف کے وفد کی قیادت اپوزیشن لیڈر حلیم عادل کر رہے ہیں وفد میں فردوس شمیم نقوی، جمال احمد، بلال غفار، سعید آفریدی اور دیگر شامل ہیں۔
ایم کیو ایم کے وفد میں خواجہ اظہارالحسن، زاہد قریشی، محمد ابوبکر سمیت دیگر شامل ہیں، ملاقات میں سندھ کی موجودہ سیاسی صورتحال ، پیپلزپارٹی کی بیڈ گورننس اور بلدیاتی ایکٹ پر مشاورت کی جائے گی۔
اس کے علاوہ دونوں سیاسی جماعتوں کے رہنما سندھ کے متنازعہ بلدیاتی ایکٹ کیخلاف گرینڈ الائنس اوراحتجاجی تحریک سمیت دیگر امور پر غورو خوص کریں گے۔
علاوہ ازیں پی ڈی ایم سربراہ مولانا فضل الرحمان کل کراچی کا2روزہ دورہ کریں گے، فضل الرحمان 24 دسمبر کو ہونے والے پی ڈی ایم سندھ کے صوبائی اجلاس میں شرکت کریں گے۔
ذرائع کا کہنا ہے کہ مذکورہ صوبائی اجلاس شاہ اویس نورانی کے گھر پران کی میزبانی میں منعقد ہوگا، اجلاس میں لانگ مارچ کے حوالے سے اہم فیصلے کئے جائیں گے۔
واضح رہے کہ سندھ حکومت نے رواں ماہ نئے بلدیاتی نظام کا ترمیمی بل کثرت رائے سے منظور کیا تھا، بل کے تحت کراچی سمیت سندھ بھر میں بلدیاتی کونسل کے چیئرمین کا انتخاب شو آف ہینڈ سے ہوگا۔
اپوزیشن کے شدید احتجاج اور اعتراضات کے بعد سندھ حکومت نے بلدیاتی قانون کے نئی ترمیمی مسودے میں خفیہ رائے شماری کی شق واپس لے لی تھی۔
سندھ حکومت نے صوبے میں ٹاؤن سسٹم برقرار رکھنے کا فیصلہ کرتے ہوئے کہا تھا کہ کراچی، حیدرآباد، سکھر، لاڑکانہ، میرپورخاص اور بینظیرآباد میں ٹاؤنز بنیں گے، پیدائش اور اموات کا اندراج لوکل کونسلز کو واپس کر دیا جائے گا۔
