ARYNews.tv | Urdu – Har Lamha Bakhabar

Tag: lockdown

  • دنیا کی بڑی آئی فون فیکٹری والے چینی شہر میں لاک ڈاؤن ختم

    دنیا کی بڑی آئی فون فیکٹری والے چینی شہر میں لاک ڈاؤن ختم

    بیجنگ: دنیا کی سب بڑی آئی فون فیکٹری والے چینی شہر زہنگزو میں کووِڈ لاک ڈاؤن ختم کر دیا گیا۔

    غیر ملکی میڈیا رپورٹس کے مطابق بڑے چینی شہروں بشمول مالیاتی مرکز شنگھائی اور زہنگزو نے بدھ کو کرونا وبا کی روک تھام کے لیے لگایا گیا لاک ڈاؤن ختم کر دیا۔

    زہنگزو میں پابندیوں میں نرمی کے بعد جِم، سپر مارکیٹیں اور ریسٹورنٹس کھل گئے، اس شہر میں تائیوان کے کنٹریکٹ مینوفیکچرر فوکسکون کی فیکٹری ’آئی فون سٹی‘ واقع ہے جس میں تقریباً 2 لاکھ کارکن کام کرتے ہیں اور ایپل کے لیے مصنوعات بناتے ہیں، بہ شمول آئی فون 14 پرو، اور پرو میکس 14۔

    زہنگزو نے گزشتہ پانچ دن تک اپنے شہری اضلاع کو لاک ڈاؤن کر دیا تھا کیوں کہ کرونا وائرس کے کیسز میں اضافہ ہو گیا ہے۔

    چین اور روسی جنگی طیارے داخل ہوتے ہی جنوبی کورین طیاروں کی ہنگامی اڑانیں

    چین کے سب سے بڑے اور امیر ترین شہر شنگھائی میں بھی صحت کے حکام نے گزشتہ روز اعلان کیا کہ جمعرات (آج) سے 11 اضلاع کے 24 ہائی رسک علاقوں پر نافذ لاک ڈاؤن اٹھا لیا جائے گا۔

    گوانگ ژو کے ہیلتھ کمیشن کے ترجمان نے ایک پریس بریفنگ میں بتایا کہ مقامی حکام نے گوانگ ژو کے چار اضلاع میں بھی لاک ڈاؤن ختم کر دیا ہے۔ واضح رہے کہ مینوفیکچرنگ اور نقل و حمل کے مرکز میں اس ماہ کے شروع میں عائد پابندیوں میں نرمی منگل کو شہریوں کی پولیس کے ساتھ جھڑپ کے بعد آئی ہے۔

    خیال رہے کہ چین میں کرونا پابندیوں کے خلاف احتجاج کا سلسلہ جاری ہے، صوبہ گوانگ زو میں پولیس اور مظاہرین کے درمیان جھڑپوں میں متعدد افراد کو گرفتار کیا گیا ہے۔ چین میں چوبیس گھنٹوں کے دوران 37 ہزار سے زائد کرونا کیسز رپورٹ ہوئے ہیں۔

  • چین کے شہر ووہان میں پھر لاک ڈاؤن

    چین کے شہر ووہان میں پھر لاک ڈاؤن

    ووہان: چین کے شہر ووہان میں ایک بار پھر لاک ڈاؤن لگا دیا گیا۔

    تفصیلات کے مطابق چینی حکومت نے ووہان کی دس لاکھ آبادی والے علاقے جیانگزیا میں محض 4 کیس رپورٹ ہونے پر پورے ضلع میں لاک ڈاؤن نافذ کر دیا۔

    حکام نے شہریوں کو 3 روز تک گھروں میں رہنے کا حکم جاری کر دیا ہے۔ بی بی سی کے مطابق چینی حکومت نے 24 گھنٹے سے بھی کم عرصے میں پورے شہر میں قرنطینہ کا اعلان کیا۔

    واضح رہے کہ چین کے شہر ووہان میں 23 جنوری 2020 میں دنیا کا سب سے پہلا کرونا لاک ڈاؤن لگایا گیا تھا، جسے 8 اپریل میں اٹھا لیا گیا تھا۔

    یاد رہے کہ ایک کروڑ 10 لاکھ آبادی والے ووہان شہر میں ایک مارکیٹ سے دسمبر 2019 میں پہلی مرتبہ کرونا وائرس کا پتا چلا تھا، جس کے بعد اس شہر کو 76 دنوں کے لیے سیل کر دیا گیا تھا اور یہ دنیا سے پوری طرح کٹ گیا تھا۔

    چین کے ہوبائی صوبے میں واقع ووہان کرونا وائرس سے سب سے زیادہ متاثرہ شہر رہا ہے، وائرس سامنے آنے کے بعد اس شہر کو عالمی سطح کی تحقیقات کا بھی سامنا رہا، یہ جاننے کے لیے کووِڈ 19 کی وبا کیسے پھیلی۔

    ووہان شہر کی وباؤں کے سلسلے میں تحقیقات کرنے والی لیبارٹری پر بھی سازشی تھیوریوں پر یقین رکھنے والوں کی نگاہیں مرکوز رہیں۔

  • پنجاب میں کرونا وائرس کی پابندیوں میں نرمی

    پنجاب میں کرونا وائرس کی پابندیوں میں نرمی

    لاہور: محکمہ صحت پنجاب نے کرونا وائرس کی پابندیوں میں نرمی کرتے ہوئے نئی ہدایات جاری کردیں، شادی کی ان ڈور تقریبات میں 500 مہمان شرکت کر سکیں گے، آؤٹ ڈور تقریبات میں ویکسی نیٹڈ افراد کی تعداد پر کوئی پابندی نہیں۔

    تفصیلات کے مطابق محکمہ صحت پنجاب نے کرونا وائرس کی پابندیوں میں نرمی کر دی، محکمہ صحت پنجاب کا کہنا ہے کہ کاروباری مراکز کرونا ایس او پیز کے تحت کھولے جائیں گے۔

    محکمہ صحت پنجاب کا کہنا ہے کہ ریستوران میں ویکسی نیٹڈ افراد کو ان ڈور اور آؤٹ ڈائننگ کی اجازت ہوگی۔

    شادی کی ان ڈور تقریبات میں 500 مہمان شرکت کر سکیں گے، آؤٹ ڈور تقریبات میں ویکسی نیٹڈ افراد کی تعداد پر پابندی نہیں۔

    محکمہ صحت کے مطابق مزارات میں بھی صرف ویکسی نیٹڈ افراد کو آنے کی اجازت ہوگی، جم کھلے رہیں گے اور کھیلوں کی سرگرمیاں جاری رہیں گی۔

    دفاتر 100 فیصد ویکسی نیشن پر مکمل عملے کے ساتھ کھل سکتے ہیں۔

    محکمہ صحت کا کہنا ہے کہ پبلک ٹرانسپورٹ 80 جبکہ ٹرینیں 100 فیصد مسافروں کے ساتھ چل سکیں گی، پبلک ٹرانسپورٹ میں کھانے فراہم کرنے پر پابندی برقرار رہے گی۔

    تعلیمی اداروں کو کھلنے کی اجازت ہوگی تاہم 12 سال سے زائد عمر کے افراد کو ویکسی نیٹڈ ہونا ضروری ہوگا۔

  • کورونا کی بہتر صورتحال ، پنجاب میں لاک ڈاؤن میں نرمی کا فیصلہ

    کورونا کی بہتر صورتحال ، پنجاب میں لاک ڈاؤن میں نرمی کا فیصلہ

    لاہور : پنجاب میں کورونا صورتحال میں بہتری کے پیش نظر 36 اضلاع میں لاک ڈاؤن میں نرمی کا فیصلہ کرلیا گیا ، اطلاق آج سے 31اکتوبر تک پنجاب کے تمام اضلاع پر ہو گا۔

    تفصیلات کے مطابق پنجاب بھر میں کرونا وائرس کے بتدریج کم ہوتے خطرہ کے پیش نظر لاک ڈاون میں نرمی کا فیصلہ کرلیا ، تمام اضلاع میں لاک ڈاؤن آرڈر میں نرمی کے احکامات کا نوٹیفکیشن بھی جاری کردیا ہے ، احکامات کا اطلاق 16 اکتوبر سے 31اکتوبر تک صوبے کے تمام اضلاع پر ہو گا۔

    سیکرٹری عمران سکندر بلوچ کا کہنا ہے کہ مارکیٹ اور کاروباری مراکز 10 بجے تک کھل سکیں گے اور پنجاب بھر میں ہفتہ کے ساتوں دن معمولات زندگی بحال رہیں گے

    نوٹیفکیشن کے مطابق ہوٹلز اور ریسٹیورنٹس میں انڈور ڈائننگ کی 50فیصد گنجائش کے ساتھ صرف ویکسی نیٹڈ افراد کو رات 11:59 تک اجازت ہو گی جبکہ آؤٹ ڈور ڈائننگ میں بھی رات 11:59 تک صرف ویکسی نیٹڈ افراد کے داخلے کی اجازت ہے۔

    عمران سکندر بلوچ کا کہنا تھا کہ انڈور شادیوں کی تقریبات صرف 300 اور آؤٹ ڈور شادیوں میں صرف 500 ویکسی نیٹڈ افراد کی اجازت ہو گی۔

    سیکرٹری ہیلتھ کے مطابق تمام مزارات اور سینما گھر مکمل ویکسی نیٹڈ افراد کے لیے کھلیں رہیں گے جبکہ انڈور اجتماعات میں صرف 300 اور آؤٹ ڈور اجتماعات میں 1000 ویکسی نیٹڈ افراد کی شرکت کی اجازت ہوگی۔

    نوٹیفکیشن میں کہا گیا کہ کانٹیکٹ سپورٹس میں صرف مکمل ویکسی نیٹڈ افراد ہی حصہ لے سکیں گے اور جمز تمام مکمل ویکسی نیٹڈ افراد کے لیے کھلیں گے۔

    عمران سکندر بلوچ نے کہا کہ تمام نجی و سرکاری دفاتر معمول کے اوقات میں 100 فیصد عملہ کے ساتھ کام کرسکیں گے، پبلک ٹرانسپورٹ 70 فیصد ویکسی نیٹڈ مسافروں کے ساتھ ہفتہ کے ساتوں دن چل سکے گی تاہم سفر کے دوران ہر قسم کی رفریشمنٹس پر مکمل پابندی ہو گی۔

    نوٹیفکیشن کے مطابق ریل سروس 70فیصد گنجائش کے ساتھ چل سکے گی، تفریحی مقامات 50 فیصد کپیسٹی کے ساتھ کھل سکیں گے اور کنٹرولڈ سیاحت کی ویکسی نیٹڈ افراد کو اجازت ہو گی۔

    سیکرٹری ہیلتھ نے بتایا تمام تعلیمی ادارے معمول کے اوقات میں 100فیصد حاضری کے ساتھ کھل سکیں گے، 12سال سے زائد عمر کے تمام طالب علم ویکسی نیشن یقینی بنائیں گے جبکہ زرعی اور صعنتی شعبے کو اس نوٹیفیکیشن سے استثنی حاصل ہو گا۔

    عمران سکندر بلوچ کا کہنا تھا کہ ضلعی انتظامیہ اور قانون نافذ کرنے والے ادارے نوٹیفیکیشن کا باقاعدہ اطلاق یقینی بنائیں گے۔

  • پینٹاگون کو بند کردیا گیا مگر کیوں؟

    پینٹاگون کو بند کردیا گیا مگر کیوں؟

    واشنگٹن: امریکی محکمہ دفاع کے ادارے پینٹاگون کے قریب فائرنگ کا واقعہ پیش آیا ہے، فائرنگ کے نتیجے میں متعدد افراد زخمی ہوگئے ہیں۔

    غیر ملکی میڈیا رپورٹ کے مطابق فائرنگ کا واقعہ میٹرو بس اسٹیشن کے قریب پیش آیا، جو کہ پینٹاگون ٹرانزٹ سینٹر کا حصہ ہے اور پینٹاگون سے محض چند قدم کے فاصلے پر واقع ہے، فائرنگ کے بعد پینٹاگون کو مکمل بند کردیا گیا ہے اور آمدورفت کو بند کردیا گیا ہے۔

    ابتدائی اطلاعات کے مطابق فائرنگ سے متعدد افراد زخمی ہوئے ہیں۔

    امریکی میڈیا رپورٹ کے مطابق فائرنگ سے زخمیوں میں ایک پولیس افسر بھی شامل ہے،نام نہ ظاہر کرنے کی شرط پر اہلکار نے بتایا کہ وہ اس طرح کی تحقیقات پر عوامی سطح پر بات کرنے کے مجاز نہیں ہے۔

    عمارت کے قریب ایسوسی ایٹڈ پریس کے رپورٹر نے تصدیق کی ہے کہ پینٹاگون کے قریب متعدد گولیوں کی آوازیں سنائی دی گئیں ہیں، موقع پر موجود ایک اور صحافی نے پولیس کے حوالے سے بتایا کہ یہاں شوٹر موجود ہیں۔

    میڈیا رپورٹ کے مطابق فائرنگ کے وقت سیکریٹری دفاع لائیڈ آسٹن اور جوائنٹ چیفس آف اسٹاف چیئرمین جنرل مارک ملی ، وائٹ ہاؤس میں صدر جو بائیڈن کے ساتھ موجود تھے۔

    یاد رہے کہ دو ہزار دس میں بھی پینٹاگون فورس پروٹیکشن ایجنسی کے دو افسران کو اس وقت فائرنگ کرتے ہوئے زخمی کردیا گیا تھا جب وہ سیکیورٹی ایریا کی جامع تلاشی میں مصروف تھے، پولیس اہلکاروں نے حملہ آور کو زخمی حالت میں گرفتار کیا تھا، جس کی شناخت جان پیٹرک بیڈل کے نام سے ہوئی تھی۔

  • ڈیلٹا وائرس کے بڑھتے کیسز، کراچی کے بعد پنجاب میں بھی لاک ڈاون نافذ

    ڈیلٹا وائرس کے بڑھتے کیسز، کراچی کے بعد پنجاب میں بھی لاک ڈاون نافذ

    لاہور : پنجاب کے 4 اضلاع میں ڈیلٹا وائرس کے بڑھتے کیسز کے پیش نظر لاک ڈاون نافذ کردیا گیا ، لاک ڈاؤن3 اگست سے31اگست تک نافذالعمل رہے گا۔

    تفصیلات کے مطابق پنجاب کے 4 اضلاع میں ڈیلٹاوائرس کی تعداد میں تیزی سے ریکارڈ کیا گیا ،جس کے بعد صوبے کے چاروں اضلاع میں لاک ڈاون لگا دیا گیا، اس حوالے سے محکمہ صحت نے نوٹیفکیشن جاری کردیا ہے۔

    سیکرٹری صحت سارہ اسلم نے کہا لاک ڈاؤن3 اگست سے31اگست تک نافذالعمل رہے گا، اطلاق لاہور،راولپنڈی،ملتان،فیصل آباد کےعلاقوں میں ہوگا ، تمام کاروباری مراکز کے اوقات رات8 بجے تک ہوں گے جبکہ ہفتہ اور اتوار چھٹی میں تمام کاروباری سرگرمیاں معطل رہیں گی۔

    سارہ اسلم کا کہنا تھا کہ میڈیکل سروسز،فارمیسیز،طبی مراکز ویکسی نیشن سینٹرزپورا ہفتہ کھلےرہیں گے جبکہ پمپ،تندور،بیکری،گروسری،کریانہ اسٹور،ڈیری شاپس24گھنٹے کھل سکیں گی۔

    نوٹیفکیشن کے مطابق پھل، سبزی،گوشت،فوڈڈلیوری اینڈای کامرس سروسز ، کورئیر،پوسٹل سروسز،بجلی،گیس،انٹرنیٹ،ٹیلی کام کمپنیز، کال سینٹرز، میڈیا ہاؤسز، آٹوورکشاپس،آئل ڈپو، منڈیاں پورا ہفتہ کھلی رہیں گی۔

    سیکریٹری صحت نے کہا کہ تمام مزارات،سینماگھرمکمل بندرہیں گے، تمام سرکاری ونجی دفاتر50فیصدعملےکیساتھ کام کرسکتےہیں تاہم ان ڈور ڈائننگ پر پابندی اور آؤٹ ڈورڈائننگ ایس اوپیزکیساتھ 10بجے تک ہوگی۔

    منتخب اضلاع میں 8اگست سےان ڈور شادی کی تقریبات پر مکمل پابندی ہوگی تاہم آؤٹ ڈورتقریبات کی400افرادکی گنجائش کیساتھ 10بجےتک اجازت ہوگی۔

    جمزمیں صرف ویکسینیٹڈ لوگ ورزش کے لیے آسکتےہیں جبکہ تمام انٹرٹینمنٹ مراکز،تفریحی پارکس،سوئمنگ پول مکمل بندرہیں گے اور صوبہ بھرکےتمام سیاحتی مقامات کوایس اوپیز کے مطابق کام کی اجازت ہے۔

    ثقافتی تہواراوراجتماعات پرمکمل پابندی عائدہوگی، پبلک ٹرانسپورٹ کوفیصد50گنجائش کےساتھ چلنےکی اجازت ہوگی جبکہ مال بردارگاڑیوں،ایمبولینسز، طبی شعبے کی گاڑیوں، صعنت اورزراعت کےشعبے کو استثنیٰ حاصل ہے۔

    سیکرٹری صحت نے کہا ٹرین سروس کل گنجائش کے70فیصدمسافروں کےساتھ جاری رہے گی ، ضلعی انتظامیہ،پولیس ایس اوپیزکااطلاق یقینی بنائیں گے۔

  • سندھ میں جزوی لاک ڈاؤن، پابندیوں کی تفصیلات

    سندھ میں جزوی لاک ڈاؤن، پابندیوں کی تفصیلات

    کراچی: سندھ بھر میں کل سے 8 اگست تک جزوی لاک ڈاؤن نافذ ہوگا، یہ فیصلہ وزیر اعلیٰ سندھ مراد علی شاہ کی صدارت میں کرونا ٹاسک فورس کے اجلاس میں کیا گیا ہے۔

    وزیر اعلیٰ سندھ کے مطابق جزوی لاک ڈاؤن میں مارکیٹیں بند رہیں گی، ریٹیل کاروبار بند رہے گا، تاجروں سے بھی لاک ڈاؤن سے متعلق بات چیت کی جائے گی، ریسٹورنٹس میں ڈائن ان پر پابندی ہوگی، بینک وفاق کے ماتحت ہیں مگر حاضری کم رکھنے کا کہیں گے، میڈیا نمائندوں کو ماسک کے ساتھ کام کی اجازت ہوگی۔

    وزیر اعلیٰ سندھ نے کہا ٹرانسپورٹ چلے گی لیکن ان کے لیے جو ویکسین لگوانے کے لیے نکلیں گے، ٹرانسپورٹ مکمل بند نہیں کر رہے ہیں کیوں کہ ویکسینیشن جاری رکھنی ہے۔

    انھوں نے کہا ایکسپورٹ انڈسٹری کھلی رہے گی، ریسٹورنٹس کو صرف آن لائن ڈیلیوری کی اجازت ہوگی، گروسری، میڈیکل اسٹور، گوشت اور دودھ دکانیں، فارمیسی، بیکریز اور دیگر ضروری اشیا کی دکانیں کھلی رہیں گی۔

    وزیر اعلیٰ نے کہا صوبے میں ادویات اور کھانے پینے کی ضروری اشیا کا کاروبار کھلا رہے گا، ہماری تجویز ہے کہ نجی دفاتر بند رکھے جائیں، بہت ضروری کام ہو تو ہی گھر سے نکلیں۔

    مراد علی شاہ کا کہنا تھا کہ 9 دن کے لاک ڈاؤن سے وبا کے پھیلاؤ میں کم از کم ایک بریک لگ جائے گی، وبا ختم ہونے والی نہیں لیکن اسپتالوں کی صورت حال بہتر ہو جائے گی، وفاق نے فیصلوں پر عمل درآمد میں مدد کا یقین دلایا ہے، ڈی جی رینجرز میٹنگ میں موجود تھے، انھوں نے بھی کہا ہم ساتھ ہیں، لوگ ویکسینیشن کارڈ لے کر نکلیں، کیوں پولیس کی چاندی کرا رہے ہیں۔

    وزیر اعلیٰ کا کہنا تھا بھارتی کرونا کو روکا نہ گیا تو صحت کا شعبہ بیٹھ جائے گا، یہ مکمل لاک ڈاؤن نہیں ہے، جو چیزیں کھلی ہوں گی ان کی فہرست جاری کریں گے، سندھ سمیت کراچی کے لوگوں سے درخواست ہے جزوی لاک ڈاؤن میں تعاون کریں، جزوی لاک ڈاؤن 8 اگست تک رہے گا، 9 اگست سے کھولنے کی طرف جائیں گے، 9 دن پورا تعاون کیاگیا تو پوری امید ہے وبا کا پھیلاؤ روک سکیں گے، ہماری دعا تو یہی ہے کہ 9 دن بعد یہ وبا ختم ہوجائے۔

  • کورونا وائرس : ابوظبی حکومت نے لاک ڈاؤن لگانے کا فیصلہ کرلیا

    کورونا وائرس : ابوظبی حکومت نے لاک ڈاؤن لگانے کا فیصلہ کرلیا

    یو اے ای : متحدہ عرب امارات کے دارالحکومت ابو ظبی میں19 جولائی سے لاک ڈاؤن نافذ کرنےکا اعلان کر دیا گیا ہے۔ ابو ظبی میں 19 جولائی سے رات بارہ بجے سے صبح پانچ بجے تک لاک ڈاؤن رہے گا۔

    میڈیا آفس کے ٹویٹ کے مطابق لاک ڈاؤن کے اوقات کے دوران ابوظبی میں جراثیم کش سپرے (سٹرلائزیشن) کیا جائے گا۔ اس دوران ٹریفک اور لوگوں کی نقل و حرکت پر پابندی ہوگی۔

    اعلامیے میں کہا گیا ہے کہ عوام اس دوران دوا یا ضروری اشیاء لانے کے علاہ کسی صورت گھر سے باہر نہ نکلیں۔ اعلامیے کے مطابق رہائشیوں سے کہا گیا ہے کہ لاک ڈاؤن کے اوقات میں ابوظبی کے اندر نقل و حرکت کے لیے اجازت نامہ حاصل کریں۔

    خیال رہے کہ جمعرات تک امارات میں کورونا وائرس کے چھ لاکھ 56 ہزار 354 کیسز اور ایک ہزار 885 اموات ہوئی ہیں۔

  • بھارت: لاک ڈاؤن کی وجہ سے بیوہ خاتون اور بچے 10 دن بھوکے رہے

    بھارت: لاک ڈاؤن کی وجہ سے بیوہ خاتون اور بچے 10 دن بھوکے رہے

    کرونا وائرس نے جہاں دنیا بھر میں غربت اور بے روزگاری میں اضافہ کردیا ہے، وہیں پہلے سے غریب ممالک کے شہریوں کو بھی سخت معاشی بحران سے دو چار کردیا ہے، بھارت میں ایسا ہی ایک خاندان بے روزگار ہونے کی وجہ سے کئی روز تک بھوکا رہا۔

    بھارتی میڈیا کے مطابق علیگڑھ میں ایک بیوہ خاتون اور ان کے بچے کرونا وبا کے بحران سے بے حد متاثر ہوئے، وبا نے اس خاندان کا روزگار چھین لیا اور 8 سے 10 دن تک 6 افراد دانے دانے کو محتاج ہو گئے۔

    بھوک سے تڑپتے خاندان کی اطلاع ایک شخص نے ایک تنظیم کو دی تو ان سب کو اسپتال میں داخل کروایا گیا ہے، بھوک سے یہ خاندان اس قدر نڈھال تھا کہ کئی کا جسم ہڈیوں کے ڈھانچے میں تبدیل ہو چکا تھا۔

    تنظیم سے وابستہ افراد کا کہنا ہے کہ جب وہ مذکورہ خاندان کے گھر پہنچے تو وہ شدید دکھ میں مبتلا ہوگئے جہاں بچے بھوک سے بلک رہے تھے۔

    تنظیم کے سربراہ ڈاکٹر سنیل کا کہنا ہے کہ بچوں کو فوری طور پر اسپتال میں داخل کروایا گیا، تنظیم کی جانب سے خاندان کے لیے کپڑے اور کھانے وغیرہ کا انتظام کیا گیا ہے۔

    بچوں کی بیوہ ماں نے بتایا کہ گھر کی واحد کفیل وہی تھیں اور ایک ایکسپورٹ کمپنی میں ملازمت کرتی تھیں، کرونا کی پہلی لہر میں لگے لاک ڈاؤن کی وجہ سے ان کا کام وہاں رک گیا جس کی وجہ سے کنبہ مالی بحران سے دو چار ہونے لگا۔

    ان کے مطابق بڑا بیٹا مزدوری کر کے گھر والوں کا پیٹ پال رہا تھا لیکن دوسرے لاک ڈاؤن میں اس کی ملازمت بھی چلی گئی، روزگار نہ ہونے کی وجہ سے راشن کی قلت تھی۔ انہوں نے بتایا کہ پانچوں بچوں نے 15 دن سے کچھ نہیں کھایا۔

  • کراچی سمیت سندھ میں کرونا وائرس کیسز کی تعداد بڑھنے کا خدشہ تھا: سعید غنی

    کراچی سمیت سندھ میں کرونا وائرس کیسز کی تعداد بڑھنے کا خدشہ تھا: سعید غنی

    کراچی: صوبائی وزیر تعلیم سعید غنی کا کہنا ہے کہ کراچی سمیت سندھ کے دیگر علاقوں میں کرونا وائرس کے کیسز بڑھے ہیں، خدشہ تھا کہ مثبت کیسز کی تعداد بڑھے گی۔

    تفصیلات کے مطابق صوبائی وزیر تعلیم سعید غنی نے اے آر وائی نیوز کے مارننگ شو باخبر سویرا میں گفتگو کرتے ہوئے کہا کہ کراچی سمیت سندھ کے دیگر علاقوں میں کرونا وائرس کے کیسز بڑھے ہیں۔

    سعید غنی کا کہنا تھا کہ بڑھتے کیسز کے بعد لاپرواہی نہیں کر سکتے، سندھ حکومت نے پابندیاں مزید سخت کرنے کا فیصلہ کیا ہے۔

    انہوں نے کہا کہ ہماری سفارشات پر عملدر آمد نہیں کیا گیا، خدشہ تھا کہ مثبت کیسز کی تعداد بڑھے گی۔

    صوبائی وزیر کا کہنا تھا کہ رات 8 بجے کے بعد شہری غیر ضروری طور پر باہر نہ نکلیں، پابندیوں کی خلاف ورزی پر ایکشن ہوگا۔ پابندیاں خوشی سے نہیں لگائیں، شہری تعاون کریں۔

    انہوں نے مزید کہا کہ پختونخواہ اور پنجاب میں بھی سخت فیصلے کیے گئے ہیں، بین الصوبائی ٹرانسپورٹ بند کرنے کی ہماری تجویز نہیں مانی گئی۔