Tag: #LocalBodyElection

کراچی میں آج بلدیاتی انتخابات کے لیے پولنگ جاری ہے تاہم بدانتظامی کےمظاہرے بھی سامنے آ رہے ہیں کئی بیلٹ باکس کی سیلیں کھلی رہنے کا انکشاف ہوا ہے۔

اے آر وائی نیوز کے مطابق سندھ میں بلدیاتی انتخابات کے دوسرے مرحلے میں کراچی اور حیدرآباد ڈویژن کے 16 اضلاع میں پولنگ جاری ہے۔ شہر قائد میں پولنگ کے آغاز سے ہی کئی بے ضابطگیاں سامنے آ رہی ہیں۔

کراچی میں کئی بیلٹ باکس کی سیلیں کھلی رہنے کا انکشاف ہوا ہے جس سے انتخابات کی شفافیت پر سوالیہ نشان لگ سکتا ہے۔

پی ٹی آئی کے رہنما فردوس شمیم نقوی پِلاس لے کر نکل پڑے اور خود ہی سیلیں کَسنے لگے۔ اس موقع پر ان کی انتخابی عملے کی تکرار بھی ہوئی اور عملہ فردوس شمیم نقوی کو سیلیں ٹائٹ کرنے سے منع کرتے رہا۔

دوسری جانب پاکستان پیپلز پارٹی نے پی ٹی آئی کے رکن سندھ اسمبلی فردوس شمیم نقوی کے خلاف الیکشن کمیشن کو شکایت درج کراتے ہوئے کہا ہے کہ میڈیا فوٹیجز میں دیکھا جاسکتا ہے فردوس شمیم پولنگ اسٹیشنوں کا دورہ کر رہے ہیں اور بلیٹ باکس کو کھول رہے ہیں۔

پی پی الیکشن سیل کے انچارج تاج حیدر نے الیکشن کمیشن سے مطالبہ کیا ہے کہ وہ اس کا نوٹس لیتے ہوئے پی ٹی آئی کے مذکورہ رہنما کے خلاف کارروائی کرے۔

الیکشن کمیشن نے بھی میونسپل کمیٹی جناح یوسی 2 میں فردوس شمیم نقوی کے مبینہ طور پر سیل توڑنے کا نوٹس لیتے ہوئے ممبر سندھ اسمبلی کو پولنگ اسٹیشن سے فوری بے دخل کرنےکا حکم دیتے ہوئے کہا ہے کہ یہ غیر قانونی حرکت اور ضابطہ اخلاق کی خلاف ورزی ہے۔

الیکشن کمیشن آف پاکستان نے اس معاملے پر صوبائی الیکشن کمشنر نے فوری طور پر رپورٹ بھی طلب کرلی ہے۔

امیر جماعت اسلامی کراچی حافظ نعیم نے کہا ہے کہ الیکشن کمیشن آج بلدیاتی انتخابات کے بعد میئر کراچی کے انتخاب کیلیے براہ راست الیکشن کرائے۔

اے آر وائی نیوز کے مطابق امیر جماعت اسلامی کراچی نے اپنا حق رائے دہی استعمال کرنے کے بعد میڈیا سے گفتگو کرتے ہوئے کہا کہ کراچی کے میئر کا انتخاب موجودہ یونین کونسلز کی بنیاد پر نہیں بلکہ براہ راست ہونا چاہیے۔ الیکشن کمیشن آج بلدیاتی انتخابات کے بعد میئر کراچی کے انتخاب کیلیے بھی براہ راست الیکشن کرائے۔

حافظ نعیم کا کہنا تھا کہ الیکشن کمیشن سے مطالبہ ہے کہ میئر کے انتخاب کیلیے براہ راست الیکشن کرالے تو دودھ کا دودھ اور پانی کا پانی ہو جائے گا۔ ہم چاہتے ہیں کہ تمام پارٹیاں الیکشن ریفارمز کیلیے مل بیٹھیں۔

ان کا کہنا تھا کہ جماعت اسلامی کی زبردست تحریک کے نتیجے میں آج کراچی میں بلدیاتی انتخابات ہو رہے ہیں۔ مجموعی طور پر امن وامان کی صورتحال بہتر ہے۔ بعض مقامات پر سازش کرکے کیمپوں کو جلایا گیا تاکہ عوام رک جائیں۔ کچھ عناصر خوف وہراس پھیلانے کی کوشش کر رہے ہیں۔ جو خوف پھیلا رہے ہیں وہ دہشتگرد ہیں انہیں فوکس کرنے کی ضرورت ہے۔ ایسے واقعات سے دشمن بے نقاب ہو رہے ہیں۔

حافظ نعیم نے عوام سے گزارش کی کہ وہ ووٹ کاسٹ کریں۔ جتنا ٹرن آؤٹ زیادہ ہوگا کراچی اور حیدرآباد کے دشمن کو جواب ملے گا۔ عوام نکلیں گے تو ان کی ہمت نہیں ہے کچھ کرسکیں۔ کراچی والوں کیلیے آج موقع ہے، میک یا بریک۔ عوام گھروں سے نکل کر ہی کراچی کو بچا سکتے ہیں۔ عوام ووٹ کاسٹ نہیں کرینگے تو وڈیرہ شاہی اور طاقتور ہوں گے۔ ہمیں ان جاگیرداروں کی طاقت کو توڑنا ہے۔

یہ بھی پڑھیں: کراچی اور حیدرآباد میں بلدیاتی انتخابات کیلیے پولنگ جاری

رہنما جماعت اسلامی کا کہنا تھا کہ حلقہ بندیوں پر ہمیں بھی اعتراض ہے، لیکن یہ حلقہ بندیاں سندھ حکومت نے کیں اور ایم کیوایم ان کی اتحادی ہے۔ ایم کیو ایم 17سال سے ہر حکومت کیساتھ جھنجھنے کی طرح لٹکتی رہتی ہے۔ اس نے حلقہ بندیوں پرملی بھگت سے پہلے اعتراض نہیں اٹھایا۔ ہم جانتے تھے یہ حلقہ بندیوں کو بنیاد پر یہ کئی سال الیکشن نہیں کرائیں گے۔

کراچی اور حیدرآباد میں آج بلدیاتی انتخابات کے لیے پولنگ جاری ہے پی پی، جماعت اسلامی، پی ٹی آئی سمیت سیاسی رہنما بھی اپنا حق رائے دہی استعمال کرنے پولنگ اسٹیشن آ رہے ہیں۔

اے آر وائی نیوز کے مطابق پی پی رہنما اور صوبائی وزیر سعید غنی نے چنیسر گوٹھ کے پولنگ اسٹیشن میں اپنا ووٹ ڈالا ہے انہوں نے کاؤنٹر پر جاکر اپنے ووٹ کی پرچی خود بنائی۔ اس موقع پر ان کا کہنا تھا کہ بلدیاتی انتخابات کا انعقاد خوش آئند ہے۔ کراچی میں فول پروف سیکیورٹی انتظامات کیے گئے ہیں۔ پی پی بھاری اکثریت سے کامیاب ہوگی۔ ایم کیو ایم کا بائیکاٹ کا فیصلہ اپنا ہے۔

امیر جماعت اسلامی کراچی حافظ نعیم الرحمان نے نارتھ ناظم آباد کی یونین کونسل 8 کے پولنگ اسٹیشن میں اپنا حق رائے دہی استعمال کیا ہے۔

پی ٹی آئی کے سابق ایم این اے فہیم خان نے قیوم آباد میں اپنا ووٹ کاسٹ کیا ہے۔ اس موقع پر انہوں نے شہر قائد کے لوگوں سے گھروں سے نکلنے اور اپنا حق رائے دہی استعمل کرتے ہوئے عمران خان کے امیدواروں کو منتخب کرنے کی اپیل کی ہے۔

یہ بھی پڑھیں: کراچی اور حیدرآباد میں بلدیاتی انتخابات کیلیے پولنگ جاری

ضلع دادو میں پی پی ایم پی اے مجیب الحق نے وارڈ نمبر 13 میں ووٹ ڈالا۔

ملک کے سب سے بڑے شہر کراچی کا میئر کون بنے گا اس کے لیے آج ووٹنگ جاری ہے یہ تاج وہی پہنے گا جو مطلوبہ نمبر گیم پورے کرلے گا۔

اے آر وائی نیوز کے مطابق ملک کے سب سے بڑے شہر کراچی کا میئر کون بنے گا اس کے لیے آج ووٹنگ جاری ہے یہ تاج وہی پہنے گا جو مطلوبہ نمبر گیم پورے کرلے گا اور مطلوبہ نمبر گیم 124 ہے۔

کراچی ڈویژن کے 7 اضلاع میں یونین کونسلوں کی مجموعی تعداد 246 ہے۔ میئر منتخب ہونے کے لیے کسی بھی امیدوار کو 124 ووٹ درکار ہوں گے یعنی سیاسی جماعت کو اپنا میئر لانے کے لیے شہر قائد کی 246 میں سے کم از کم 124 یونین کونسلوں پر کامیابی حاصل کرنا لازمی ہوگا۔

یہ بھی پڑھیں: کراچی اور حیدرآباد میں بلدیاتی انتخابات کیلیے پولنگ جاری

یونین کونسلوں کی تعداد کے لحاظ سے ضلع وسطی سب سے بڑا ہے جہاں یونین کونسلوں کی تعداد 45 ہے۔ ضلع شرقی میں یونین کونسلوں کی تعداد 43 ہے۔ 37 یونین کونسلوں کے ساتھ ضلع کورنگی تیسرا بڑا اہم ضلع ہے۔ ضلع کیماڑی اور غربی بتیس 32 یونین کونسلوں پر مشتمل ہے۔ ضلع ملیر 30 جبکہ ضلع جنوبی 27 یونین کونسلوں پر مشتمل ہے۔

پاکستان تحریک انصاف کے رہنما علی زیدی نے دعویٰ کیا ہے کہ پی ٹی آئی کراچی اور حیدرآباد میں اپنا میئر منتخب کرانے جا رہی ہے۔

اے آر وائی نیوز کے مطابق سابق وفاقی وزیر علی زیدی نے رات گئے پریس کانفرنس کرتے ہوئے کہا کہ پی ٹی آئی کراچی اور حیدرآباد میں اپنا میئر منتخب کرنے جا رہی ہے۔ ایم کیو ایم کے پاس امیدوار ہی نہیں اور انہیں پولنگ ایجنٹ بنانے کیلیے کوئی نہیں مل رہا تھا اس لیے وہ الیکشن کا بائیکاٹ کرکے بھاگ گئے۔

پی ٹی آئی رہنما نے کہا کہ اپریل 2022 میں عمران خان نے ایم کیو ایم کو نفیس ہونے کا موقع دیا تھا لیکن وہ آصف زرداری سے ملنے چلے گئے اور ایک معاہدہ سائن کرلیا۔ پی ڈی ایم سے معاہدے کے وقت حلقہ بندیوں کا ذکر ہی نہیں تھا۔ جس شخص نے اس ملک اور صوبے کو لوٹا سندھ کے ساتھ اجتماعی زیادتی کی۔ خالد مقبول ان کی تعریف کرتے پھر رہے ہیں۔ کراچی سے محبت ہے تو کراچی کا خون چوسنے والوں سے کیسے محبت کر سکتے ہیں؟ عزیر بلوچ آپ کا ساتھی دوست تھا یا بابا لاڈلہ کا لیڈر بڑا سچا آدمی ہے؟ آپ نے آصف زرداری کو آج سچا کہہ دیا۔

ان کا کہنا تھا کہ ایم کیو ایم نے خود دیوار پر لگی کلہاڑی پر اپنا سر مار دیا۔ حقیقت یہ ہے کہ الیکشن سر پر آگئے تو ایم کیو ایم کو ایک بات اور سمجھ آگئی کہ ان کے پاس کیمپ ہی نہیں۔ ایم کیوایم والوں کے پاس امیدوار ہی نہیں، پکڑ دھکڑ کر کچھ امیدوار کیے لیکن پولنگ ایجنٹ نہیں ملے۔ لیاری، چنیسر ٹاؤن، ناظم آباد سے امیدوار ہمارے پاس آگئے۔ جیری مینڈرنگ کامطلب یہ نہیں کہ آپ میدان چھوڑ دیں۔ ایم کیو ایم کا سیاسی طور پر کام پورا ہو چکا ہے۔ ان میں دو چار اچھے لوگ ہوں گے دیکھیں وہ کہاں جاتے ہیں؟

مزید پڑھیں: بلدیاتی الیکشن، پی ٹی آئی کے بیلٹ پیپرز چوری ہونے پر الیکشن کمیشن کو خطوط

علی زیدی نے مزید کہا کہ خالد مقبول صدیقی نے کہا کہ ووٹ ڈالنے کوئی نہیں نکلے گا۔ ہم عوام کو الیکشن سے روکنے کی دھمکی پر عدالت جائیں گے۔ عوام بڑی تعداد میں نکل کر ووٹ ڈالیں گے تو دھاندلی بھی نہیں ہوگی۔ ہم کراچی کو امن کا گہوارہ اور خوبصورت شہر بنائیں گے۔ اب کراچی دیکھے گا کہ ترقی کیا ہوتی ہے۔

کراچی اور حیدرآباد میں آج بلدیاتی انتخابات ہو رہے ہیں پولنگ شروع ہونے سے چند گھنٹے قبل رات گئے شہر قائد میں سیاسی جماعتوں کے کیمپس جلا دیے گئے۔

اے آر وائی نیوز کو ذرائع سے ملنے والی اطلاعات کے مطابق سیاسی جماعتوں کے کیمپ جلائے جانے کا واقعہ تھانہ سعود آباد کی حدود میں رات گئے پیش آیا ہے اور بوائز سیکنڈری اسکول کے قریب نامعلوم افراد نے کیمپس کو جلایا ہے۔

یہ بھی پڑھیں: سندھ میں بلدیاتی الیکشن کا دوسرا مرحلہ، پولنگ شروع

اس حوالے سے پولیس حکام کا کہنا ہے کہ بظاہر لگتا ہے کہ کسی نے سردی سے بچنے کے لیے آگ لگائی جو کیمپ کو لگ گئی تاہم واقعے سے متعلق تحقیقات کر رہے ہیں۔

کراچی اور حیدرآباد میں آج ہونے والے بلدیاتی الیکشن کے موقع پر چیف الیکشن کمشنر سکندر سلطان راجا کی جانب سے پیغام جاری کیا گیا ہے۔

چیف الیکشن کمشنر کی جانب سے جاری پیغام میں کہا گیا ہے کہ جمہوریت کے استحکام اور ملکی ترقی کیلیے بلدیاتی اداروں کا قیام ضروری ہے۔ کراچی اور حیدرآباد کے محب وطن عوام جمہوریت پر اپنے اعتماد کا بھرپور اظہار کریں۔

سلطان سکندر راجا نے مزید کہا کہ بلدیاتی انتخابات میں ووٹرز اور عوام پُر امن انتخابی ماحول یقینی بنائیں۔ انتخابی عمل میں کسی قسم کی مداخلت اور شر پسندی سے سختی سے نمٹا جائے۔

سندھ میں بلدیاتی الیکشن کا دوسرا مرحلہ، پولنگ شروع

چیف الیکشن کمشنر نے امید ظاہر کی کہ متعلقہ ادارے کراچی اور حیدرآباد کے عوام کے اعتماد پر ضرور پورا اتریں گے۔

بلدیاتی الیکشن کے دوسرے مرحلے میں آج کراچی اور حیدرآباد ڈویژن میں پولنگ ہو رہی ہے پی ٹی آئی نے بلیٹ پیپرز چوری ہونے پر الیکشن کمیشن کو خطوط لکھے ہیں۔

اے آر وائی نیوز کے مطابق پاکستان تحریک انصاف کے رہنما علی زیدی اور بلال غفار نے بیلٹ پیپرز چوری ہونے پر الیکشن کمیشن کو خطوط لکھے ہیں جس میں الیکشن کمیشن کو آگاہ کیا گیا ہے کہ ماڑی پور کیماڑی اور گلبرگ میں بیلٹ پیپرز چوری کیے گئے ہیں۔

پی ٹی آئی کی جانب سے الیکشن کمیشن سے درخواست کی گئی ہے کہ وہ اپنی آئینی ذمے داریوں کو پورا کرے۔

خط میں انتخابی مہم ختم ہونے کے بعد بھی پی پی کی انتخابی مہم جاری رہنے سے متعلق بتایا گیا اور الیکشن کمیشن نے اس پر ضابطے کی کارروائی کرنے کا مطالبہ کیا گیا۔

علی زیدی نے میڈیا سے گفتگوکرتے ہوئے کہا کہ الیکشن کمیشن کو آج پانچ خطوط لکھے گئے ہیں اور اس میں بیلٹ باکس اور پیپرز چوری ہونے سے آگاہ کیا گیا ہے۔ پیپلز پارٹی کے امیدوار ٹھپے لگاتے پکڑے گئے ہیں۔ پی پی والے الیکشن قوانین کی دھجیاں اڑا رہے ہیں۔

پی ٹی آئی رہنما کا کہنا تھا کہ ہم نے الیکشن کمیشن سے کہا ہے کہ صاف وشفاف انتخابات کرائے جائیں۔ اسٹاف پورا ہونا چاہیے۔ قانون نافذ کرنے والے ادارے لوگوں کے مینڈیٹ کا تحفظ کریں۔

یہ بھی پڑھیں: سندھ میں بلدیاتی الیکشن کا دوسرا مرحلہ، پولنگ کا وقت شروع

ان کا کہنا تھا کہ دیکھتے ہیں کہ الیکشن کیسے ہوتے ہیں۔ اس پر بھی پٹیشن لگائیں گے۔